Mañakuy

2 ¿Pimantataq mañakuna?

RUNASQA, pimantapis mañakuptinchik, Dios chay mañakuykunata uyarisqanta ninku. Tukuy religiones juklla kasqankuta niqkuna, chantá religionesta tantayta munaqkuna ima, chayta ninku, ¿chay nisqanku chiqachu?

Chiqamanta Diospa Palabranqa, achkha runaspa mañakusqan pantasqa diosman kasqanta rikuchiwanchik. Biblia qillqakuchkaptin runaqa, lantismanta mañakuyman yachasqa karqa. Chaywanpis, Diosqa llaqtanman mana chayta ruwananta, kutin kutita nirqa. Kay Salmo 115:4-6, lantismanta nin: “Ninrisniyoj kanku, manataj uyarinkuchu” nispa, chaytaqa tukuy reparanchik. Chayrayku, ¿imaraykutaq mana uyarikuq diosmanta mañakuna kanmanrí?

Kayta sutʼinchanapaq, Bibliapi Eliaspa kawsayninmanta qhawarina. Eliasqa, pichus chiqa Dios kasqanta yachanankupaq, Baalpa profetasninman diosninkumanta mañakunankuta nirqa, paypis Diosninmanta mañakunan karqa, chantá pichus uyarimuqqa chiqa Dios kasqanta rikuchinman karqa. Baalpa profetasninqa mañakuyta qallarirqanku. Sutʼiyaymantapacha chawpi pʼunchaykama, manataq ni “pipis kutichej nitaj uyarejpis karqachu” (1 Reyes 18:29). ¿Kikillantataqchu Eliaspa mañakuyninwan kanman karqa?

Mana. Imaraykuchus Elias mañakuyninta tukusqantawan, nina uraykamuspa, tukuy jaywanasta jukllata Dios qʼulaykurqa. Eliaspa mañakuynin, Baalpa profetasninpa mañakuyninwan, ¿imaraykutaq mana kikinchu karqa? Kay tapuyta kutichinapaqqa, Eliaspa mañakuyninta qhawarina 1 Reyes 18:36, 37 pʼitispi. Kay mañakuyqa hebreo qallupi, kimsa chunka rimaykunalla kanman karqa, chaypitaq kimsa kutita Diospa sutin rikhurin. Eliastaq kimsa kutita Jehová nispa mañakurqa.

Baal sutiqa, “patrón” chayri “dueño” niyta munan. Payqa cananeospa diosnin karqa, sapa lugarpitaq tukuy imaymanamanta riqsichikuq. Jehová sutitaq, mana jinachu, imaraykuchus payqa kʼata, paylla chay sutiwanqa sutichachikunman. Chayrayku llaqtanman nirqa: “Ñoka Jehová cani, chayka sutiymin. Mana wajman gloriayta konichu”, nispa (Isaías 42:8, Quechua de Cuzce).

Eliaspa, Baalpa profetasninpa, mañakuyninkuta juk dioslla uyarinanta, ¿suyasunmanchu? Mana. Baalta yupaychanankupaqqa, runasta qʼulachiq kanku, tukuy laya lantista yupaychaq kanku, runastataq mana allin ruwaykunaman tanqaq kanku. Jehovata yupaychanapaqtaq maychus kaqmanjina ruwakuq, manataq ni pitapis saqra ruwayman tanqakuqchu. Chayrayku, Jehovamanta mañakuykunataqa, Baalqa mana jaykʼaq uyarinmanchu karqa. Juk sumaqpaq qhawasqa, amigonchikman  juk cartata apachichkasunmanjina, amigonchikman chayananmantaqa, juk saqra runaman chayanmanjina, ¿allinchu kanman? Mana, ¿icharí?

Jehovamanta mañakuqkunaqa, kay Pachata Ruwaqmanta, tukuypaq Tatanmanta ima mañakuchkanku. * Profeta Isaiasqa juk mañakuypi Jehovaman nirqa: “Qanlla Tataykoqa kanki”, nispa (Isaías 63:16). Jesuspis, discipulosninman nirqa: “Tatayman, Tataykichejman, Diosniyman, Diosniykichejmantaj wicharishani”, nispa (Juan 20:17). Jehovaqa, Jesuspa Tatan, Diosnin ima, paymanta Jesús mañakurqa, discipulosninpis payllamantataq mañakunanku karqa (Mateo 6:9).

Chaywanpis, Bibliaqa Jesusmanta, Mariamanta, santosmanta, angelesmanta ima, ¿mañakunanchiktachu niwanchik? Mana. Bibliaqa Jehovallamanta mañakunanchikta niwanchik. ¿Imaraykú? Imaraykuchus mañakuyqa yupaychaywan ninakun, Bibliataq Jehovallata yupaychanata niwanchik (Éxodo 20:5). Chantapis, salmista Jehovamanta nin: “Qan uyarinki mañakususqankuta”, nispa (Salmo 65:2). Arí, Jehová wakin ruwaykunata wakkunawan ruwachispapis, mañakuykunataqa pay kikin uyarin.

Chayrayku, Jehová mañakuyninchikta, uyarinanpaq paymanta mañakunanchik tiyan. Biblia niwanchik: “Pillapis Señorpa sutinta” Jehova, nispa uqhariqqa salvasqa kanqa (Hechos 2:21). ¿Ninayanchu chay, paymanta mañakuptinchik, tukuy mañakuykunata uyarisqanta? Chayri, ¿wak imastawanraqchu ruwana tiyan?

[Sutʼinchaynin]

[5 paginapi dibujo/foto]

Elias rikuchisqanmanjina Dios mana tukuy mañakuykunatachu uyarin