Ñawiriqkuna yachayta munanku

¿Jehovamanta sutʼinchaqkuna milagroniqta sanoyachinkuchu?

▪ Jehovamanta sutʼinchaqkunaqa, ni jaykʼaq milagroniqta runasta sanoyachinkuchu. Jesusjina Diospa Reinonmanta willayta ñawpaqman churanku. Astawanpis chiqa cristinosqa mana milagrosta ruwasqankuraykuchu riksichikunku, manachayqa puraqmanta munanakusqankurayku.

Ñawpa tiempopiqa, Jesús unqusqa runasmanta khuyakusqanrayku sanoyachirqa. Chayta yachayqa may sumaqpuni, imaptinchus Pay Diospa Reinonpi kamachichkaptin, mana pipis “onqosqa kani” ninqachu. Kaytaq juntʼakunantapuni yachachiwanchik (Isaías 33:24).

Milagroniqta kay tiempopi thañichiqkunamanta, ¿imatá nisunman? Llulla religionesmanta thañichiqkunaqa, milagroniqta runasta jampisqankuta ninku. Chayrayku Jesús sutinpi ‘achkha milagrosta’ ruwaqkuna rikhurimunankuta nirqa, chantá paykunaman jinata kutichinanta nillarqataq: “Ni jaykʼaj qankunata rejserqaykichejchu. Chinkaychej ñawpaqeymanta, sajrata ruwajkuna”, nispa (Mateo 7:22, 23). Chay milagroniqta thañichiykunata, ¿Dios allinpaqchu qhawan?

Bibliapi ñawirispa, Jesús runasta thañichisqanta, kay tiempopi thañichiqkunawan kikinchana. Jinamanta kay tiempopi sanoyachikuchkasqanta Diospa atiyninwanchus manachus, ruwakuchkasqanta reparasunchik.

Ñawpaqta nisunman, Jesusqa ni jaykʼaq atiyninta apaykacharqachu runasta discipulosninman tukuchinanpaq chayri runasta tantananpaq. Chayrayku wakin milagrostaqa mana runas rikunankupaqjina ruwarqa. Astawanpis pikunatachus thañichirqa, mana willakunankuta nirqa (Lucas 5:13, 14).

Chaymantapis Jesús, runasta sanoyachisqanrayku ni jaykʼaq qullqita mañarqachu (Mateo 10:8). Astawanpis payman, tukuy unqusqa runas riqkunataqa thañichiq. Jesusqa chiqamantapuni sanoyachirqa, mana achkha chayri pisi iñiyniyuq kasqankuraykuchu (Lucas 6:19; Juan 5:5-9, 13). ¡Wañusqastapis kawsarichimurqa! (Lucas 7:11-17; 8:40-56; Juan 11:38-44.)

Jesús milagrosta ruwaspapis, mana runas qhipanta rinankupaqchu ruwarqa, nitaq jatunchakuyta munasqanraykuchu, chayrayku mana mayta qhaparispachu thañichirqa. Jesusqa Diospa Reinonmanta willananpaq kachamusqa karqa. Chayrayku discipulosninta wakichirqa, wak runasman yachachisqasninman tukuchimunankupaq, Diospa Reinollanpi runas mana unquspa kawsanankuta yachachimunankupaq ima (Mateo 28:19, 20).

Ñawpa tiempopi wakin cristianosqa sanoyachinankupaq atiyta japʼirqanku, chaywanpis chayqa tukukurqa (1 Corintios 12:29, 30; 13:8, 13). Kay tiempopi chiqa cristianosqa, mana runasta sanoyachisqankuraykuchu riksichikunku, manaqa puraqmanta munanakuspa jukchasqa kasqankurayku (Juan 13:35). Chiqa cristianos jukchasqa familiajina kawsanankupaq, ni ima milagropis kanchu

Jehovamanta sutʼinchaqkunaqa, munakuyninkurayku jukchasqa kachkanku, hermanosninkuta, runa masinkuta ima, mana llakichinkuchu, ni maqanakuykuna kaptinpis. Tukuy pachantinpi Cristojina munakuyninkuta rikuchisqankurayku riqsichikunku. Tukuy laya runas jukchasqa kasqankuwanqa, ni ima milagrowanpis kikinchakunmanchu. Kayqa Diospa espíritu santo atiynillanwan ruwakuyta atin. Jehovamanta sutʼinchaqkunap tantakuyninpi chayta rikuwaq, ¿manachu rinaykipaq kallpachakuwaq?

[31 paginapi dibujo/foto]

Milagroniqta thañichiqkunata, ¿Dios allinpaqchu qhawan?