Wawasta yachachinapaq

Pakasqa yachay willanapaq

¿MUNAWAQCHU juk pakasqa yachayta willarisunayta? *... Willarisqayki. Bibliaqa, Diospa “pakasqa” yachaynin kasqanta nin, kaytaq “unay watas[ta] pakasqa” karqa (Romanos 16:25). Qallariypitaq Jehová Dioslla chaymanta yacharqa. Kunantaq imatachus runas yachanankupaq ruwasqanta qhawarina.

Qallarinapaq, ¿imachus Diospa pakasqa yachaynin kasqanta yuyarinkichu?... Diospa pakasqa yachayninqa may valorniyuq, santo, llimphu, mana chʼichiyuqtaq. Diosninchik santo, mana chʼichiyuq kasqanrayku, pakasqa yachayninpis jinallataq. Chayrayku Diospa “pakasqa” yachaynin kasqanta nikun. ¿Yachankichu pikunachus kay pakasqa yachaymanta yachayta munasqankuta?... ¡Ángeles yachayta munarqaku! Bibliapi qhawarina, jinata nin: “Chay imastaqa angelespis anchatapuni rikuyta munallankutaj”, nispa (1 Pedro 1:12).

Jesuspis chay pakasqa yachaymanta yachallarqataq, chayrayku ñawpaqta sutʼincharqa. Kay Pachaman jamusqanpi discipulosninman willarqa. Nirqataq: “Qankunaqa rejsinkichijña chay Diospa pakasqa reinomanta”, nispa (Marcos 4:11, Qheshwa Biblia). ¿Imamantachus Diospa pakasqa yachaynin parlachkasqanta reparankichu?... Diospa Reinonmanta parlachkan, mayqinmantachus Jesús, Jehovamanta juk kamachiqta mañakunanchikta yachachiwarqanchik (Mateo 6:9, 10).

Rikunchikjina, Diospa Reinonqa may chhika tiempota pakasqa karqa. Adanwan, Evawan Edén huertamanta wikchʼuchikusqankumantapacha, Jesús jamunankama mana sutʼinchakurqachu, Diospa kamachisninqa chay Reinonmanta mana sumaqta yacharqankuchu. Jehová kay Pachata sumaq huertaman tukuchinallanta yacharqanku (Génesis 1:26-28; 2:8, 9; Isaías 45:18). Paykunamanta wakinqa Diospa Reinon kamachimuptin kay Pachapi sumaq kawsay kananmanta qillqarqanku (Salmo 37:11, 29; Isaías 11:6-9; 25:8; 33:24; 65:21-24).

¿Pitataq Dios akllarqa chay Reinopi kamachinanpaq? ¿Yachayta munawaqchu?... Churin Jesucristota akllarqa. Bibliaqa, Jesús atiyta japʼinanta nin, “allin Kawsayta Apamoj Rey” kananpaq (Isaías 9:6, 7). Chayrayku allin kanman qampis, ñuqapis, “yachayta japʼeqaspa, sumajta rejsi[nanchik] Diospa pakasqa yachayninta: Chayqa Cristomin” (Colosenses 2:2). ¿Imatataq Cristomanta yachakunanchik tiyan? Qallarinapaq Diosqa, janaq pachapi ñawpaq angelta ruwasqanta, runajina paqarikunanpaq, Mariap wiksanman churarqa. Chay Churintaq kawsayninta ñuqanchikrayku qurqa, wiñaypaq kawsananchikpaq (Mateo 20:28; Juan 3:16; 17:3).

 Diospa pakasqa yachayninmanta astawan willarisqayki: Diosqa janaq pachapi qharis, warmis ima, Jesuswan khuska kawsanankuta nirqa. ¿Imatataq janaq pachapi ruwanqanku?... Cristowan khuska kamachinqanku (Efesios 1:8-12).

Cristowan khuska kamachimuqkunamanta pikunachus wakin kasqankuta, ¿yachayta munawaqchu?... Chaykunamanta wakinqa apóstoles kanku, imaraykuchus Jesús paykunapaq janaq pachapi juk chiqata wakichinanta nirqa (Juan 14:2, 3). Bibliapi Mateo 10:2-4; Marcos 15:39-41; Juan 19:25, pʼitista ñawirispa, Diospa Reinonpi wakin kamachimuqkunap sutisninta yachawaq.

¿Machkha runastaq janaq pachaman rinqanku?... May chhika watasta, ni pi yachasqanrayku pakasqa yachayllataq karqa. Kunantaq yachanchikña. Biblia 144.000 runas kasqankuta niwanchik (Apocalipsis 14:1, 4).

“Diospa pakasqa reinomanta”, ¿imatá niwaq? ¿Kaymanta yachayqa sumaqcharí?... Chayrayku, ¿manachu allin kanman yachakunallaykipuni? ¡Jinata yachakuspaqa wak runasman willayta yanapawanki!

[Sutʼinchaynin]

TAPUYKUNA:

▪ ¿Imataq pakasqa yachay, chantá imaptintaq ajina sutichakun?

▪ ¿Imamantá kay pakasqa yachay sutʼinchan, chantá pi ñawpaqta willarqa?

▪ ¿Imastá kay pakasqa yachaymanta yuyarikunki?

▪ ¿Imaynatá amigosniykiman kay pakasqa yachaymanta sutʼinchawaq?

[24 paginapi dibujo/foto]

¿Imamantá ángeles yachayta munarqanku?