Bibliap yachachiykunasnin

¿Imataq Diospa Reinonrí?

Kay yachaqanaqa tapuykunasniykiman Bibliaykipi kutichiykunasta tarinaykipaq yanapasunqa. Munaptiykiqa Jehovamanta sutʼinchaqkunawan kay yachaqanata ukhunchayta atiwaq.

1. ¿Imataq Diospa Reinonrí?

Janaqpachamanta juk gobierno, mayqinchus tukuy kamachiqkunata chinkachinqa chantá janaqpachapijina Diospa munayninta Jallpʼapi ruwanqa. Tukuypis Diospa Reinon kamachinanta necesitanchik. (Daniel 2:44; Mateo 6:9, 10 ñawiriy.)

Imaynatachus juk gobierno juk kamachiqta necesitan, kikillantataq Diosqa Reinonpi kamachinanpaq Churinta akllan. (Lucas 1:30-33 ñawiriy.)

2. ¿Imaraykutaq Jesús juk sumaq kamachiq?

Imaraykuchus Diospa Churinqa khuyakuyniyuq, chiqan kaqta ruwaq chantapis runasta yanapananpaq atiyniyuq (Mateo 11:28-30). Jesús kawsarimuytawan janaqpachaman wicharirqa, kamachinan tiempo chayamunankama (Hebreos 10:12-14). Diospa pañanman tiyaykukurqa, kamachinanpaq atiyta japʼinankama. (Daniel 7:13, 14 ñawiriy.)

3. ¿Jesuswan wak runas kamachinqankuchu?

Bibliaqa Diospa kamachisninmanta juk qutulla Jesuswan kamachinanta niwanchik. Daniel 7:27 akllasqas chayri santos nispa sutichan. Diosqa Jesuspa apostolesninta ñawpaqta akllarqa santos kanankupaq. Jehová creeyniyuq qharista, warmista ima akllachkallanpuni santos kanankupaq. Jesusjina wañuytawan janaqpachaman ripunku, espiritusjina kawsanankupaq. (Juan 14:1-3; 1 Corintios 15:42-45 ñawiriy.)

Janaqpachaman, ¿machkhataq rinqanku? Jesusqa “juchʼuy tropa”, nispa suticharqa (Lucas 12:32). Paywan khuska kay pachata 144.000 kamachinqanku. (Apocalipsis 5:9, 10; 14:1 ñawiriy.)

  4. ¿Maykʼaqtaq Diospa Reinon kamachiyta qallarirqa?

Jesusqa 1914 watapi kamachiyta qallarirqa. * Pisi tiemponman janaqpachamanta Satanasta, supaykunata ima, kay Pachaman wikchʼumurqa (Apocalipsis 12:7-10, 12). Chaymantapacha chʼampaykuna kay pachapi yapakullanpuni. Jatuchaq maqanakuykuna, jallpʼa ikhakuykuna, unquykuna, yarqhaykuna, saqra ruwaykuna ima, kay pacha tumpamantawan tukukunanta rikuchiwanchik (2 Timoteo 3:1-5). Reinop bendicionesninta japʼiyta munaqkuna, Jesuspa qhipanta rinanku tiyan. (Lucas 21:7, 10, 11, 31, 34, 35 ñawiriy.)

5. ¿Imatá Diospa Reinon ruwanqa?

Jallpʼantinpi willakusqan, tukuy suyusmanta may chhika runasta Diosta riqsinankupaq yanapanña (Mateo 24:14). Astawanraq ruwanqa, kay saqra pachata chinkachinqa chantapis Jesusman chiqa sunqu kasqankurayku “may chhika runasta” salvanqa. (Apocalipsis 7:9, 10, 13-17 ñawiriy.)

Waranqa wataspi Jallpʼata tʼika pachaman tukuchinqa. Chaymantataq Jesús, Tatanman kamachiyninta kutichipunqa (1 Corintios 15:24-26). Kay Reinomanta wakkunaman willayta, ¿munawaqchu? (Salmo 37:10, 11, 29 ñawiriy.)

Astawan yachakuyta munaspaqa, kay ¿Imatapunitaq Biblia yachachin? librop 8 chantá 9 yachaqanasninta ñawiriy. Kaytaqa Jehovamanta sutʼinchaqkuna urqhunku.

[Sutʼinchaynin]