¿Imaynatá yachachina? Sumaq yanapaykuna

“Kay tukuy ima nisqayta sumajta sonqoykichejpi japʼiychej. Sapa kuti wawasniykichejman yachachinkichej. Kay kamachisqasmanta willaychejpuni wasiykichejpi, jinallataj ñampi purishaspapis, chantá puñunapaj siriykushaspapis, jatarishaspapis.” (DEUTERONOMIO 6:6, 7)

TATASQA wawasninkuta ichapis mana yachachiyta atillankuchu. Yuyaychaykunata maskʼaptinkutaq achkhata tarisqankurayku astawan iskaychakunku. Familiares, amigos ima mayta yuyaychayta munanku chantá librospi, revistaspi, Internetpi ima mana kikin yuyaychaykunatachu tarinku.

Bibliataq wawasta mana imatachus yachachinallatachu yuyaychawanchik, manaqa imaynatachus yachachinata. Bibliamanta patapi kaq pʼitis nisqanmanjina, tatasqa sapa pʼunchay wawasninkuman Diosmanta parlanankupaq kallpachakunanku tiyan. Kay yachaqanapi tawa yuyaychaykunata qhawasunchik, mayqinkunachus may chhika tatasta yanaparqa.

1. Diospa ruwasqasninta rikuchina. Apóstol Pablo qillqarqa: “Diospa mana rikukoj imasnenqa sutʼita rikuchikunku paypa ruwasqasninnejta, kay pacha ruwakusqanmantapacha. Chaykunaqa kanku: Wiñay atiynin, Dios kasqan ima” (Romanos 1:20). Tatasqa wawasninkuta Dios kasqantapuni rikuchinkuman ruwasqasninta qhawachispa chantá kʼacha kaykunasninpi tʼukurichispa ima.

Jesusqa chayjinamanta discipulosninta yachachirqa. Sutʼincharinapaq, kayta nirqa: “Qhawariychej phawaykachaj pʼisqosta. Paykunaqa mana tarpunkuchu, nitaj ruthunkuchu, nillataj pirwaspipis jallchʼankuchu. Chaywampis janaj pachapi kashaj Tataykichej paykunataqa mikhuchin. Manachu qankunaqa aswan munasqa kankichej pʼisqosmanta nisqaqa?” (Mateo 6:26). Ajinamanta Jehovap munayninta, khuyakuyninta ima rikuchichkarqa, chantapis Dios kʼacha kaykunasninta imaynatachus wawasninman rikuchisqanpi tʼukurichirqa.

Diospa jatun yachayninmanta parlaspa kamachiq Salomonqa, imaynatachus Dios chhakasman yachayta qusqanmanta nirqa: “Qhella runa, chhakasta qhawariy; qhaway imatachus ruwasqankuta, chantá yachaqakuy. Chaykunaqa ni pi kamachishajtin, ni  pi imatachus ruwanankuta nishajtin, mikhunata qʼoñi tiempopi tantanku, cosechapi mikhunata waqaychanku” (Proverbios 6:6-8). Jinamanta rey Salomonqa kawsayninchikpi imatapis ruwayta munaspaqa tarinanchikkama kallpachakunanchikta niyta munachkarqa.

¿Imaynatá tatas Jesusjina, Salomonjina, wawasniykichikta yachachiwaqchik?, 1) ima plantaschus, uywaschus gustasqanta tapuriwaqchik, 2) chaykunamanta astawan ukhunchariwaqchik chantá 3) kaykuna imatachus Diosmanta yachachisqanta wawasniykichikwan parlariychik.

2. Jesusjina wakkunata qhawana. Tukuy runasmanta nisqaqa ni pipis Jesusjina yachachirqachu. Chaywanpis payqa tiempochakuq tapuykunasta ruwananpaq ajinamanta imatachus yuyasqankuta, sientesqankuta ima yachaq (Mateo 17:24, 25; Marcos 8:27-29). Tatas wawasninkuman achkha imasta yachachiyta atinku, Jesusjina ruwankuman allinmanta yachachinankupaq, sutʼimanta wawas parlarinankupaqtaq kallpacharinkuman.

Wawas mana kikintachu yuyaptinku chayri mana yachakuyta atiptinku, ¿imatataq ruwana? Jesús imaynatachus apostolesninman yachachisqanta qhawariychik. Wakin kutispi paykuna kikin churanakuq kanku chantá imaraykuchus llampʼu sunquyuq kanankuta mana entienderqankuchu. Chaywanpis Jesusqa imatapis ruwanankupaq llampʼu sunquwan, pacienciawan ima yachachillaqpuni (Marcos 9:33, 34; Lucas 9:46-48; 22:24, 25). Jesusjina tatasqa pacienciawan wawasninkuta kikin yachachiymanta sapa kuti yachakunankukama parlallankupuni.

3. Ruwayniykichikwan yachachiychik. Tatasqa apóstol Pablo imatachus Romapi tiyakuq cristianosman qillqasqanta qhawarispa allinta ruwanku: “Qanqa wajkunaman yachachishaspa, ¿manachu qan kikiykita yachachikunki? Wajkunaman mana suwana kasqanta willashaspa, qanrí, imaraykutaj suwanki?” (Romanos 2:21).

Kay pʼiti nisqanqa chiqa, imaraykuchus wawas imatachus tatasninku ruwasqankuta astawan qhawanku, parlasqankumanta nisqaqa. Chayrayku tatas nisqankumanjina ruwaptinku, wawasqa astawan kasukunku.

4. Wawamantapacha yachachina. Timoteo, pichus apóstol Pablop compañeron karqa, paymanta allinta parlaq kanku (Hechos 16:1, 2). Imaraykuchus payqa “wawamantapacha yachaqakuyta qallarerqa[...] Diosmanta Qhelqasqata”. Maman, jatun maman ima Diospa Palabranta ñawiripuq kanku chantapis chiqa kaqta yachakunanpaq yanapaq kanku (2 Timoteo 1:5; 3:14, 15).

¿Maypitaq yanapa tiyan?

Jehovamanta sutʼinchaqkuna wawasta Diosmanta chiqa kaqta yachachinapaq achkha publicacionesta urqhunku. Wakinkunaqa wawaspaq, wakinkunataq waynas, sipaskuna ima, tatasninkuwan parlarinankupaq ruwakun. *

Wawasman Diosmanta parlanapaqqa mana kutichiy atina tapuykunasta riqsina tiyan, ajinamanta imatapis tapukuptinku kutichiyta atinqanku. Sutʼincharinapaq, ichapis kay tapuykunata ruwasunkuman, ¿imaraykutaq Dios ñakʼariy kananta saqin? ¿Imatataq Jallpʼapaq munan? Chantá, ¿maypitaq wañusqas kachkanku? Jehovamanta sutʼinchaqkuna imaynatachus kay tapuykunaman kutichinaykipaq yanapasunqanku, ajinamanta familiaykiwan khuska Diosman qayllaykunkichik (Santiago 4:8).

[Sutʼinchaynin]