Diosman qayllaykuy

¿Jehová Dios rumi sunquchu?

JINA kaptin, ¿ruwasqanchik kusichinmanchu chayri llakichinmanchu? Ñawpa watasmanta yachaysapa runas, Diosta ni pipis kusichinmanchu chayri llakichinmanchu nirqanku, imaraykuchus paytaqa mana imapis interesanchu nispa. Bibliaqa mana chaytachu yachachin, astawanpis Dios imatachus ruwasqanchikmanta kusikusqanta chayrillakikusqanta niwanchik. Kay Salmo 78:40, 41 pʼitista ukhuncharina.

Kay salmo 78, ñawpa tiempomanta israelitaspa ruwasqankuta Jehová imaynatachus qhawasqanta sutʼinchawanchik. Jehová israelitasta Egiptomanta kacharichisqantawan, juk Tratota ruwananta nirqa, payllata kasunankupaq. Kamachiykunasninta kasukuspa “uj sumaj ayllu[man]” tukunkuman karqa, Paytaq munayninta juntʼananpaq yanapanman karqa. Israelitas kasunankuta nisqankuwan, ¿juntʼarqankuchu? (Éxodo 19:3-8.)

Salmista nin: “Mashkha kutista Diospa contrampi sayaykorqanku, chʼin pampapi[...]”, nispa (40 pʼiti). Chantá “Watejmanta Diosta pruebaman churallarqankutaj” (41 pʼiti). Salmista ninjina, israelitasqa sapa kuti contranpi uqharikullaqpuni kanku. Egiptomanta kacharichisqa kasqankutawan, chʼin pampapi kachkaptinku uqharikuyta qallarirqanku. Chaypitaq Diospa contranpi rimarqanku, mana atiyniyuq, nitaq jarkʼayta atisqanta nispa (Números 14:1-4). Wak qallusman Bibliata tikrachiqkunapaq libropi nin: “Contrampi oqhariku[rqanku]”, nispaqa “Diospa contranpi sunqunkuta rumiyachisqankuta” chayri “Diosta qhisachasqankuta” niyta munachkarqa. Chaywanpis Diosqa pesachikuptinku khuyakuyninta rikuchillaqpuni. Jinapis sapa kuti contranpi uqharikullaqpuni kanku. Kaytaq mana tukukuqchu (Salmo 78:10-19, 38).

¿Imaynatá llaqtan sapa kuti wasanchasqanmanta, Jehová sientekurqa? Kay 40 pʼiti “phiñacherqanku” nin. Wak Bibliapitaq Diosta “llakichirqanku”, nin: Kay pʼitimanta parlaspa wak libro nillantaq “imaynatachus juk wawa tatanpa contranpi uqharikuspa mayta sunqunkuta nanachin, kikillantataq hebreosqa Diosta llakichirqanku”, nispa. Imaynatachus mana kasukuq wawa tatasninta mayta sunqunkuta nanachin, kikillantataq israelitasqa “santo Diosnimpa sonqonta nanacherqanku” (41 pʼiti).

¿Imatá kay salmo yachachiwanchik? Jehová kamachisninta mayta munakusqanta chantá ni jaykʼaq chinkachisqa jinatachu qhawasqanta. Kayta yachayqa mayta kallpachawanchik. Imaraykuchus Jehová sunqunta nanachikusqanta chantá ruwasqanchikpis llakichiyta atisqanta rikuchiwanchik. Jehová imaynachus kasqanta yachaspa, ¿manachu allin kaqta ruwanapaq tanqawanchik?

Diospa sunqunta nanachinamantaqa, maychus kaqta ruwanapaq kallpachakuna, sunquntataq kusichina. Chayta ruwananchikta munan. Kay Proverbios 27:11 nin: “Yachayniyoj kay, wawáy, kusichiwankitaj”, nispa. Arí, Jehovap kamachisnin kusichiyta munaspa kasukusqankuqa, ima regalomantapis aswan sumaq.

[10 paginapi sutʼinchaynin]

Jehovap kamachisnin kusichiyta munaspa kasukusqankuqa, ima regalomantapis aswan sumaq