Bibliamanta yachakusqankuqa kawsayninkuta tikrachirqa

¿IMATAQ juk sipasta, tatasnin ima religionpichus uywasqankuman kutinanpaq yanaparqa? Qhawarina imatachus pay nisqanta.

“Manaña qhasipaqchu kawsakuni” (LISA ANDRÉ)

NACEKUSQAN WATA: 1986

SUYUN: LUXEMBURGO

ÑAWPAQ KAWSAYNIN: RUWASQANMANTA PESACHIKUN

ÑAWPAQ KAWSAYNIY: Bertrange llaqtitapi wiñakurqani, chay lugarqa qhapaq, llimphu, ni ima saqra kanchu, Luxemburgo llaqtap qayllanpitaq kachkan. Phichqa hermanos kayku, ñuqa aswan sullkʼa kani. Tatasniyqa, Jehovamanta sutʼinchaqkuna kanku, juchʼuysituykumantapacha Diospa leyesninta yachachiwarqayku.

Chaywanpis sipasyachkaptiy, Jehovamanta sutʼinchaqkunap yachachisqankumanta iskayrayarqani. Chayraykutaq creeyniyqa, llawchhiyarqa. Tatasniyqa, Diospa qayllanpi kanaypaq mayta yanapawarqanku, chaywanpis ñuqaqa mana saqikurqanichu. Chantá tatasniypa mana yachanallankuta, mana ni pita kasukuq waynaswan, sipaskunawan tantakuyta qallarirqani. Ñuqaqa paykunajina, munasqallayta ruwayta munarqani. Paykunawanqa, fiestamanta fiesta puriq kani, piwanpis qhariwarmijina puñuykullaq kayku, drogasman, alcoholman imataq qukuq kayku. Qallariypiqa, paykunawan kayta munaq kani, rikusqaymanjina kusisqa kawsaq kanku.

Chaywanpis ñuqaqa, mana kusisqachu kawsarqani. Imaraykuchus kawsayniyqa qhasi manakaq karqa. Amigosniyqa ni imamanta llakikuqchu kanku. Ñuqataq saqra ruwaykuna kasqanmanta llakikuq kani. Chayraykutaq sapa kuti sinchita llakikuq kani.

BIBLIAMANJINA KAWSAYNIYTA TIKRACHISQAY: Juk pʼunchay, 17 watasniyuq kachkaptiy, mamayqa, manchay llakisqa kachkasqayta reparaspa, Bibliamanta watiqmanta yachakunayta niwarqa. Yachakusqaymanjinataq kawsaytachus manachus akllanayta nillawarqataq. Chayta niwasqanqa mayta tʼukuchiwarqa. Chayraykutaq ñañay Caroline, qusan Akif ima, Bibliamanta yachachinawankuta munarqani. Akifqa, wiñay tukusqa kaspaña Jehovamanta sutʼinchaq kasqanrayku, paywan mana manchachikuspa parlayta atillaq kani.

Mana Jehovamanta sutʼinchaqjinachu kawsachkasqayta sumaqta yacharqani, chaywanpis  ruwasqasniy ni pita llakichichkasqanta yuyarqani. Chaywanpis Bibliamanta yachakusqayqa, ruwasqasniy Jehovap sunqunta nanachisqanta entiendenaypaq yanapawarqa (Salmo 78:40, 41; Proverbios 27:11). Chantapis wakkunap sunqunkutapis nanachichkasqayta reparallarqanitaq.

Bibliata astawan ukhunchaspa, Diospa Palabranpuni kasqanta repararqani. Sutʼincharinapaq, Bibliap achkha profeciasninmanta yachakurqani, chay profeciasqa maychus kaqmanjinapuni juntʼakusqanku. Chaytaq manaña iskayrayasqa kanaypaq yanapawarqa.

Juk watatajinaña Bibliamanta yachakuchkaptiy, tatasniywan kuraq hermanoyta waturiq rirqayku, payqa Alemania suyupi Jehovamanta sutʼinchaqkunap sucursalninkupi llamkʼachkan. Payta manchay kusisqata rikuspataq mayta kusikurqani. ¡Chayjina kusisqa kayta maskʼachkarqani! Chantapis chaypi llamkʼaqkunata kusisqasta rikuspa mayta tʼukurqani. Imaraykuchus paykunaqa, mana amigosniyjinachu karqanku. Pisi tiemponmantaq Diosman juk mañakuypi, “munayninta ruwanaypaq kawsanayta” nirqani. Chunka jisqʼunniyuq kachkaspataq bautizakurqani, Jehovaman qukusqayta rikuchinaypaq.

BENDICIONESTA JAPʼISQAY: Kunanqa manaña qhasipaqchu kawsani. Chantapis runasman Bibliamanta, Diosmanta, imatachus aswan qhipaman ruwananmanta ima yachachispa, mayta kusikuni. Familiaypis may kusisqa kachkan, imaraykuchus manaña ñuqa llakichinichu.

Niraq Diosman qukuchkaspa, manchay saqra imasta ruwarqani, chaywanpis chaykunapi mana anchata yuyanichu. Astawanpis Jehová, juk perdonaq Dios kasqanpi, mayta munakuwasqanpi ima yuyani. Tukuy sunquywan Proverbios 10:22 nisqanta nini, chaypi nin: “Tata Diospa bendicionnenqa qhapajyachin, nitaj ima llakiytapis chay bendición apamunchu”, nispa.

[29 paginapi sutʼinchaynin]

“Paykunawanqa, fiestamanta fiesta puriq kani, piwanpis qhariwarmijina puñuykullaq kayku, drogasman, alcoholman imataq qukuq kayku”

[30 paginapi sutʼinchaynin]

“Niraq Diosman qukuchkaspa, manchay saqra imasta ruwarqani, chaywanpis chaykunapi mana anchata yuyanichu”