Armagedonmanta: ¿imatá Biblia yachachin?

“Supay espiritus[qa], [...] tukuy kay pachapi reyespaman rinku, paykunata tantamunankupaj [...] hebreo parlaypi Armagedón nisqa cheqapi.” (Cursivas nuestras; APOCALIPSIS 16:14, 16.)

WAKIN kuti, “Armagedón” rimayta oqharinku, uj lugarpa sutinmanta parlanapaj. Chaywanpis Jallpʼapi, uj lugar chay sutiwan mana kaspa jinanchu.

Chantá chay rimay, ¿imatapuni niyta munan? ¿Imaraykutaj chay rimayta uj jatun maqanakuywan kikinchakun?

Armagedón nisqa cheqapi tantakorqanku

Hebreo qallupi Har-Magedón rimayqa, “Meguido Orqo”, niyta munan. Manapis ni jaykʼaj uj orqo chay sutiwan karqachu, chaywanpis uj cheqa Meguido sutiwan kan. Chay lugartaj ñaupa tiempomanta Israel llajta tiyakoj chaynejpi tarikun. Chay lugarpeqa, ashkha jatuchaj maqanakuykuna ruwakoj, chayraykutaj Meguido rimayta maqanakuywan kikinchakun. *

Chaywanpis, Meguido lugarpeqa, imaraykuchus maqanakusqankumanta aswan allin kanman yachananchej, mana ima maqanakuykunapichus maqanakusqankutachu. Meguidoqa, Jehová israelitasman Sumaj  Jallpʼata qosqanmanta ujnin lugar karqa (Éxodo 33:1; Josué 12:7, 9-24). Jehovaqa, llajtanta nisqanman jina enemigosninmanta jarkʼarqa (Deuteronomio 6:18, 19). Sutʼincharinapaj, Meguido lugarpi kamachej cananeo Jabinpa makinmanta, soldadosninpa kamachejnin Sisaraj makinmanta ima librarqa (Jueces 4:14-16).

“Armagedón” nisqamanta parlaspaqa, mana mayqen maqanakuy jinallachu kasqanta parlashanchej, manaqa iskay atiyniyoj maqanakojkuna tinkunankumanta.

Bibliaj profeciasnenqa, pisi tiempomantawan Satanás, supaykunasnin ima, kamachejkunata, tukuy runasninta ima, Diospa llajtanwan maqanakunankupaj tanqanankuta nin. Chay maqanakupitaj ashkha runas wañonqanku, Dios enemigosninta atipajtin (Apocalipsis 19:11-18).

Bibliaqa, Dios “llampʼu sonqo, khuyakuyniyoj, pacienciayoj, munakuyniyoj” ima kasqanta nin. Jina kajtin, ¿imaraykú ashkha runasta wañuchenqa? (Nehemías 9:17.) Kayta allinta entiendenapaj kay kinsa tapuykunata qhawarina: 1) ¿Pitaj maqanakuyta qallarichenqa? 2) ¿Imaraykú Jehová chay maqanakupi, maqanakonqa? 3) Chay maqanakuy, ¿imatá Jallpʼapaj, runapaj ima apamonqa?

1. ¿PITAJ MAQANAKUYTA QALLARICHENQA?

Armagedón nisqa maqanakuytaqa, mana Dioschu qallarichenqa. Astawanpis Payqa, kʼacha runasta, chinkachiyta munaj sajra runasmanta jarkʼanqa. Chay maqanakuyta “tukuy kay pachapi [kaj] reyes[...]” nisunman kamachejkuna qallarenqanku. Imaraykuchus paykunataqa, Satanás, Jehová Diospa llajtanwan mana khuyarikuspa churanakunankupaj tanqanqa (Apocalipsis 16:13, 14; 19:17, 18).

Kay tiempopi wakin suyuspeqa, tukuy runas religionniyoj kanankupaj, parlanankupaj derechoyoj kasqankuta jatunpaj qhawakojtinpis, kamachejkuna ima religiontapis qhatiykachananku, ñakʼarichinanku ima ichá mana creenapaj jina kanman. Chaywanpis 1.900 wata chaynejmantapacha kunankama religionesta mayta qhatiykachallankupuni, ñakʼarichillankupuni. * Jina kajtinpis Armagedón nisqa maqanakuypi imaschus kanqa iskaynejmanta  qhawarina. Diospa enemigonqa, Jehovaj llajtanta Jallpʼantinpi qhatiykachanqa. Chantá Jehová Diosqa, mana jaykʼaj jina tukuy enemigosninta kay pachaj ujnin kantunmanta ujnin kantunkama wañuchenqa (Jeremías 25:32, 33). Chay maqanakuyta Bibliaqa, “Tukuy Atiyniyoj Diospa [...] jatun pʼunchaynin[...]”, nispa sutichan.

2. ¿IMARAYKÚ JEHOVÁ CHAY MAQANAKUPI, MAQANAKONQA?

Jehovaqa, kamachisninta, enemigosninkuwan mana maqanakunankuta, astawanqa munakunankuta nin (Miqueas 4:1-3; Mateo 5:43, 44; 26:52). Chayrayku enemigosninku mana khuyarikuspa qhatiykachashajtinku, Diospa kamachisnenqa ni imatapis ruwanqankuchu jarkʼakunankupaj. Jehová Dios llajtanta mana jarkʼanmanchu chayqa, manapis munakuyniyojchu, manapis atiyniyojchu jina kanman, ¿icharí? Chayrayku Diosqa, sutinrayku paypaj tʼaqasqa kajkunata mana qonqanqachu (Salmo 37:28, 29).

Diosqa, mana pitapis chinkachiyta munasqanrayku, tukuy runasta payman kutirikunankuta nin (2 Pedro 3:9). Bibliamanta ashkha capítulos, ñaupa tiempopi Jehová enemigosninta llajtanwan churanakojtin chinkachisqanta ninku (2 Reyes 19:35). Chantapis Bibliaqa, aswan qhepaman Satanás, paywan tukuy kajkuna, Diospa llajtanwan churanakojtinku, Dios tukuy atiyninwan llajtanta jarkʼananta nillantaj. Cheqamantapuni may unayña Bibliaqa, Dios sajra runasta chinkachinanta nerqa (Proverbios 2:21, 22; 2 Tesalonicenses 1:6-8). Diospa llajtanwan churanakuyta qallarej enemigosqa, Tukuy Atiyniyoj Diospa contranpi maqanakuyta qallarisqankuta reparanqanku (Ezequiel 38:21-23).

3. CHAY MAQANAKUY, ¿IMATÁ JALLPʼAPAJ, RUNAPAJ IMA APAMONQA?

Armagedón nisqa maqanakuyqa, ashkha runasta salvanqa. Chaymantataj Jallpʼapi allin kausay qallarenqa (Apocalipsis 21:3, 4).

Apocalipsis libroqa, chay maqanakuypi ‘may chhika runas’ mana wañunankuta nin (Apocalipsis 7:9, 14). Chay runasqa, Diospa kamachiyninpi, Jallpʼata uj paraisoman tukuchenqanku, imaynatachus Jehová qallariypi munarqa jinaman.

Chay maqanakuy, ¿maykʼajtaj Diospa llajtanpa contranpi qallarenqa?

[Sutʼinchaykunasnin]

[6 paginapi dibujo/foto]

Jehová Diosqa, ñaupa tiempopi llajtanta enemigosninmanta jarkʼarqa

[7 paginapi dibujo/foto]

Jehová Diosqa, Armagedón maqanakuypi watejmanta llajtanta jarkʼanqa