Kay yachaqanaqa, tapuykunasniykiman Bibliaykipi kutichiykunasta tarinaykipaj yanapasonqa. Munajtiykeqa Jehovamanta sutʼinchajkunawan kay yachaqanata ukhunchayta atiwaj.

1. ¿Imaynatá Jesús wañuyninta yuyarinanchejta nerqa?

Jesusqa, discipulosnin wañuyninta yuyarinankuta kamacherqa, uj cenapi tʼanta, vino jaywaspa. Tʼantaqa cuerponwan, vinotaj yawarta jichʼasqanwan kikinchakun. (Lucas 22:19, 20 leey.)

Jesús tʼantata discipulosninman jaywasqanqa, mana levadurayoj karqa. Bibliapi levadura, juchawan ninakun. Jinamanta mana levadurayoj tʼantaqa, mana juchayoj Jesuspa cuerpon niyta munarqa. Jesús aycha cuerponta jaywasqanmantapacha, manaña Moisesman leypi qokusqanman jinachu uywa wañuchisqata jaywakunan karqa (Hebreos 10:5, 9, 10). Vinoqa, Jesuspa yawarninwan ninakorqa, imaraykuchus yawarninta juchasninchejrayku jichʼan. (1 Pedro 1:19; 2:24; 3:18 leey.)

2. ¿Maykʼajtaj Jesuspa wañuyninta yuyarinanchej tiyan?

Jesús, Pascuapi nisán killapi 14 pʼunchaypi wañorqa. Judiospajqa, uj pʼunchay Inti yaykusqantawan qallarej. Jesusqa, nisán killapi 14 pʼunchaypi, Pascua mikhuyta apostolesninwan mikhorqa. Chantá Señorpa cenanta ruwarqa, wañupusqanta discipulosnin yuyarinankupaj. (Lucas 22:14, 15 leey.)

Kay tiempopi Diospa llajtanqa, Jesuspa wañuyninta yuyarinku. Imaraykuchus Jesusnejta, Dios wañuymanta, juchamanta ima runasta kacharichin (Éxodo 12:5-7, 13, 17). Judiosqa, Pascuata watapi uj kutillata ruwaj kanku, jinallatataj Jesuspa wañuyninta watapi uj kutillata yuyarikun, chaytataj nisán killapi 14 pʼunchaypi ruwakun Inti yaykusqantawan. (Juan 1:29 leey.)

  3. ¿Pikunataj tʼantata mikhuyta, vinota ujyayta atinku?

Jesús discipulosninman vinota jaywashajtin nerqa: “Kay copaqa mosoj tratomin, yawarniypi ruwasqa”, nispa (1 Corintios 11:25). Kay mosoj trato, israelitaswan ruwasqa tratoj cuentanmanta karqa, Jehovaqa, israelitasta qankunachus kasuwankichej chayqa, noqapaj uj sumaj ayllu kankichej nerqa (Éxodo 19:5, 6). Chaywanpis paykunaqa Jehová Diosta mana kasukorqankuchu, chayraykutaj Jehovaqa, uj mosoj tratota ruwarqa. (Jeremías 31:31 leey.)

Jehová mosoj tratota 144.000 runasllawan ruwarqa. Kay runasnetataj ashkha runasta mayta bendecenqa. Mosoj tratonejta, ashkha runas paraisopi wiñay kausayta japʼenqanku. Chantapis mosoj tratopi kajkunamanta wakin, Jallpʼapi Jehovata sirvishanku. Paykunalla mosoj tratopi kasqankurayku Jesuspa wañupuyninta yuyarinapaj tantakuypi tʼantata mikhunku, vino ima ujyanku. Kay mosoj tratoqa, Jesuspa yawarninwan sayachisqa karqa. (Lucas 12:32; Apocalipsis 14:1, 3 leey.)

4. Jesuspa wañuyninta yuyarinapaj tantakuyman riy, ¿yanapawanchejchu?

Jesuspa wañuyninta sapa wata yuyarisqanchejqa, Jehovaj jatun munakuyninta, jatunpaj qhawanapaj yanapawanchej. Munakuyninrayku Jehovaqa, Churinta juchasninchejrayku wañunanpaj kachamorqa. Jesuspa wañuyninta yuyarinapaj tantakuypi, Jesuspa wañuynin imatachus noqanchejpaj niyta munasqanpi, imaynatachus Jehovaman, Jesusman ima may agradecesqa kasqanchejta rikuchinanchejpi tʼukurinanchej tiyan. (Juan 3:16; 2 Corintios 5:14, 15 leey.)

Astawan yachakuyta munaspaqa, kay libroj, ¿Imatapunitaq Biblia yachachin?, 206-208 paginasninta leey. Kaytaqa Jehovamanta sutʼinchajkuna orqhonku.