TATASNIYKI paykunamanta mana karunchakunaykita, ¿maykʼajllapis nisorqankuchu? *... Ichapis chaytaqa, mana rejsisqa runaspa chaupinkupi kashasqaykichejrayku, jarkʼasuyta munasqankurayku ima nisorqanku. Ezequiasmanta parlarina, payqa “Tata Diostapuni qhate[j]”, manataj paymanta karunchakorqachu. Qhawarina imatachus paymanta yachakusunchej.

Ezequías wawa kashaspa mayta ñakʼarerqa. Tatanqa Judá llajtamanta kamachej karqa, sutikorqataj Ajaz. Kay reyqa, Jehovamanta karunchakorqa, lantista yupaychananpaj. Ujnin wawantapis, ujnin lantinpaj ninapi qʼolarpacherqa, nisunman Ezequiaspa wauqenta.

Ezequiasqa, tatanta sajra imasta ruwajta rikuspapis, Diosta kasukullarqapuni, nitaj karunchakorqachu. ¿Diosta kasukuyta atillarqachu?... Mana, chaywanpis kasukunanpaj mayta kallpachakorqa. Imatachus Jehovamanta mana karunchakunanpaj ruwasqanta, imaynatachus pay jina ruwananchejta ima qhawarina.

Ezequiasqa, waj cheqa sonqo runas jina ruwarqa. Chay cheqa sonqo runasmanta ujnin David karqa, payqa ashkha watas ñaupajta kausarqa. Ezequiasqa, Diosmanta Qhelqasqata leespa Davidmanta yachakorqa. Sutʼinchanapaj, uj kuti Davidqa, “tatay mamay saqerpariwajtinkupis, Tata Diosqa mana saqerpariwanqachu”, nerqa.

Diosta kasukunanpaj, ¿imataj Davidta yanaparqa?... Diospi creesqan. Davidqa, kasukoj runa kajtillan Dios cheqamantapuni yanapananta  yacharqa. Ezequiastaqa, Davidmanta yachakusqan, Jehovamanta mana karunchakunanpaj, kasukunanpaj ima yanaparqa. Qan Diosta kasukunki chayqa, Jehová Diosqa, yanapasonqapuni.

¿Imatataj ruwawaj tatayki chayri mamayki Jehová Diosta mana kasukojtinku?... Diosqa, wawas tatasninkuta kasukunankuta munan. Chayraykutaj tatasniykita kasukunayki tiyan. Chaywanpis tatasniyki Jehová Diospa leyesninwan churanakoj imasta ruwanaykita nisojtinku, imaraykuchus mana ruwayta munasqaykita ninayki tiyan. Chantá pillapis suwakuyman, llullakuyman, Diospa sonqonta nanachej imasman tanqasojtin, ama chaykunata ruwaychu. ¡Imaraykuchus Diosta kasukuyqa, imamantapis aswan sumaj!

Diospa ashkha cheqa sonqo kamachisninmanta mayta yachakusunman. Ezequiasqa, mana Davidllamantachu yachakorqa, manaqa wajkuna willasqankurayku abuelon Jotammantapis. Noqanchejpis Bibliata leespa yachakusunman. ¿Yachankichu pimantawanchus yachakusunman?...

Bibliapeqa, Ezequías, David, Jotam, waj runas ima juchasapas kasqankurayku pantasqankumanta yachakullankitaj. Chaywanpis Jehovata munakusqankurayku, pantasqankuta reparakorqanku, allin imasta ruwanankupajtaj kallpachakorqanku. Diospa Churin Jesuslla juntʼa runa karqa. Chayrayku paymanta sumajta yachakuna tiyan, pay jina ruwananpaj.