▪ Jesús nacekusqantawan uywa qaranapi sirisqa kashasqanmanta runas ruwasqankuta, ¿maykʼajllapis rikorqankichu? Chaypeqa, 3 reyes Jesusman risqanku rikukun. Chay runastaqa, Dios uj chʼaskanejta Jesusman pusasqanta ninku. Ashkha wawas chay 3 reyes, Melchor, Gaspar, Baltasar ima kasqankuta allinta yachanku. ¿Chaywanpis runaspa nisqanku, Biblia nisqanwan kikinchu? Mana. ¿Imaraykú? Qhawarina.

Uj kaj, ¿pikunataj chay runas karqanku? Kay cheqapaj griegopi oqharikusqan rimayqa, chay runas chʼaskasta qhawajkuna chayri layqeris kasqanta rikuchin, manataj reyes kasqankutachu. Chayraykutaj chʼaskasta qhawarispa imachus kananta nej kanku. Bibliaqa, sutisninkuta, mashkhachus kasqankuta ima, mana ninchu.

Iskay kaj, ¿maykʼajtaj chay runas Jesuspaman rerqanku? Chay runasqa, Jesusta mana uña wawitatachu tarerqanku, imaraykuchus Mateo librota qhelqaj nerqa: “Wasiman yaykuspataj, wawata, María mamantawan rikorqanku”, nispa (Mateo 2:11). Chayrayku nisunman Jesusta jatituntaña taripasqankuta. Chantá José, María ima, chay runasta mana uywa puñunamanchu yaykucherqanku, manaqa wasinkuman.

Kinsa kaj, ¿pitaj chʼaskata chay runaspa ñaupaqenman churarqa? Religionesta kamachejkunaqa, Dios chay chʼaskata churasqanta ninku. Chaywanpis chay nisqanku mana cheqachu. Imaraykuchus chʼaskaqa, mana Belenmanchu chayacherqa manaqa Jerusalenman, rey Herodespaman, Jesús nacekusqanta, “judiospa reynin” kanantataj willarqanku. Chayta yachaspataj runa wañuchi Herodesqa, wawita Jesusta chejniyta qallarerqa (Mateo 2:2). Herodesqa, sumajta yuyaychakuspa, chay runasman Jesusta taripaspa, maypichus kashasqanta, yupaychaj rinanpaj willanankuta nerqa. Chʼaskaqa, chay runasta, José, María ima kasharqanku chayman pusarqa. Chay runaspa ruwasqankurayku, ichapis wawita wañuchisqa kanman karqa. Chaywanpis Jehová mana ajina kananpaj yanaparqa. Herodes, chay runas ripusqankuta yachaspa mayta phiñakorqa. Chayraykutaj Belenpi, muyuyninpi ima, qhari wawitasta iskay watayojmanta uraman wañurachinankuta kamacherqa (Mateo 2:16).

Watas pasasqanmantataj, Jehová, Jesusmanta nerqa: “Kaymin ancha munasqa Chureyqa. Paywan sonqo juntʼasqa kani,” nispa (Mateo 3:17). Arí, cheqamantapuni Jesuspa Tatanqa may munakuyniyoj, cheqantaj kasqanta nisunman. Payqa, Churin nacekusqanta willanankupaj, ¿chʼaskasta qhawajkunatachu, layqeristachu kachanman karqa? (Deuteronomio 18:10, 11.) ¿Dios chʼaskanejtachu chay runasta, atiyniyoj runa wañuchi Herodespaman pusanman karqa? ¿Dioschu chay runasta, wawan kasharqa chayman pusarqa, maypichus kashasqanta willanankupaj?

Uj wakichisqa comandante, aswan sumaj soldadonta enemigonpa jallpʼanman uj llankʼayta ruwananpaj kachasqanpi tʼukuriy. ¿Chay comandante enemigosninman, maypichus soldadon kashasqanta willanmanchu? Ni, ¿icharí? Jehovaqa, munasqa Churinta Jallpʼaman munayninta juntʼananpaj kachamorqa. ¿Manacharí allinchu kanman karqa, enemigon Herodesman maypichus Jesús kashasqanta ninanqa?

Chantá, ¿pitaj chay chʼaskata rikhuricherqa? ¿Pitaj wawita Jesusta wañuchiyta munarqa, ruwayninta mana juntʼananpaj? ¿Pitaj runasta chʼaukiyan cheqa yachachiykunata mana yachakunankupaj? ¿Pitaj maqanakuyman, wañuchiyman, llullakuyman ima tanqan? Jesusllataj chay runa wañuchi “llullakuypa tatan[...]” Kuraj Supay kasqanta nerqa (Juan 8:44).