¿MAYKʼAJLLAPIS imallatapis mayta munarqankichu? *... Jinapi ashkha runas rikukunku. Chaywanpis, ¿kapunawanchejpaj allinchu kanman llullakuy?... Mana. Chaytaqa, uj munapayaj runalla ruwanman. Uj runa Giezi sutiyoj munapayasqanrayku mana imayoj qhepakusqanta qhawarina. Payqa, Diospa profetan Eliseoj kamachin karqa.

Eliseo, Giezi ima, niraj Jesús kay Jallpʼapi nacekushajtin kausarqanku. Jehová, Eliseota milagrosta ruwananpaj apaykacharqa. Sutʼincharinapaj; Bibliaqa, Siriamanta soldadosta kamachej Naamanta lepra onqoymanta Eliseo sanoyachisqanta nin. Chay kutikama ni pi onqoyninmanta sanoyachiyta aterqachu.

Eliseoqa, runasta yanapananrayku milagrosta ruwaspa, ni jaykʼaj qolqeta qonankuta munarqachu. ¿Yachankichu imaraykuchus?... Jehovaj yanapayninwan chay milagrosta ruwasqanta yachasqanrayku. Chayrayku Eliseoqa, Naaman sanoyakusqanrayku qorita, pʼacha qoyta munasqanta qhesacharqa. Mana chayman jinataj Gieziqa, chaykunawan qhepakuyta munarisharqa.

Gieziqa, Eliseo mana yachanallanta, usqhayllata Naamanta taripaj kachaykukorqa. ¿Yachankichu imatachus Naamanman nisqanta?... Gieziqa, Eliseo iskay waynas chayamusqankupaj pʼachasta mañakojta kachasqanta nerqa.

 Chaywanpis Gieziqa, iskay waynas chayasqankuta nispaqa llullakusharqa. Payqa Naaman, Eliseoman pʼachata qoyta munasqanwan qhepakuyta munarqa. Chaytataj Naamanqa, mana yacharqachu, chayraykutaj mañakusqanmantapis astawan qorqa. ¿Imataj chaymanta karqa?...

Giezi wasiman chayasqantawan, Eliseo taporqa: “Giezi, maymanta jamushankiri?”, nispa.

Giezitaj kuticherqa: “Noqa kamachiykeqa mana maytapis rerqanichu”, nispa. Chaywanpis Jehová Diosqa, Eliseoman, tukuy ima ruwasqanta willarqa. Chayraykutaj Eliseoqa, Giezita ruwasqan mana allinchu kasqanta nerqa.

Gieziqa, pʼachawan, qolqewan ima qhepakorqa, chaykunaqa mana paypatachu karqa. Chayrayku Diosqa, Naamanpa onqoyninta payman chimpaykucherqa. ¿Imatá kaymanta yachakunchej?... Imayoj kayta munaspaqa, mana llullakunata.

¿Imaraykutaj Giezi llullakorqa?... Imaraykuchus payqa, ancha munapayaj runa karqa. Mana paypata kajta munapayarqa, chayraykutaj llullakorqa. Chayrayku wañunankama lepra onqoywan karqa.

Gieziqa, mana leprallawanchu onqorqa. ¿Yachankichu imatachus chinkachisqanta?... Dioswan allinpi kayta. ¡Ni jaykʼaj pay jina ruwanachu! Astawanpis kʼacha kay, kapuyninchejmanta wajkunaman qoriy imaqa may sumaj.