Moundsville llajtitapi nacekorqani, chay llajtitataj Ohio mayu kantupi kashan, Virginia Occidental nisqapi chaytaj Estados Unidospi kashan. Familiaypeqa, tawa wawasmanta kinsa qharis karqayku, noqataj kurajpa sullkʼan karqani, maytataj kusikoj kayku. Tatasniy, noqaykurayku mayta llankʼaj kanku, cheqan kajtataj ruwaj kanku, wajkunawanpis kʼachas karqanku. Mana qhapaj kajtiykupis, necesitasqaykoqa kapuwajpuni kayku. Tatasniyqa, Jehovaj testigosnin kasqankurayku, Bibliaj yuyaychaykunasninman jina uywanawaykupaj mayta kallpachakorqanku.

Waynayaspañataj, manaña yachachiwasqankuman jinachu kausasharqani. Bibliaj yuyaychaykunasninman jina kausayqa, mana kusiytachu apamusqanta nej kani. Yuyarqanitaj, munasqayman jina kausaspa cheqamantapuni kusisqa kausanayta. Tantakuykunamanpis manaña rerqanichu. Kuraj hermanoy, hermanay ima noqa jinallataj ruwarqanku. Tatasniy tukuy imata yanapanawaykupaj ruwasqankutapis qhesacharqayku.

Mana yuyallarqanipischu chay imasta yuyasqay, mana allin imasman apanawanta. Uj pʼunchay yachaywasimanta wasiyman kutipushajtiy compañeroy uj cigarrota qowarqa, noqataj japʼikorqani. Chay pʼunchaymantapachataj drogasman, alcoholman, khuchichakuyman ima qokuyta qallarerqani. Tiempo pasasqanman jinataj imaymana drogasman qokurqani, chaykunaj wata runanmantaj tukorqani. Drogakunallaypajpunitaj, drogasta venderqani.

Mana allintachu kausashasqayta sonqo yuyayniy sapa kuti yuyarichiwaj. Yuyarqanitaj mana allin imasman qokuspaña, manaña allin imasta ruwayta atinayta. Raymispi, conciertospi kaspapis wakin kutis sapayakorqani, llakikorqani ima. Wakin kuteqa, tatasniy kʼacha runas kasqankupi tʼukurerqani, imaynatachus karunchakusqaypi ima.

Manaña Bibliaj yuyaychaykunasninman jina kausayta yuyajtiypis, wajkunaqa mana jinatachu yuyarqanku. Tatasniyqa, 2000 watapi, Jehovaj testigosninpa jatun tantakuyninkuman wajyariwarqanku. Chaymantaj, tanqasqa jinalla rerqani. Chay tantakuyman noqa jina ruwaj hermanosniypis rillarqankutaj, chaytaj tʼukuchiwarqa.

Chay tantakuypi kashaspataj yuyarikorqani, uj wata ñaupajta chay lugarllamantaj concierto de rock nisqaman risqayta. Chay jatun tantakuypi rikusqaytaj sonqoyman chayarqa. Conciertopi kashajtiy chay lugarqa, qʼopamanta, cigarroj qʼosñinmanta ima juntʼa kasharqa. Chay conciertoman rejkunaqa, mana parlapayanapaj jina karqanku, takiykunastaj llakichikoj. Jatun tantakuypitaj, kusisqa runaspa chaupinpi kasharqani, kusiywantaj napaykuwarqanku, unayña paykunawan mana tinkojtiypis. Chay lugarqa, llimphu kasharqa, yachachikusqanpis suyakuyta qoj yachachiy karqa. Bibliaj cheqa yachachiykunasnin yanapasqantapuni reparaspa, imaraykuchus chayta qhesachasqayta tapukorqani (Isaías 48:17, 18).

Jatun tantakuy tukukojtintaj, qotuchakuyman rinayta nerqani. Noqa jina karunchakoj hermanosniypis kikillantataj nerqanku. Kinsantiykutaj Bibliamanta yachakuyta qallarerqayku.

Santiago 4:8 versículo sonqoymanpuni chayarqa, chaypi nin: “Diosman astawan qayllaykuychej; paypis qayllamusonqachej”, nispa. Chantapis Diosman qayllaykunaypaj, kausayniyta tijranay kasqanta reparakorqani. Chaypajtaj cigarrota pitayta, drogasman, alcoholman qokusqayta ima saqenay karqa (2 Corintios 7:1).

Mana allin amigosniyta saqerqani, Jehová Diosta yupaychajkunawantaj amigosta ruwakorqani. Qotuchakuymanta ancianoqa mayta yanapawarqa, paywantaj Bibliamanta yachakorqani. Telefononejtapis wajyarimuwaj, wasiymantaj jamoj imaynachus kashasqayta yachananpaj. Kunankamataj sumaj amigosllapuni kayku.

Kay 2001 watapi, hermanoy, hermanay, noqa ima, Diosman qokuspa bautizakorqayku. Tatasniy, cheqa sonqo hermanoy ima Diosta watejmanta ujchasqas yupaychashasqaykumanta mayta kusikorqanku.

Bibliaj yuyaychaykunasnenqa, watasqata jina japʼiwasqanta yuyaj kani, kunantajrí jarkʼanawanpaj kasqanta yachani. Bibliaqa, drogasta manaña ujyanaypaj, niña vendenaypaj, allinta kausakunaypaj ima yanapawarqa.

Kunanqa, Jehová Diosta Jallpʼantinpi yupaychajkunamanta ujnin kani. Paykunaqa, cheqa munakuyniyoj kanku, Diostataj ujchasqa sirvinku (Juan 13:34, 35). Diospa llajtanmanta uj warmiwan casarakorqani Adrianne sutiyojwan, payqa uj sumaj bendición noqapaj, maytataj munakuni. Mayta kusikuyku Jehová Diosta khuska yupaychashasqaykumanta.

Noqallapaj imatapis ruwanaymantaqa, runasta Bibliamanta yachachinaypaj tukuy tiempoyta churani. Chayta ruwaspataj mayta kusikuni. Mana iskaychakuspa nini, kausayniyta Biblia tijrachisqanta. ¡Kunanmá cheqa kacharichiyta tarini!