Diosmanta cheqa kajta, ¿yachakuyta munawajchu? Nisunman pichus kasqanmanta, kamachiykunasninmanta, imachus munaynin kasqanmanta ima. Jehová Diosqa, Bibliapi paymanta tukuy imata willawanchej. Chaywanpis Bibliata mana tukuychu leeyta, cheqa kajta entiendeyta ima atinku. ¿Imaraykú? Imaraykuchus chaytaqa mana pipis entiendeyta atillanchu. Jesús imatachus nisqanta qhawarina. (Mateo 11:25 leey.)

Chay versiculoqa, “chaypacha Jesús nillarqataj” nispa qallarin. Jesusqa, Galileaj kinsa llajtasninmanta runasta kʼamiytawansina chayta nerqa, chay llajtaspi payqa ashkha milagrosta ruwarqa (Mateo 11:20-24). Chantá, ¿imaraykutaj Jesuspa milagrosninta rikuspa mana nisqasninpi creerqankuchu? Rumi sonqos kasqankurayku (Mateo 13:10-15).

Jesusqa, Diosmanta cheqa kajta yachakunapajqa Diospa yanapanta, allin sonqoyoj kayta necesitasqanchejta yacharqa. Nerqataj: “Jatunchayki, Tatáy, janaj pachajta, kay pachajtawan Señornin, imaraykuchus kay imasta pakaykorqanki yachayniyojkunamanta, yuyayniyojkunamantawan, wawasmantaj sutʼincharqanki”, nispa. ¿Diosmanta cheqa kajta yachakuy may allin kasqanta reparankichu? “Janaj pachajta, kay pachajtawan Señornin” Jehovaqa, yachan pimanchus cheqa kajta rejsichiyta pimantajchus mana. Chaywanpis Jehová Diosqa, tukuy runas cheqa kajta yachanankuta munan. ¿Imaraykutaj wakinman rejsichin wakinmantaj mana?

Jehová Diosqa, kʼumuykukojkunata yanapan jatunchakojkunatatajrí mana (Santiago 4:6). Chantapis “yachayniyojkunamanta, yuyayniyojkunamantawan” cheqa kajta pakan, nisunman kay pachamanta yachayniyoj runasmanta pikunachus jatunchakunku Diospa yanapayninta mana necesitasqankuta yuyaspa (1 Corintios 1:19-21). Chaywanpis Diosqa, ‘wawasman sutʼinchan’ nisunman pikunachus payman qayllaykunku tukuy sonqo, wawas jina llampʼu sonqowan chaykunaman (Mateo 18:1-4; 1 Corintios 1:26-29). Diospa Churintaj, imaynachus llampʼu sonqo runas kasqankuta, jatunchakoj runas kasqankuta ima yacharqa. Religionta kamachejkunaqa, jatunchakusqankurayku Jesuspa yachachisqanta mana entienderqankuchu, llampʼu sonqoyoj challwiristajrí entienderqanku (Mateo 4:18-22; 23:1-5; Hechos 4:13). Chantapis, qhapaj runas llampʼu sonqos kasqankuta rikucherqanku Jesuspa qhepantataj rerqanku (Lucas 19:1, 2, 8; Hechos 22:1-3).

Kunantaj watejmanta, ¿Diosmanta cheqa kajta yachakuyta munawajchu?, nisqa tapuypi tʼukuriy. Yachakuyta munanki chayqa, kay pachapi yachayniyoj kasqankuta creekojkunata Dios mana yanapasqanta yachaspa mayta sonqochakunki. Imaraykuchus Diosqa kʼumuykukojkunata yanapan. Bibliamanta tukuy sonqo yachakunki chayqa, Jehová cheqa kajta entiendenaykipaj yanapasonqa. Cheqa kajta entiendenki chayqa, kunan kusisqa kausakunki “cheqa kaj” kausaymantaj apasonqa, nisunman paraisoman maypichus cheqan kausaylla kanqa, chaytataj Dios pisi tiempomantawan apamonqa (1 Timoteo 6:12, 19; 2 Pedro 3:13). *