¿Imaynatá Diosta kusichisunman? ¿Mana yupay atina kamachiykunata kasukuspachu? ¡Mana! Diospa Churin Jesucristoqa, imatachus ruwananchejta uj parlayllapi sutʼincharqa. (Marcos 12:28-31 leey.)

Ñaupajta, imaraykuchus Jesús chayta nisqanta qhawarina. Payqa 11 nisán pʼunchayta templopi yachachisharqa, wañunan pʼunchaytaj qayllapiña karqa. Enemigosnenqa pantachinankupaj, ashkha tapuykunata ruwarqanku. Jesustaj sapa kutichisqanwan paykunata chʼinyacherqa. Chaymanta taporqanku: “¿Tukuy kamachisqasmanta, mayqentaj aswan kurajri?”, nispa (28 versículo).

Chaytaqa pantachinallankupaj tapusharqanku. Imaraykuchus judiosqa iskay yuyaypi tʼaqasqa kasharqanku. Wakenqa, Moisespa Leyninpi 600 kamachiykunamanta wakinkuna aswan kuraj kasqanta nej kanku. Wakintaj tukuy kamachiykunata jatunpaj qhawana kasqanta nej kanku, nitaj wakillantachu. ¿Imatá Jesús kuticherqa?

Jesusqa iskay kamachiykunata oqharerqa. Ñaupajtaqa nerqa: “Diosniykitaqa munakunki tukuy sonqoykiwan, tukuy almaykiwan, tukuy yuyayniykiwan, tukuy kallpaykiwan ima”, nispa (30 versículo; Deuteronomio 6:5). Sonqo, yuyay, alma, kallpa ima rimaykunaqa, uj imallata sutʼinchan. * ¿Imatá? Jehovata tukuy kayninchejwan, tukuy imanchejwantaj munakunata. Bibliamanta sutʼinchaj uj libro, jinata nin: “Diostaqa tukuy kausayninchejwan munakuna tiyan”, nispa. Chayrayku Diosta munakojqa, ñaupaqenpi allinpaj qhawasqa kananpaj tukuy imata ruwan (1 Juan 5:3).

Qhepan kamachiymanta, Jesús nerqa: “Runa masiykita munakunki qan kikiykita jina”, nispa (31 versículo; Levítico 19:18). Diosta munakoyqa, runa masinchejta munakuywan ujchasqa kashan. Arí, Diosta munakojqa runa masintapis munakullantaj (1 Juan 4:20, 21). Runa masinchejta noqanchejta jina munakuspaqa, imatachus ruwapunawanchejta munanchej, ajinallatataj paypaj ruwapusun (Mateo 7:12). Chayta ruwaspaqa, Diosta munakusqanchejta rikuchisun, pichus tukuyta rijchʼayninman ruwawarqanchej (Génesis 1:26).

¿Imaynatá chay iskay kamachiykunata qhawananchej tiyan? Jesús kutichin: “Chay iskay kamachisqasmantaqa mana aswan kuraj kanñachu”, nispa (31 versículo). Waj cheqapitaj nerqa: “Chay iskay kamachisqaspi tukuy ley juntʼakun”, nispa (Mateo 22:40).

Diostaqa tukuy kusichiyta atinchej. Imaraykuchus payqa, munakuyta rikuchinallanchejta munan. Arí, chayllata mañawanchej, chayllatapunitaj mañawasun. Chaywanpis Diosta munakusqanchejtaqa, ruwasqasninchejwan rikuchinanchej tiyan, mana simillamantachu (1 Juan 3:18). Jehovaqa “munakuymin”. ¿Imaynatá payta munakusqaykita rikuchiwaj? ¿Yachayta munawajchu? (1 Juan 4:8.)