JESÚS kausarimusqanmanta unayña kajtinpis, jatunpaj qhawana tiyan. Apóstol Pabloqa, imaraykuchus valorniyoj kasqanta, jinata sutʼincharqa: “Yachanchej Cristo kawsarimpusqanta; wañusqakunamanta ñawpajta kawsarimpun uj ñawpaj poqoy jina. Imaynatachus wañuy rikhurimorqa uj runanejta, ajinallatataj wañusqakunamanta kawsarimpuypis uj runanejllatataj rikhurimorqa. Imaynatachus Adannejta tukuy wañorqanku, ajinallatataj Cristonejta tukuy kawsarimponqanku” (1 Corintios 15:20-22).

Jesusqa 33 wata 16 nisán pʼunchaypi kausarimorqa. Chay pʼunchaypitaj Judiosqa, granota oqharisqankumanta ñaupaj poqoykunata, Jerusalén temploman Jehová Diospaj apaj kanku. Pabloqa, Jesús “ñawpaj poqoy” kasqanta nispa, astawan runas kausarimunankuta rikucherqa.

¿Imaynatá Jesús kausarimusqan yanapawanchej? Pablo sutʼinchasqanman jina, “imaynatachus wañuy rikhurimorqa uj runanejta”, ajinallatataj kausarimuypis uj runanejta rikhurimun. Adanmanta juchata herenciata jina japʼisqanchejrayku, tukuy wañunchej. Chaywanpis Jesusqa, noqanchejrayku kausayninta qospa, juchamanta, wañuymanta ima kausarimuynejta kacharichiwanchej. Pabloqa Romanos 6:23 nerqa: “Juchaj pagonqa wañuymin; Diospa regalonrí wiñay kausay Cristo Jesús Señorninchejpi”, nispa.

Jesuspis imaynatachus wañuynin, kausarimuynin ima yanapawasqanchejta sutʼincharqa. Nisqanman jina, kausarimunan karqa “tukuy creejkuna ama wañunankupaj, manachayqa wiñay kawsayniyoj kanankupaj. Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa” (Juan 3:14-16).

Tʼukuriy: ¡Wiñay kausay kanqa, nanaypis, ñakʼariypis niña kanqachu! (Apocalipsis 21:3, 4.) ¡Chaymá sumajqa! Uj yachayniyoj runa nin: “Aya pʼampanasqa kausay uj ratollapaj kasqanta yuyachiwanchej, kausarimuytaj wañuy uj ratollapaj kasqanta rikuchiwanchej”, nispa. Arí, Jesuspa kausarimuynenqa, ¡kausayta qowanchej!