Wawallaraj kashajtiy tatasniy divorciakorqanku. Chayrayku mamallay noqata, kuraj hermanosniyta (2 qharis 1 warmi) ima uywawarqayku. Chay tiempopi, Franciamanta joqʼara wawasta uj jinata yachachej kanku, wakin kutistaj yachachishaspa mayta ñakʼarichej kanku. Jinapis wawamantapacha yanapasta japʼerqani, chaytaj mana tukuy joqʼaraspatachu kapun. Sutʼinchasqayki.

Uj tiempopi, ashkha profesores joqʼara wawasta parlayta, simita leeyta ima yachachina kasqanta yuyaj kanku. Chayrayku Franciapi, maypichus noqa wiñakuni, escuelasqa manapuni makiswan parlakunanta saqejchu kanku. Wakin wawastaqa, makisninkutapis wasankuman wataykoj kanku.

Juchʼuyllaraj kashajtiy, parlayta yachachej doctorajpi, semanapi ashkha horasta kaj kani. Chaypitaj quejadayta chayri umayta kuyuchispa, mana uyarisqay parlaykunata nichiwaj kanku. Ni imaynamanta waj wawaswan entiendenakuyta atejchu kani. Chay wataspeqa, maytapuni ñakʼarerqani.

Sojta watayoj kashajtiy, joqʼara wawaspaj escuelaman churawarqanku. Chaypi ñaupaj kutirayku, joqʼara wawaswan tinkorqani. Chaywanpis manapuni makiswan parlanaykuta munajchu kanku. Parlajtiykoqa makispi laqʼawaj kayku, chayri chujchamanta japʼiwaj kayku. Jinapis pakayllamanta noqayku entiendenallaykuta makiswan parlaj kayku. ¡Chaypimá waj wawaswan entiendenakoj kani! Tawa watastataj kusisqa karqani.

Chaywanpis 10 watayoj kashajtiy, uyariyta atej wawaspaj escuelaman churawarqanku. ¡Sonqo pʼakisqa kasharqani! Tukuy joqʼara wawastaj wañusqankuta yuyarqani. Doctoresqa, parlayta yachachej doctorawan yachakusqayta, mana qonqapunayta munarqankuchu. Chayrayku familiayman nerqanku, ama makiswan parlayta yachanankuta, nitaj joqʼara wawaswan tantakojta saqenawankuta. Uj pʼunchay, ninrimanta yachaj doctorpajman rerqani. Mesa patanpitaj, makiswan parlaymanta uj libro karqa. Libroj tapanpi dibujosta rikuytawan, dedoywan señalaspa nerqani: “¡Chayta munani!”, nispa. Doctortaj usqhayllata pakaykorqa. *

Mamayqa Bibliamanta juchʼuymantapacha yachachiwarqayku. Jehovaj testigosninpa tantakuyninkumanpis pusawaj kayku, chaytaj Burdeos llajta qayllapi Mérignac nisqapi kashan. Chaypi parlakusqanmanta, pisillata entiendej kani. Chaywanpis hermanosqa, ujtaj ujtaj ladoypi tiyakuspa papelpi qhelqaspa sutʼinchawaj kanku. Munakuyninku, noqamanta llakikusqanku ima, sonqoyta kuyuricherqa. Mamay Bibliamanta yachachiwajtinpis, ni jaykʼaj allinta entienderqanichu. Profeta Daniel jina sientekorqani. Uj ángel uj profeciata willajtin, pay nerqa: “Uyarerqani imatachus nishajta, manataj imatapis entiendeyta aterqanichu”, nispa (Daniel 12:8). Noqapajrí kay jina karqa: “Qhawarqani, nitaj entienderqanichu”.

Jinapis Bibliamanta yachakusqayqa, pisimanta pisi sonqoypi saphichakorqa. Entiendesqaytaqa may valorniyojpaj qhawarqani, chayman jina ruwanaypajtaj kallpachakoj kani. Chantapis wajkunaj ruwasqankuta qhawaspa yachakoj kani. Sutʼinchanapaj, Bibliaqa pacienciayoj kanata kamachin (Santiago 5:7, 8). Chaywanpis imapunichus paciencia kasqanta, mana entienderqanichu. Chaytaqa cristiano hermanosniy ruwasqankuwan rikuchillawajtinku entienderqani. Qotuchakoyqa ñaupajman rinaypaj, maytapuni yanapawarqa.

Uj pʼunchay waynuchullaraj kashajtiy, callepi joqʼara jovenesta makiswan parlashasqankuta rikorqani. Pakayllapi paykunawan tantakuyta qallarerqani, jinamantataj francespi makiswan parlayta yachakorqani. Chaywanpis Jehovaj testigosninwan tantakullajpuni kani. Chaypeqa uj joven Estéfano sutiyoj, tukuy imaynamanta yanapawaj. Parlanawanpajpis mayta kallpachakoj, hermanoyta jinapuni munakorqanki. Chaywanpis tiemponman, cuartelman mana riyta munasqanrayku carcelman wisqʼarqanku. Chaytaj mayta llakichiwarqa, tantakuykunamanpis niña rerqanichu.

Estefanota 11 killanman kachariporqanku, wasinmantaj kutinporqa. Carcelpeqa makiswan parlayta yachakusqa. Chayrayku makiswan parlawayta qallarejtin, tʼukullata saqewarqa. Parlanawanpaj makisninta, uyanta ima kuyuchisqanqa, maytapuni kusichiwarqa. Sumajtataj entiendenakuyta qallarerqayku.

Estefanowan Bibliamanta yachakuyta qallarerqani. Chaymantapachataj, tukuy yachakusqay aswan sutʼi karqa. Wawa kashaspaqa, Bibliamanta librospi dibujosta qhawaspa mayta miskʼichikoj kani. Chantapis chay dibujospi kajkunata rejsinaypaj, chaypi tukuy ima kasqanta yuyayniypi japʼinaypaj ima, mayta kallpachakoj kani. Abrahammanta, “mirayni[nmanta]”, “may chhika runas[manta]” ima yacharqaniña, chaywanpis makiswan parlaywan yachachiwajtinkuraj sutʼita entienderqani (Génesis 22:15-18; Apocalipsis 7:9). Arí, makiswan parlaypuni sonqoy ukhuman chayan.

Tantakuypi yachachikusqanta entiendejña kani, sonqoymantaj chayawaj. Chayraykutaj astawan yachakuyta munallarqanipuni. Estefanowanqa Bibliata astawan entienderqani. Chayraykutaj 1992 watapi Jehová Diosman uj mañakuypi kausayniyta qoytawan bautizakorqani. Mayta ñauparispañapis, wawa kashaspa mana wajkunawan parlayta atisqayrayku, may manchali karqani.

Makiswan parlaypi qotituykoqa, tiempowan Pessac nisqapi qotuchakuyman ujchakorqa, chaytaj Burdeos llajtallapitaj kashan. Ujchakusqanqa, Diosta yupaychaypi astawan ñaupanaypaj yanapawarqa. Chaywanpis nirajpuni wajkunawan  masichakuyta atillarqanichu. Jinapis uyariyta atej amigosneyqa, parlasqankuta entiendechiwajpuni kanku. Gilleswan Elodiewanqa qhariwarmi karqanku, parlanawankupajtaj tukuy imata ruwaj kanku. Chantapis mikhoj chayri tantakuy tukukusqantawan cafecituta ujyaj, wajyariwajpuni kanku. Sumaj amigosmantaj tukorqayku. Diospa ñankunasninpi purejkunawan kayqa, ¡may kusiypuni!

Chay qotuchakuypi kʼacha Vanessayta rejserqani. Wajkunamanta llakikusqan, cheqan kajta munakusqan ima sonqoyta suwawarqa. Chantapis joqʼara kasqayta mana uj chʼampayta jinachu qhawarqa, manaqa waj parlayta yachakunanpaj yanapata jina. Kay 2005 watapitaj casarakorqayku. Manchali kajtiypis, Vanessayqa wajkunawan parlanaypaj yanapawan. Ruwanasniyta juntʼanaypaj yanapawasqanmanta, tukuy sonqo agradecekuni.

Casarakusqayku watallapitaj, Louviers (Francia) llajtapi Jehovaj testigosninpa oficinankuman wajyariwarqanku. Uj killata makiswan parlayman tijrayta yachachiwarqanku. Chay wataspi, Franciapi makiswan parlajkunapaj videosta orqhonankupaj, mayta llankʼasharqanku. Chaywanpis ashkha llankʼayraj karqa, yanapatataj necesitarqanku.

Wajyariwasqankuta warmiywan jatunpaj qhawarqayku, Jehová Diosmanta uj sumaj regalota jina. Chaywanpis llakisqa kasharqayku. Tapukorqaykutaj: “Makiswan parlaj qotitumanta, ¿imataj kanqarí? ¿Imatá wasinchejwan ruwasunrí?”, nispa. Chantapis, ¿Vanessay llankʼayta tarinmanchu karqa? Jehovaqa chʼampaykunasniykuta tʼukunapaj jina allincharqa. Cheqamantapunitaj munakuyninta repararqayku, mana noqallaykupajchu manaqa tukuy joqʼara runaspajpis.

Makiswan parlayman tijrachiypi yanapakuspa, joqʼara runasta Diosta rejsinankupaj yanapay imaynachus kasqanta yachani. Chantapis ashkha hermanos, parlanawankurayku tumpallatapis makiswan parlayta yachakunku. Chaytaj, ¡sonqoyta kuyurichin! Hermanonkuta jinapuni qhawawanku. Munakuyninkuta rikuchiwasqankoqa, Jehovaj llajtan ujchasqa kasqanta sutʼita rikuchin (Salmo 133:1).

Jehovaman mayta agradecekuni, imajtinchus sapa necesitajtiy uj hermanota yanapanawanpaj churan. Mayta agradecekullanitaj, joqʼara runas Diosta rejsinankupaj, payman qayllaykunankupaj ima, uj chhikitanta yanapayta saqewasqanmanta. Bibliaqa tumpamantawan tukuy runas uj familialla kanankuta nin. Chay pʼunchay chayamunanta, ¡mayta suyakushani! Imajtinchus ‘llimphu parlaylla’ kanqa, chaytaj Diosmanta, munayninmanta ima cheqa yachachiy (Sofonías 3:9).