Uj warmi, Jehová ni jaykʼaj munakunanta yuyaspa, jinata nerqa: “Ni imapaj valesqayta yuyani, chaytaj mana Diosman qayllaykojta saqellawanchu”, nispa. ¿Maykʼajllapis kikinta yuyarqankichu? Jina kajtin, ichapis tapukunki: “¿Dios munakuwanchejpunichu?”, nispa. Jesusqa, Diosninchej sapa ujta munakuwasqanchejta sutʼincharqa. (Juan 6:44 leey.)

Tatanta sumajta rejsisqanraykutaj, imatachus paymanta nisqanpi atienekusunman (Lucas 10:22). Paytaj jinata sutʼincharqa: “Mana pipis noqaman jamunmanchu, manachus kachamuwaj Tatay pusamunman chayqa”, nispa. Arí, Jehová Dios payman pusawajtillanchej, kamachisnin, Jesuspa yachachisqasnin ima kayta atisunman (2 Tesalonicenses 2:13). Jesuspa nisqanta allinta entiendesun chaytaj, Dios munakuwasqanchejtapuni reparasun.

¿Imaynatá Dios payman pusawanchej? Griego parlaypi “pusamuy” rimaypaj oqharikusqan palabraqa, challwasniyoj chʼipata aysaspa orqhomunamanta parlanapaj oqharikullanmantaj (Juan 21:6, 11). Chaywanpis Jehovaqa, payta sirvinanchejpaj mana chʼipapi challwasta jinachu aysawanchej. Astawanpis ajllakojta saqewanchej, nitaj sonqonchejta kallpanman atienekuspa kichanchu (Deuteronomio 30:19, 20). Jehovaqa pikunachus sonqonkuta kichariyta munajkunata maskʼan (1 Crónicas 28:9). Chay jina runasta tarispataj, ¿imatá ruwan?

Tukuy sonqowan maskʼaj runata tarispaqa, munakuywan Payman qayllaykuchin (Hebreos 11:6). ¿Imaynatá Jehová chayta ruwan? Bibliapi sumaj willaykunanejta, mayqentachus sapa runaman chayachin. Chantá espíritu santonnejta, chaytaj Palabranpi cheqa kajta entiendenanpaj, chayman jina ruwananpaj ima yanapan (1 Corintios 2:11, 12). Arí, manachus Dios yanapawasunman chayqa, ni jaykʼajpis Paypa kamachisnin, Jesuspa yachachisqasnin ima kayta atisunmanchu.

Kay Juan 6:44 versiculopi Jesús parlasqan, ¿imatá Jehovamanta yachachiwanchej? Runaspa sonqonpi kʼacha kaykunata rikuspa Payman pusasqanta, sapa ujninkutataj munakusqanta. Qallariypi parlarqanchej chay warmeqa, chayta yachaspa mayta sonqochakusqa. Pay nin: “Jehová Diosta sirveyqa, tukuy imamantapis aswan sumaj. Pay ajllawan chayqa, cheqamantachá munakuwan”, nispa. Chayta yachaspa, ¿manachu qanpis sonqoykita Diosman kichariyta munawaj?