KAY revistaj tapanpi tapuyta rikuspa, ichá ninki: “¡Maymantá Dios sajra kanqari!”, nispa. Chaywanpis ashkhas chayta tapukunku, chayri Dios sajrapuni kasqanta ninku. ¿Imaraykú jinata yuyanku?

Wakenqa jatuchaj llakiykunapi rikukuspa ninku: “¿Imaraykú Dios jinata ñakʼarinanchejta saqellanri? ¿Nichu sonqon nanan? ¿Sajrachu?”, nispa.

Wakin runastaj, Bibliapi wakin cheqasta leespa, jinallatataj yuyanku. Sutʼincharinapaj, Noej tiemponpi Jatun Paramanta leespa, wakin ninku: “Dios mana sajrachu chayqa, ¿imaraykú chay chhika runasta wañuchin?”, nispa.

Ichá qanpis jinata tapukorqanki, chayri tapusojtinku mana kutichiyta atillarqankichu. Jamoj tapuyta ukhunchayqa, mayta yanapasonqa.

Imaraykuchus Diosqa, “payman rijchʼakojta ruwa[warqanchej]” (Génesis 1:27). Chayrayku animalesmanta nisqaqa, imachus allin, imatajchus mana allin kasqanta reparayta atinchej. Arí, Diosqa kʼacha kaykunasninta rikuchinapaj, allin kajta chayri mana allin kajta reparayta atinapaj ima ruwawarqanchej. Pillatapis ñakʼarejta rikuspa sonqonchej nanawanchej chayqa, ¿manachu Diosta astawanraj nananman?

Bibliaqa ajina kasqanta nin. Chaypi Dios niwanchej: “Ñanneyqa ñanniykichejmanta aswan patapi kashan, jinallataj qankunaj yuyasqasniykichejmanta noqaj yuyasqasneyqa aswan patapi kashanku”, nispa (Isaías 55:9). Diosta rumi sonqo nisunman chayqa, Bibliaj nisqanwan churanakushasunman, chantapis ñanninchej paypa ñankunasninmanta aswan patapi kasqanta nishasunman. Chayrayku niraj imata nishaspa, imaraykuchus imatapis ruwasqanta yachana tiyan. Chantapis Dios sajrachus manachus kasqanta tapukunamantaqa, imaraykuchus wakin ruwasqasnin sajrata jina qhawachisqanta tapukuna kanman. Ñaupajtaqa, uj sajra imaynachus kasqanta yachana.

Sajraqa, rumi sonqo, wajkunata ñakʼarejta rikuspa kusikun, nitaj khuyakunchu. Sutʼinchanapaj, uj tata wawanpa sonqonta nanachinanrayku jasutʼin chayqa, sajra. Chaywanpis wawanpa allinninrayku jasutʼin chayqa, kʼacha. Chantapis pillatapis sajra nispaqa, tumpashanchejña. Runastaj tumpanapajqa churasqa kanchej, ichá qantapis qhasillamanta tumpasorqanku.

Chayrayku imajtinchus wakin runas, Diosta sajramanta tumpasqankuta astawan ukhuncharina. Jatuchaj llakiykuna, Bibliapi Diospa castigosninmanta leesqanchej ima, ¿rikuchinchu Dios rumi sonqo kasqanta?