“Chay reykuna kamachishajtinku, janaj pachapi kaj Dios uj reinota sayarichenqa, chaytaj mana jaykʼajpis chinkachisqachu kanqa, manataj mayqen reinopis payta atipanqachu. Tukuynin waj reinosta tukuchenqa, chay atipaj reinotajrí wiñaypaj sayanqa.” (Daniel 2:44.)

Diospa Reinonqa cielopi uj gobierno, kamachejnintaj Jesucristo. Payqa, kay tiempopi tukuy gobiernospa cuentanmanta kamachenqa. Diospa munaynintaj, cielopi jina kay pachapi ruwasqa kanqa (Mateo 6:9, 10). Chantapis chay gobiernoqa wiñaypaj sayanqa, imaraykuchus “Señor Jesucristo Salvawajninchejpa wiñay reinon[...]”. Chayrayku allin kausayqa kanqapuni (2 Pedro 1:11).

“Satanaspis yachan kʼanchaj angelman tukuriyta. Chayrayku, kamachisnimpis jinallatataj ruwanku; sumaj runasman rijchʼasqas, imastapis cheqanta ruwajkunaman tukurinku. Paykunaj tukukuyninkurí ruwasqankuman jina kanqa.” (2 Corintios 11:14, 15.)

Pisimantawan, llulla religiones Kuraj Supaymanta jamusqanku sutʼi rikukonqa. Tukuyninkutaj Jallpʼamanta chinkachisqa kanqanku, jinallataj chejnikuyman tanqasqanku, yawarta jichʼasqankupis. Jinamanta “kawsaj cheqa Diosta” munakojkunaqa, “uj creeylla[pi]”, “tukuy sonqowan, cheqa kajman jinataj” Payta yupaychanqanku. ¡Chaypimá runasqa allinpi, ujchasqataj kausakonqanku! (1 Tesalonicenses 1:9; Efesios 4:5; Juan 4:23.)

“Diostaj paykunaj Diosninku kanqa. Payqa tukuy waqayta ñawisninkumanta pichanqa, manañataj wañuy kanqachu, nitaj waqaypis, nitaj qhapariypis, nitaj nanaypis, imaraykuchus ñawpaj kaj imasqa manaña kanqachu.” (Apocalipsis 21:3, 4.)

Jehovaqa, Wawan Jesusnejta chayta ruwanqa, pichus noqanchejrayku wañorqa (Juan 3:16). Jesús  kamachishajtenqa, tukuy runaspa juchasninku pichasqa kanqa. Ñakʼariykunapis tukukaponqa, imaraykuchus Jehovaqa, “paykunaj Diosninku kanqa”, “tukuy waqayta[taj] ñawisninkumanta pichanqa”. Juchawan ñakʼariywanqa, niña yuyarisqachu kanqa. “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku” (Salmo 37:29).

“[Jesus]qa Sierpeta presocharqa, chay ñawpa katarita, Kuraj Supay, Satanás sutiyojta. Paytataj waranqa wataspaj wataykorqa. Ukhu pachamantaj [chayri chinkay chinkay ukhuman] payta wijchʼuykorqa, wisqʼaykuytawantaj llaveykorqa, chantá patanta sellaykorqa, amaña runasta chʼawkiyanampaj.” (Apocalipsis 20:2, 3.)

Satanaswan supaykunasninwan chinkay chinkay ukhunman wijchʼusqa kajtinku, wañusqa jina kanqanku. Imaraykuchus ni imata ruwayta atenqankuñachu. Nitaj runasta pantachenqankuchu. Satanaswan supaykunasninwan wataykusqa kajtinku, ¡may kusisqachá kausasunchej!

Qhepa pʼunchaykunaqa “manchay ñakʼariy” tiempopi tukukonqa. Mayqenmantachus Jesús nerqa: “Chaypacha manchay ñakʼariy kanqa; kay pacha qallarikusqanmantapacha manaraj chay jina karqachu, nitaj jaykʼajpis kanqachu”, nispa (Mateo 24:21).

Manchay ñakʼariy kanqa nispa, nanaykuna, llakiykuna ima, ni jaykʼaj jina rikukunanta nisharqa. Chaytaj Tukuy Atiyniyoj Diospa “wañuchinaku maqanaku[npi]” tukukonqa, mayqenchus “Armagedón” sutikun (Apocalipsis 16:14, 16).

Cheqan kajta munakojkunaqa, kay sajra pacha tukukunanta mayta suyashanku. Diospa Reinon kamachishajtin, ima bendicioneschus kananta tumpata qhawarina.

“May chhika” runas allin kausaypi tiyakonqanku: Diospa Palabranqa “may chhika” runas, “jatun ñakʼariy” tiempomanta kausashaj llojsinankuta, mosoj pachapitaj kausanankuta nin (Apocalipsis 7:9, 10, 14; 2 Pedro 3:13). Paykunaqa Jesucristonejta salvasqa kasqankuta nenqanku, pichus “Diospa Corderon, runaspa juchanta apaspa pichaj[taj]” (Juan 1:29).

Diospa yachachiynenqa ashkha bendicionesta apamuwasun: Mosoj pachapi, “tukuy jallpʼaqa Tata Diosta rejsiywan juntʼa kanqa” (Isaías 11:9). Jehovaqa, runa masinchejwan allinta kausanapaj, Jallpʼata sumajta qhawanapaj ima yachachiwasun. Pay nin: “Noqamin Señorniyki Tata Dios kani; noqa yachachiyki imachus qampaj allin kasqanta. Noqa may ñantachus purinaykita rikuchiyki”, nispa (Isaías 48:17).

Wañusqa familiasninchej kausarimonqanku: Jesusqa Jallpʼapi kashaspa, amigon Lazarota kausaricherqa (Juan 11:1, 5, 38-44). Chaytaj Diospa Reinonpi kamachishajtin, imastachus ruwananta rikuchiwanchej (Juan 5:28, 29).

Allin kausay, cheqan kajtaj wiñaypaj sayanqa: Cristo kamachishajtenqa, tukuy sajra ruwaykuna chinkanqa. ¿Imaynatá yachanchej? Jesusqa imachus runaj sonqonpi kasqanta qhawayta atin. Chay atiyninwantaj, pichus cheqanta, pitajchus sajrata ruwayta munasqanta yachanqa. Sajrallatapuni ruwayta munajkunataj, mana Diospa mosoj pachanpi kausayta atenqankuchu (Salmo 37:9, 10; Isaías 11:3, 4; 65:20; Mateo 9:4).

Kaykamaqa, Biblia sumaj kausay kananta nisqanmanta, wakillanta qhawarinchej. Diospa Reinon Jallpʼata kamachishajtenqa, runasqa wiñaypaj “allin kawsaypitaj kusisqa kanqanku” (Salmo 37:11, 29). Runasta ñakʼarichej imastaj chinkaponqa. Imaraykuchus Diosqa nin: “Noqa tukuy imata mosojyachi[saj]”, “kay palabrasqa maychus kajpuni, cheqataj kanku”, nispa (Apocalipsis 21:5).