Unay tiempomanta qhelqaj Edward Herbert (Gran Bretañamanta), 400 watas ñaupajta jina nerqa: “Wajkunata mana perdonayta atejqa, pay kikin purinan puenteta urmachin”, nispa. Chay nisqanqa, imaraykuchus perdonanamanta ujta rikuchiwanchej: Noqanchejpis maykʼajllapis perdonta mañakunanchej kanqa (Mateo 7:12). Chaywanpis mana chayraykullachu perdonananchej tiyan, apóstol Pablo sutʼincharqa: ‘Ujkuna ujkunawan paciencianakuspa, purajmanta perdonanakuychej, sichus pipis wajpa contrampi imatapis ruwan chayqa. Imaynatachus Jehová juchasniykichejta perdonarqa, ajinallatataj qankunapis ujkunata perdonaychej’, nispa (Colosenses 3:13).

Juchasapas kasqanchejrayku, pillatapis phiñachinchejpuni chayri sonqonta nanachinchej. Wakin kutitaj paykuna chayta ruwawanchej (Romanos 3:23). ¿Imaynatá paykunawan allinpi kausakullasunmanpuni? Diosqa apóstol Pablonejta wajkunapaj pacienciakunata, perdonanata ima yuyaychawanchej. Chaytaj ñaupa tiempopi jinallataj yanapawanchej. Astawan ukhuncharina.

‘Ujkuna ujkunawan paciencianakuspa.’ Kay palabrasqa, griego qallupi wajkunapaj pacienciakunata niyta munan. Uj yachayniyoj runa nisqanman jina, wajkunapaj pacienciayoj cristianoqa, “paykuna pantajtinku chayri imaynachus kasqanku phiñachejtinpis pacienciawan aguantan”. “Ujkuna ujkunawan” nisqantaj, purajmanta pacienciakuna kasqanta rikuchin. Arí, imaynachus kasqanchej wajkunata phiñachiyta atisqanta reparakuspaqa, phiñachiwanchej chay runaswanpis allinpi kausakusun. Chantá, ¿imatá ruwasunman pillapis sonqonchejta nanachiwajtinchej?

‘Purajmanta perdonanakuychej.’ Uj yachayniyoj runa nisqanman jina, Diosmanta Qhelqasqa Bibliapi “perdonanakuychej” nisqaman tijrachikusqan palabraqa, griego qallupi “mana perdonllamantachu parlan, manaqa khuyakuyta rikuchinamantapis”. Waj yachayniyoj runa nisqanman jinataj, chay palabraqa “khuyakuyta chayri imallatapis allinninpaj qoy”, niyta munallantaj. Contranchejpi imata ruwajkunatapis perdonanchej chayqa, khuyakuyniyoj kanchej. Chantá, ¿imaraykutaj wajkunata khuyakunanchej tiyan? Imajtinchus noqanchejpis wajpi khuyakunawanchejta necesitallasuntaj.

‘Imaynatachus Jehová juchasniykichejta perdonarqa, ajinallatataj qankunapis ujkunata perdonaychej.’ Arí, Jehová juchasninchejta pampachasqanrayku, noqanchejpis runa masinchejta perdonananchej tiyan (Miqueas 7:18). Jehová pesachikojkunata imaynatachus khuyakusqanpi tʼukurina. Payqa ni jaykʼaj juchallinchu. Chayrayku mana perdonananchejta necesitanchu. Jinapis tukuy sonqo perdonawanchej. Arí, ni pipis Jehová jina perdonanchu.

Jehovaj khuyakuynenqa payman qayllaykuchiwanchej, kikinta ruwanapajtaj tanqawanchej (Efesios 4:32–5:1). Chayrayku tapurikuna: “Jehová khuyakuywan perdonawan chayqa, ¿pitaj kani juchasapa masiy perdonta mañakuwajtin mana perdonanaypaj?”, nispa (Lucas 17:3, 4).