Jehová Dios, payta kusichinankupaj kallpachakojkunata, ¿allinpajchu qhawan? Wakin runasqa mana ajinachu kasqanta ninku. Yuyasqankuman jinaqa, Dios runaspi mana interesakunchu. Chaywanpis chayta nisqankoqa, Diosta mana allintachu rejsisqankuta rikuchin. Diospa Palabran Bibliaqa, Jehová kamachisnin kallpachakusqankuta allinpaj qhawasqanta rikuchin. Apóstol Pablo Hebreos 11:6 versiculopi nisqanta ukhuncharina.

¿Imatataj ruwasunman Jehovata kusichinapaj? Pablo qhelqarqa: “Mana creespaqa, mana atinchejchu Diospa ñawpaqempi allimpaj qhawasqa kayta”, nispa. Apóstol Pabloqa “mana atikunchu” nin, manataj “mana atikullanchu” nispaqa. Chaytaj Diosta kusichinapaj creenanchejpuni kasqanta rikuchiwanchej.

¿Imaynatá uj runa creeyniyoj kasqanta rikuchin? Iskaynejmanta. Ñaupajtaqa, “creenan tiyan Diosqa kasqantapuni”. Iskayrayajtenqa, mana Diosta kusichinmanchu. Chaywanpis mana chayllatachu ruwanan tiyan. Imaraykuchus supaykunapis Dios kasqanta yachanku (Santiago 2:19). “Dios kasqantapuni” creeyqa, pay munasqanman jina ruwanapaj, kausanapaj ima tanqanawanchej tiyan (Santiago 2:20, 26).

Creeyniyoj runaqa, Dios “sumaj tʼinkata” qoyta atisqanpi creellantaj. Chantapis Diosta kusichinanpaj kallpachakusqan, “mana qhasipajchu kasqanta” yachan (1 Corintios 15:58). ¿Diosta kusichisunmanchu atiyninpi chayri tʼinkayta munasqanpi ni atienekojtinchej? (Santiago 1:17; 1 Pedro 5:7.) Chantapis sajra kasqanta, mana allinpaj qhawawasqanchejta chayri mana munakuwasqanchejta yuyanchej chayqa, mana allintachu rejsinchej.

¿Pikunamantaj Dios tʼinkanta qon? Pablo nin: “Diosta tukuy sonqo maskʼanku, chaykunaman”. Bibliata waj qallusman tijrachejkunata yanapaj libroqa, griego qallupi ‘tukuy sonqo maskʼay’ nispa, mana “tarinapaj kallpachakunallamantachu” parlashasqanta nin. Manaqa Diosta “yupaychanapaj” qayllaykunamanta. Waj libro nisqanman jinataj, chay palabrasqa sinchʼita kallpachakuy niyta munan. Arí, Jehovaqa creeyninkurayku sinchʼi munakuywan payta yupaychajkunata tʼinkan (Mateo 22:37).

¿Imawantaj tʼinkanqa? Paraíso Jallpʼapi wiñay kausaywan. Chaytaj khuyakuyniyoj, munakuyniyoj kasqanta rikuchin (Apocalipsis 21:3, 4). Kunanpis, tukuy sonqo Diosta maskʼajkunaqa ashkha bendicionesta japʼinku. Arí, Diospa espíritu santonpa yanapayninwan, Bibliaj yuyaychasqanwan ima sonqo juntʼasqa, kusisqa ima kausakunku (Salmo 144:15; Mateo 5:3).

Rikunchej jina, Jehová Diosqa payta yupaychajkunaj ruwasqankuta allinpaj qhawan. ¿Manachu chayta yachay Payman qayllaykunapaj tanqasunki? Jina kajtin, Jehová tʼinkasqan creeyta wiñachinaykipaj astawan yachakuy.