CHAY kʼullku kʼajllapi kaj imastaqa, marzo 1961 watapi tarisqanku. Totora mastʼapitaj maytʼusqa kasqa. Maypichus cobremanta ruwasqa pillus, kamachina tojnus, herramientas, armas, waj imaspiwan kasqa. Tukuyninpi 400 kuraj imas karqa. ¿Imaraykutaj Bibliata leejkuna chayta yachayta munanchej? Imaraykuchus Bibliaqa, Génesis 4:22 versiculopi nin: Tubalcain, “ruwaj tukuy imata broncemanta, fierromantawan”. *

Nahal Mishmarpi tarikusqan valorniyoj imas maymantachus rikhurisqanqa, mana sutʼita yachakunchu. Chaywanpis chaykunaqa, Biblia parlan chay lugarespi, ñaupa tiempopiña cobreta orqhosqankuta, unuyachisqankuta, chaywantaj tukuy imasta ruwasqankuta rikuchin.

Israelitas Sumaj Jallpʼaman yaykunankupaj kashajtinku, Moisés paykunaman nerqa: “Orqhonkichej, orqosninmantataj cobreta”, nispa (Deuteronomio 8:7-9). Yachayniyoj runasqa, Israelpi, Jordaniapi ima ashkha qhoyasta, ingeniosta ima tarinku. Chaykunataj Timna, Khirbat en-Nahas, Feinan ima nisqapi kajkunaman rijchʼakun. ¿Imatataj chay lugares rikuchiwanchej?

Feinanpi, Timnapiwan ashkha qhoyas tiyan, nitaj ukhuchu kanku. Runaqa chaykunapi 2.000 watasta jina llankʼarqanku. Chay lugaresman rejkunaqa, qʼomer chʼejchi rumista (chaytaj cobreyoj kasqanta rikuchin) tukuynejpi tʼakarasqata rikunkuman. Ñaupa qhoya runasqa, pata patallanpi vetasmanta cobreta orqhonapaj, rumi herramientaswan juskʼusqanku. Cobre tukukapojtintaj, waj runasñataj fierro herramientaswan chay tʼoqosta aswan ukhuta kichasqanku. Job libroqa imaynatachus mineralwan chay tiempopi llankʼakusqanmanta parlan (Job 28:2-11). Chay llankʼayqa manchay trabajo kaj. Chantachá romanosqa, 201-500 wata chaynejpi aswan sajra suwasta, runa wañuchistapis, Feinanpa cobre qhoyasninpi llankʼachej kanku.

Khirbat en-Nahas (“Cobre Raqaykuna” niyta munan) nisqa lugarpi, cobre puchu rumis monton  montonlla ashkha tiyan. Chaytaj ashkha cobreta chaypi unuyachisqankuta rikuchin. Yachayniyoj runasqa, chay qayllapi kaj Feinan, Timna nisqa lugaresmanta cobreyoj rumista apamusqankuta ninku. Cobreta orqhonankupajqa, hornosta carbonwan parichej kanku. Allinta kʼajarinankama phukunaswan phukoj kanku. Ajina parisqatataj 8 chayri 10 horasta japʼina kaj. Phishqa kilo rumimanta uj kilo cobreta orqhokoj. Chaywantaj tukuy imata ruwaj kanku.

Jehovaqa israelitas Sinaí orqopi kashajtinku, Dioswan tinkukuna toldota chaynejpi kaj cobrewan ruwanankuta kamacherqa. Qhepaman templo ruwakushajtin, cobrewan llankʼallarqankutaj (Éxodo 27 capítulo). Israelitas Egiptopichus chayri ñaupajtañachus mineralwan llankʼayta yachasqankuta, mana sutʼi yachakunchu. Chaywanpis chʼin pampapi kashajtinkoqa, metalta unuyachispa waka uña lantita ruwayta aterqankuña. Chantapis mayllakuna chʼillamita, mankasta, paylasta, palasta, trinchesta ima Dioswan tinkukuna toldopaj ruwarqanku (Éxodo 32:4).

Israelitasqa ichapis Punón (ichá Feinan kunan kashan chaypi) qayllapi kashajtinku, yaku pisisqanmanta, maná nisqallata mikhusqankumanta ima thutorqanku. Chaynejpeqa ashkha cobre kaj. Jehovaqa israelitas chaypi kashajtinku, venenoyoj phiña katarista apacherqa, ashkhastaj wañorqanku. Chantá pesachikojtinku, Moisesqa paykunapaj mañaporqa. Jehovataj broncemanta katarita ruwaspa kʼaspi puntaman warkhunanta kamacherqa. Biblia nisqanman jina, “pipis chay katarita qhawarispa, khanichikusqanmanta sanoyakaporqa” (Números 21:4-10; 33:43).

Rey Salomonqa, ashkha cobrewan Jerusalenpi templota ruwarqa. Tatan Davidqa, Siriata atipaspa ashkha bronceta tantarqa (1 Crónicas 18:6-8). Jatun yaku churana chʼillamiman, 66.000 litros yaykoj, 652 quintales jinataj pesaj. Sacerdotesqa chay chʼillamimanta yakuwan llimphuchakoj kanku (1 Reyes 7:23-26, 44-46). Temploj jawa punkunpi, iskay jatuchaj sayantas karqa. Sapa ujtaj sayayninman 8 metrosniyoj karqa, rakhunmantaj 1,7 metrosniyoj. Sonqonqa soqolla karqa, phatunmantaj uj tʼajllu jina. Sapa sayantaj patanpi 2,25 metros phatuyoj kirpanas karqa (1 Reyes 7:15, 16, Qheshwa Biblia; 2 Crónicas 4:17). Chay tukuy imaspaj, ashkha cobrechá necesitakorqa.

Chay tiempopi kausakoj runasqa, broncewan ashkha imasta ruwallajtaj kanku. Bibliaqa armasta, cadenasta, punkusta, platillosta, waj imastawan ruwasqankuta nin (1 Samuel 17:5, 6; 1 Crónicas 15:19; 2 Crónicas 33:11; Salmo 107:16). Jesuspis qolqe wayaqapi cobre phatasta apaykachanamanta parlallarqataj (Mateo 10:9).

Yachayniyoj runasqa, Bibliapi parlakusqan cobremanta ruwasqa valorniyoj imasmanta, Nahal Mishmarpi tarikusqan imasmantapis, niraj tukuy imata sutʼita yachankuchu. Chaywanpis tarisqankoqa, Biblia cheqatapuni parlasqanta rikuchin. Imajtinchus israelitasqa “sumaj jallpʼaman[puni]” yaykorqanku. Orqosninmantataj ashkha cobreta orqhorqanku (Deuteronomio 8:7-9).