Españaj patanejnin Bilbao llajtapi nacekorqani. Tawa wawasmanta kurajpa sullkʼan kani. Familiantin católicos karqayku, sapa pʼunchaytaj iglesiaman rej kayku. Noqaqa profesora kayta munaj kani, 23 watasniymanpachataj 40 watasta profesora jina llankʼarqani. Astawanqa religionmanta yachachispa, mayta kusikoj kani. Tardesninta catequista karqani, imillitastataj primera comunionninkupaj wakichej kani.

Jinapi 33 watayoj kashajtiy, 12 watasta casarasqa kasqaytawan qosay wañuporqa. Sapallay 4 wawasniyta uywanay karqa. Iglesiaypi sonqochayta maskʼaspapis, mana kutichiykunata tarerqanichu. Tapukoj kani: “Jesús wañuymanta kacharichiwajtinchej, ¿imaraykú wañullanchejpuni? Kʼacha runas cieloman rejtinku, ¿imaraykú Diospa Reinon jamunanta mañakunchej? Wañupusqanchejtawan Dios juzgawajtinchej, ¿imaraykú wañusqas juicio pʼunchaypaj cielomanta, infiernomanta chayri waj lugarmanta llojsimonqanku?”.

Chayta ashkha curasta taporqani. Ujnintaj niwarqa: “Mana yachanichu. Kamachej curata tapuriy. Chantapis, ¿Diospi creenkicharí? ¡Imapajwan imatapis yachayta munankiri!”, nispa. Jinapis kutichiykunata maskʼallarqanipuni. Chaynejta pentecostalespaman, jesuitaspaman, cheqa kajta paykunallamanta sutʼinchajkunaman ima rerqani. Nitaj mayqenninkupis allinta sutʼinchawarqachu.

Chantá 60 kuraj watasniyoj kashajtiy, 7 watayoj yachachisqay imillita, Jehovaj testigosninpa tantakuyninkuman wajyariwarqa. Chaypi rikusqay, uyarisqay mayta gustawajtinpis, mana tiempoyoj kasqayrayku niña rerqanichu. Iskay watanman, Juanwan Maitewan wasiyman jamorqanku, pikunachus Jehovaj testigosnin karqanku. Kinsa killata tapuykunasniyman kutichejtinkuraj, Bibliamanta yachakuyta qallarerqani.

Jamunankutaqa mayta suyaj kani. Yachachiwasqanku cheqa kasqanta yachanaypaj, kinsa laya Bibliaswan kikinchaj kani.  Unayta pantasqa kasqani. Iglesiaypi yachakusqayqa, mana Bibliaj nisqanman jinachu kasqa. Chayrayku creesqayta tijrachinay karqa. Chayta ruwaytaj, uj jatun sachʼata saphinmantapacha tʼiray jina karqa.

Chantá qhepa qosayñataj sinchʼita onqoykuspa wañuporqa. Chay tiempopi jubilakusqayraykutaj, Bilbaomanta uj tiempota riporqani. Juanwan Maitewanpis ripullarqankutaj. Chay jawa Bibliamanta niña yachakorqanichu. Jinapis yachakusqay may valorniyoj kasqanrayku, ni jaykʼaj qonqarqanichu.

Iskay chunka watasninman, 82 watayojña kashajtiy, Juanwan Maitewan Bilbaoman kutinporqanku. Waturiwajtaj jamorqanku. ¡Maytapuni kusikorqani paykunata rikuspa! Jehovaqa mana qonqawasqachu. Chayrayku ujtawan Bibliamanta yachakuyta qallarerqani. Juanwan Maitewanqa may pacienciayoj karqanku. Sapa kuti kikin kikillanta tapoj kani. Creenciasniyta sonqoymanta orqhonaypaj, Bibliaj yachachisqanta kutin kutita uyariyta necesitarqani. Chantapis familiaresniyman, amigosniyman imaynatachus chayta sutʼinchanayta yachayta munarqani.

Chantá Jehovaj testigosninpa jatun tantakuyninkupi 87 watasniyoj bautizakorqani. Chay pʼunchayqa mayta kusikorqani. Chay kutipi bautizakojkunaman, uj hermano Bibliamanta sutʼinchawarqayku. Chaytaj sonqoykamapuni chayarqa, waqarikorqanitaj. Jehovapis parlashawanman jina karqa. Bautizakusqaytawan ashkha hermanos, mana rejsiwaspapis kusikusqankuta niwarqanku.

Jesús “ñan” kasqanta yacharqani (Juan 14:6). Chaywanpis Bibliamanta yachakuspa, pimanchus Jesús pusawanchej chayta astawan rejserqani. Kunanqa Jehová Diosman, Tatayman, Amigoyman jina qayllaykuni. Jehovaman qayllaykuna * librota leerisqaymantapacha, kausayneyqa manaña kikinchu. Chay librotaqa uj tutallapi leerqorqani. Dios may khuyakuyniyoj kasqanta yachakuspataj waqanayarqanipuni.

Chay chhika unayta cheqa yachachiyta maskʼasqaypi tʼukurispaqa, Cristoj nisqanta yuyarikuni: “Mañakuychej, qosunkichejtaj; maskʼaychej, tarinkichejtaj; punkuta takaychej, kicharisonqachejtaj” (Mateo 7:7). Tarisqay cheqa yachachiykunata wajkunaman willarispa, mayta kusikuni.

Kunan 90 watasniyojña kaspapis, Diosmanta yachakuypeqa sipasllaraj kani. Tantakuna Wasiman riyta may jatunpaj qhawani. Imaraykuchus chaypi sumaj yuyaychaykunata yachakuni, munasqa hermanosniywanpis masichakuni. Diosqa Jallpʼata uj kʼacha huertaman tukuchinanta nin. Chaypitaj ujtawan profesora kayta munani (Apocalipsis 21:3, 4). Astawanqa wañupoj familiaresniyta watejmanta rikuyta munani. Paykunamanpis cheqa yachachiykunata yachachisaj, viejayayniypiña Jehovamanta uj sumaj regalota japʼisqaytataj willarisaj (Hechos 24:15).