¿Wañusqas kausarimunankuta creenkichu? * Wañupoj familiaresninchejta watejmanta rikuyta munasunmanpuni. Jinapis, ¿ujtawan rikuyta atisunchu? Chayta yachanapajqa, Jesuspa apostolesninmanta parlarina.

Apostolesqa, wañusqas kausarimunankumanta mana iskayrayarqankuchu. ¿Imaraykú? Ñaupajtaqa, Yachachejninku Jesús wañuymanta kausarichisqa kasqanrayku. Jesusqa kausarimuspa apostolesman, “waj hermanosmampis rikhurillarqataj, phishqa pachaj kuraj tantasqa kashajtinku” (1 Corintios 15:6). Chantapis Jesuspa kausarimusqan Bibliapi qhelqasqa kashan. Tawantin Evangeliostaj, ashkha runas Jesús kausarimusqanmanta mana iskayrayasqankuta nin (Mateo 27:62–28:20; Marcos 16:1-8; Lucas 24:1-53; Juan 20:1–21:25).

Mana chayllachu, apostolesqa Jesús kinsa wañusqasta kausarichimusqanta rikorqanku: Nainpi, Capernaumpi, chantá Betaniapi (Lucas 7:11-17; 8:49-56; Juan 11:1-44). Betaniapeqa munasqa amigonta kausarichimorqa, mayqenmantachus kay revistaj qallariyninpi parlarqanchej. Chaymanta astawan ukhuncharina.

Jesusqa Martaman nerqa: “Turayki kawsarimonqa”, nispa. Hermanon Lázaro wañupusqanmanta tawa pʼunchayña kasharqa. Martaqa, qallariypi mana entienderqachu imatachus Jesús niyta munashasqanta. Chayrayku qhepa pʼunchaykunapiraj kausarimunanta yuyaspa nerqa: “Arí, noqa yachani kawsarimunanta”, nispa. Jesustaj sutʼita nerqa: “Noqa kani kawsarimuy, kawsaytaj”, nispa. Chay ratotaj Lázarota kausarichimorqa. Chayta rikuspa Martaqa, ¡maytachá tʼukorqa! (Juan 11:23-25.)

Lázaro tawa pʼunchaykunata wañusqa kashaspa, ¿maypitaj kasharqa? Payqa mana nerqachu, cieloman ripusqanta, chayri Diospa ladonpi kashasqanta. Nillataj Jesuspis, munajta mana munajta chaymanta kutichimorqachu. Chantá, ¿maypi kasharqa? Lazaroqa aya pʼampanapi puñusqa jina kasharqa (Eclesiastés 9:5, 10).

Jesús wañuyta puñuywan kikincharqa. Kausarimuytataj puñuymanta rijchʼariywan. Pay nerqa: “Lázaro kawsaqenchejqa puñushan. Kunan  risaj payta rijchʼarichimoj, nispa. Chantá yachachisqasnin nerqanku: Señor, puñushallanchus chayqa, walejyaponqachá, nispa. Jesús chayta nisqa Lázaro wañusqanmanta, yachachisqasnintajrí yuyarqanku puñurparisqallanmanta parlasqanta. Chaymanta Jesús sutʼincharqa: Lazaroqa wañupumpuni”, nispa (Juan 11:11-14). Jesusqa Lazarota wañuymanta kausarichimuspa, familianman qoporqa. Chaytaj Lazaroj familianta, ¡maytachá kusicherqa!

Jesús Jallpʼapi kashaspa runasta kausarichimusqanqa, Diospa Reinonpi Rey kashajtin, kikinta ruwananta rikuchin. * Janaj pachamanta kamachimushaspa, aya pʼampanapi wañuypi puñusqa kajkunata kausarichimonqa. Chayrayku nerqa: “Noqa kani kawsarimuy”, nispa. Munasqa familiaresninchejta ujtawan rikuspa, ¡maytachá kusikusun! Paykunapis noqanchejta rikuspa, ¡kusikullanqankutajchá! (Lucas 8:56.)

Jesús Martaman nerqa: “Pichus noqapi creejqa, wañuchumpis kawsa[rimo]nqa. Pillapis kawsashaspa noqapi creejqa mana wiñaypaj wañonqachu” nispa (Juan 11:25, 26). Jesús waranqa watas kamachiyninpi kausarichimusqan runasqa, paypi creejtinku wiñaypaj kausayta atenqanku.

Wañusqas kausarimunankumanta parlaytawan, Jesús Martata tapurerqa: “¿Chayta creenkichu?”, nispa. Martataj kuticherqa: “Arí, Señor, noqa creeni qan Cristo kasqaykita, Diospa Churin”, nispa (Juan 11:26, 27). Qanrí, ¿imatá niwaj? Marta jina kausarimuy kananpi, ¿creeyniyoj kayta munawajchu? Chaypajqa Dios imatachus runaspaj munasqantaraj yachanayki tiyan (Juan 17:3; 1 Timoteo 2:4). Chayta yachayqa, Marta jina creeyniyoj kanaykipaj yanapasonqa. Astawan yachakunaykipaj, Jehovaj testigosninwan parlariy. Paykunaqa wañusqas kausarimunankumanta astawan sutʼinchasonqanku.