Templopi qolqe churanaqa, Warmispa Pation nisqa lugarpi kaj. El templo: su ministerio y servicios en tiempos de Jesucristo libro nin: “Patioj muyuyninpi corredores kaj. Chaypitaj 13 qolqe churana cornetas [chayri yuritus] kaj”, nispa.

¿Imaraykutaj qolqe churanasta cornetas nikoj? Ñañu kunkitas, pansasapitastaj kasqankurayku. Sapa ujpitaj, imapajchus kasqan qhelqasqa kaj. Chaykunapi tantakusqan qolqeqa tukuy imapaj kaj. Jesusqa, Warmispa Pationpi kashaspa, uj viudata wajkunata jina qolqeta churashajta rikorqa (Lucas 21:1, 2).

Templopi 1, 2 yuritusqa, chay watamanta, ñaupaj watamantawan impuestota paganankupaj kaj. Chantá 3-7 yurituspi tantakoj qolqeqa, jurkʼutaspaj, palomaspaj, llantʼapaj, incienciopaj, qori vasospaj ima kaj. Diosman jaywanapaj tʼaqasqanku puchojtenqa, 8-12 yuritusman churaj kanku. Nisunman jucharayku, pantasqankurayku chayri pʼisqosta jaywanapaj tʼaqasqankumanta puchojta. Jinallataj nazareospa chayri lepra onqoymanta sanoyakojkunaj jaywanankumanta puchojta. Chantá 13 yuritoqa, munasqankuman jina churanankupaj karqa.

Lucasqa, Lucas Evangeliota, Hechos librotawan qhelqarqa. Pay kikinmantataj nerqa: “Sumajta mascʼarkani kallariymantapacha yachanaypaj”, nispa. Wakin yachayniyoj runastajrí, qhelqasqan mana cheqachu kasqanta ninku (Lucas 1:3, Dios Parlapawanchej). ¿Lucaspa qhelqasqanpi atienekusunmanchu?

Lucasqa maychus kajta qhelqarqa. Chaytaj Filipos, Tesalónica, Éfeso llajtasmanta autoridadespa cargosninkuta oqharisqanpi rikukun. Romanos sutichasqankuman jina, ‘juezkuna’, ‘llajta kamachejkuna’, “fiestasta, atipanakustawan wakichejkuna” nin (Hechos 16:20; 17:6; 19:31, NM). Jinallataj Herodes Antipasta “prefecto”, Chipremanta Sergio Paulotataj “subprefecto” nispa nin (Hechos 13:1, 7, MT, 1956).

Lucas cargosta maychus kajta oqharisqanqa tʼukunapaj. Imajtinchus Romaj llajtasnin wiñasqanman jina cargospa sutisnin tijrakoj. Bibliamanta yachaj Bruce Metzger nerqa: “Hechos libropi cargosqa, ima tiempomantachus, maymantachus parlakusqanman jinapuni oqharikun”, nispa. Yachayniyoj runa William Ramsaytaj nin: “Lucasqa unay tiempomanta aswan sumaj qhelqaj”, nispa.