Romanosqa, maqanakoj llojsispa runasta presochaspa apakapoj kanku. Wata runas jina vendesqa kajkunataj niña familiankuta rikojchu kanku.

Wakintaqa wañunankukama minaspi llankʼachej kanku. Campopi llankʼaj wata runaswan, wasipi llankʼaj wata runaswantaj, mana jinachu karqa. Wata runamanqa, fierro collarta churayta atej kanku, juchʼuy fierritopi qhelqasqayojta, chaypitaj ayqekoj wata runata kutichejman, pagakunanta nej. Sapa kuti ayqekuyta munajkunamanqa, frentenkupi letra F (fugitivus-ayqekoj) nisqawan marcaykoj kanku.

Apóstol Pabloqa, Onesimota pichus wata runa karqa, patronnin Filemonman watejmanta kacharqa, chaytataj Bibliapi Filemón libropi nin. Filemonqa wata runanta ayqesqanmanta castigayta aterqa. Pablowan, Filemonwanqa allinta kausakorqanku. Chayrayku Filemonman nerqa, Onesimota kʼachamanta, munakuywantaj japʼinanta (Filemón 9-11, 15-18).

Maypichus Fenicia suyu karqa chaypi, kay tiempopeqa Líbano suyu kashan. Chay suyoqa kulli tintanrayku rejsisqa karqa, chaytaj Tiro llajtapi ruwasqa karqa. Salomonqa, pichus Israelpa reynin karqa, templota “puka kulli telas[wan]” kʼachancharqa, chaytataj Tiro llajtamanta uj runa ruwarqa (2 Crónicas 2:13, 14).

Chay tintata orqhonankupajqa, mayta llankʼaj kanku, chayrayku chay tiempopi valesqa karqa. Ñaupajtaqa mama qochapi llankʼaj runas ashkha caracolesta orqhoj kanku, astawanqa mulex  * nisqa layamanta. Uj pʼachata tiñinallankupaj 12.000 caracolesta necesitaj kanku. Chaymantataj chʼuritunmanta khurituta orqhospa coloryachej bolsitanta jina orqhoj kanku. Chaytaqa kachiwan chajruykuspa intipi kinsa pʼunchayta saqej kanku. Chantapis tapasqa tanquepi pisi nina laurayllapi mama qocha yakuwan ashkha pʼunchaykunata saqej kanku.

Feniciosqa, chay tintata ashkha watasta ruwarqanku, venderqanku ima. Maqanakuspa atipaj kanku chay lugaresmanpis apallajtaj kanku. Chantapis mama qocha kantupi, Cádiz (España) llajtapi ima, chay tintata ruwakusqantapuni taripakun.