“DIOSQA Espiritumin” chayrayku mana rikuyta atinchejchu (Juan 4:24). Jinapis Bibliaqa, wakin runas Diosta rikusqankumanta jina parlan (Hebreos 11:27). “Mana rikukoj Dios[ta]”, ¿rikuyta atisunmanchu? (Colosenses 1:15.)

Diosta mana rikuyta atisqanchejta, nacekusqanmantapacha uj ciego runawan kikincharina. ¿Ciego kasqanraykuchu mana reparayta atenqa imachus qayllanpi kashasqanta? Mana jinapunichu. Payqa imaymanamanta reparayta atin pichus chayri imachus qayllanpi kashasqanta. Uj ciegoyasqa runa nerqa: “Rikuyta ateyqa mana ñawillanchejpichu kashan, manaqa yuyayninchejpi”, nispa.

Ajinallataj noqanchejwanpis, ñawisninchejwan Diosta mana rikuyta atispapis “yuyayni[n]chejpa ñawisnin[w]an” rikuyta atisunman (Efesios 1:18). Chaypajtaj, kinsa yuyaychaykunata qhawarina.

Ciegosqa uyarisqankuwan, llankharisqankuwan ima sumajta yanapachikunku imachus qayllanpi kasqanta yachanankupaj. Noqanchejpis, Diospa ruwasqasninmanta yachakunapaj kikillantataj ruwasunman imaynachus Pay kasqanta yachanapaj. “Diospa mana rikukoj imasnenqa sutʼita rikuchikunku paypa ruwasqasninnejta, kay pacha ruwakusqanmantapacha.” (Romanos 1:20.)

Kaypi tʼukurina, Jallpʼanchejqa mana kausay kanallanpajchu ruwasqa kashan, manaqa kusisqa kausakunapaj. Wayrarimojtin, rupharimojtin, sachʼaj poqoyninta mikhurispa, pʼesqetuspa takiyninkuta uyaririspa, ¿kusisqacharí kausakunchej? ¿Nichu chay rikuchin Dios munakuwasqanchejta, tukuy imata qoyta munawasqanchejta ima?

Cielota qhawarisparí, ¿imatá yachakunchej? Kaypi tʼukuriy, cieloqa Diospa atiyninta rikuchin. Cientificosqa cielo usqhayllata aysakushasqanta sutʼinchanku. Tuta kashajtin cielota qhawarispa tʼukuriy: “¿Chay chhika atiy maymanta jamun?”, nispa. Biblia sutʼinchan Dios “may callpayoj” kasqanta (Isaías 40:26, Quechua de Cuzce). Arí, Diospa ruwasqasnenqa, Pay “manchay atiyniyoj” kasqanta rikuchin (Job 37:23).

Iskay ciego wawitaspa maman nin: “Paykunaqa parlarejtinchej sumajta yachakunku. Chayrayku tukuy rikusqanchejta, uyarisqanchejta, imaschus kashasqantapis willarinanchej tiyan. Ñawisninku kanchej”, nispa. Ajinallatataj Diosta ni jaykʼaj ni pi rikorqachu chaypis, Churin Jesusqa Tatanta “rejsicherqa” (Juan 1:18). Jehová Diosqa niraj ni imata ruwashaspa, Jesustaraj ñaupajta ruwarqa. Chayrayku nisunman Jesusqa ñawisninchejman tukupusqanta. Pay willariyta atiwanchej imaynachus Dios kasqanta.

Jesusqa may chhika unayta Diospa ladonpi karqa. Tatanman kayta nerqa:

• Diosqa mana saykʼuspa trabajan. “Tatayqa kunankama trabajashan.” (Juan 5:17.)

• Diosqa imatachus necesitasqanchejta yachan. “Tataykichejqa yachanña imaykichejchus pisisqanta.” (Mateo 6:8.)

• Diosqa imatachus necesitasqanchejta qoyta munawanchej. “Janaj pachapi kashaj Tataykichej[qa] [...] sajra runaspaj, kʼacha runaspajpis intinta llojsichimun. Kikillantataj parachimun tukuypaj, allin runaspaj, sajra runaspaj ima.” (Mateo 5:45.)

•  Diosqa tukuyta munakuwanchej. “¿Manachu iskay pʼisqetustapis vendenku phatallapi? Chaywampis, Dios Tataykichej mana munajtenqa, ni uj pʼisqetullapis jallpʼaman urmanchu. Ajinallatataj, umaykichejpi chujchasniykichejpis tukuyninku yupasqa kashanku. Chayrayku ama manchachikuychejchu. Qankunaqa pʼisqetusmanta nisqaqa aswan valorniyoj kankichej.” (Mateo 10:29-31.)

Ciego runasqa mana rikoj runas jinachu imatapis japʼeqanku. Sutʼincharina, ichapis llanthuta, mana laqhata jinachu reparankuman, manaqa Intej kʼajaynin chay lugarman mana chayasqanta jina. Imaynatachá uj ciego kʼanchayta, llanthuta ima mana rikuyta atinchu. Noqanchejpis sapallanchejmanta pichus Jehová kasqanta mana yachayta atisunchu. Chayrayku Diosqa uj sumaj runata kachamorqa, Paypa kʼacha kaykunasninta sutʼita rikuchiyta atinanpaj.

Chay runaqa Jesús karqa (Filipenses 2:7). Payqa mana Tatallanmantachu parlawarqanchej, astawanqa rikuchiwarqanchej imaynachus Tatan kasqanta. Jesuspa ujnin yachachisqan Felipe nerqa: “Señorníy, Dios Tatata rikuchiwayku”, nispa. Jesustaj kuticherqa: “Noqata rikuwajqa Tataytapis rikun”, nispa (Juan 14:8, 9). Jesuspa kausayninmanta yachakuspa, ¿imastá Diosmanta “rikuyta” atisunman?

Jesusqa may kʼacha, llampʼu sonqo, qayllaykunapaj jina karqa (Mateo 11:28-30). Chayrayku runasqa payman qayllaykoj kanku. Jesusqa runaspa llakiyninkumanta khuyakoj, kusikojtinkutaj kusikullajtaj (Lucas 10:17, 21; Juan 11:32-35). Jesuspa kausayninmanta leespa chayri uyarispa, paywanpis kashawaj jina, uyarishawajpis jina yuyayniykipi kanan tiyan. Imaynatachus runasmanta khuyakusqanta sutʼita reparanki chayqa, imayna kʼachachus Dios kasqanta rikuyta atinki. Ajinamanta Diosman astawan qayllaykuyta atinki.

Uj yachayniyoj warmi sutʼinchan imatachus ciegos ruwayta atisqankuta imaschus qayllanpi kasqanta yachanankupaj. Pay nin: “Llankharisqanwan, muskhirisqanwan, uyarisqanwan, waj imastawan ruwaspa, yanapachikunku imapunichus kasqanta sutʼita yachanankupaj”, nispa. Ajinallatataj Diospa ruwasqasninta qhawarispa, Jesús Tatanmanta yachachisqanta yachakuspa, kʼacha kaykunasninta rikuchisqanta reparaspa ima imaynachus Dios kasqan aswan sutʼi kanqa. Ajinamanta Diosta rikushasunmanpis jina kanqa.

Biblia nisqanman jina Jobpis ajinallapitaj rikukorqa. Pay ñaupajta parlasharqa imastachus mana entiendesqanmanta (Job 42:3). Chantá Diospa ruwasqasninta sumajta qhawarispa nerqa: “Kunankama, uyarispalla qantaqa rejserqayki, Kunantajrí, ñawisniywan rikuyki”, nispa (Job 42:5).

Ichá qanwanpis kikillantaj kanman. Diosta “maskʼanki chayqa pay tarichikusonqa” (1 Crónicas 28:9). Jehovaj testigosnin mana rikukoj Diosta sumajta rikunaykipaj yanapasuyta munanku.