KAY 1765 watapi Escocia suyumanta James Bruceqa, Argelia suyoj chʼin pampanpi rumi arcota tarerqa, chaytaj “arco de triunfo romano” sutikun. Chay arcoqa tʼiyuwan tumpa pʼampasqa kasharqa. Jamesqa mana yacharqachu jatun llajta, chay lugarpi pʼampasqa kashasqanta. Chay llajtataqa romanos ruwarqanku, Africaj pata ladonpi, Thamugadi nispataj suticharqanku, kunantaj Timgad sutikun.

Kay 1881 watapitaj Franciamanta yachayniyoj runas, chay llajtata pʼampararqanku, imaynachus chay llajta kasqantaj sutʼita yachakorqa. Repararqankutaj chay lugar tʼajra kajtinpis, chay llajtapi tiyakojkunaqa, qhapaj runas jina tiyakusqankuta. ¿Imaraykú romanos chay jina tʼajra pampapi uj llajtata ruwankuman karqa? Chay llajtamanta chaypi tiyakojkunamantawan, ¿imatá yachakusunman?

Jesús jamunanpaj 100 watas kashajtin, romanosqa Africaj pata ladonpi kaj llajtasta japʼikapusharqanku. Chay lugarmanta wakin ayllustaj romanospa contrankupi sinchʼita oqharikorqanku. Mana qharqochikunankupajtaj, romanosqa Argeliaj orqo puntasninpi Tercera Legión Augusta nisqamanta soldadosta pusamuspa cuartelesta jina rikhuricherqanku, chantá torresta ruwarqanku chaymanta qhawanankupaj. Aswan qhepamantaj uj jina yuyaywanña, Timgad llajtata ruwarqanku.

Romanosqa Timgad llajtata jubilasqa soldadosnillankupaj ruwasqankuta nerqanku. Chaytaj nisqalla karqa, imajtinchus romanosqa chay llajtata ruwarqanku paykunaj contranpi oqharikojkunata pisimanta pisi chʼinyachinankupaj. Africanostaj chay llajtaman qhatoj rispa, tʼukulla qhepakoj kanku chay kʼacha llajtata rikuspa. Chantapis chay llajtapeqa romanoslla tiyakuyta atej kanku. Chayrayku ashkha africanosqa qhari wawasninkuwan khuska Roma llajtayoj kanankupaj, 25 watasta romanospa ejercitonpi sirviyta munaj kanku.

Wakin africanosqa mana chay llajtapi tiyakullaytachu munarqanku, astawanpis chay llajtapi, waj llajtaspipis kamachinankupaj atiyta japʼerqanku. Ajinamanta paykunaqa niña romanospa contranpi oqharikorqankuchu. Astawanpis Timgad llajta ruwakusqantawan 50 watasninman chay llajtapi tiyakojkunaqa casi tukuyninku africanos karqanku.

Romanosqa kamachej Cicerón nisqanman jina ruwaspa, romano llajta masisninkuta jinallataj africanostapis, uj rejllata qhawaj kanku. Chaytaj pisi tiempollapi africanospa sonqosninkuta suwarqa. Jallpʼatapis tukuyman kikinkamalla partej kanku. Chay llajtapi jallpʼastaqa saytʼunmantaj, anchonmantaj 20 metrosta medispa rakʼej kanku, callestapis kʼullkitusta ruwaj kanku. Chayrayku africanosqa chay llajtapipuni tiyakuyta munaj kanku.

Romanospa waj llajtasninkupi jina, Timgadpi tiyakojkunaqa feria kajtin, plazapi tantakoj kanku. Chaypitaj pujllaj kanku, chay llajtamanta willaykunata ima uyarej kanku. Tʼajra orqospi tiyakojkunaqa chay llajta yuyayllachá kaj kanku. Paykunaqa, sayantasninpa llanthunpi puriykachariyta, maypichus ashkha jatuchaj cuartos qʼoñi yakuwan mayllakunapaj tiyan chaypi samarikuyta, chayri amigosninkuwan yaku juturej qayllanpi parlarikuyta ima maytachá munaj kanku.

Romanospataqa teatro nisqa tiyapullajtaj, chaypitaj tukuy imata ruwaj kanku runas qhawanankupaj, chaytaj africanospa sonqosninkuta suwallarqataj. Chay teatroqa 3.500 runaspaj jina ruwasqa karqa, chaymantaj tukuy ladosmanta tantakamoj kanku. Chaypitaj khuchichakuykunata, maqanakuykunata ima qhawaj kanku, runastaj chaywan gustachikoj kanku.

Mana chayllachu chay llajtapeqa mayllakuna cuartoj perqasninpi, romanospa dioskunasninku pintasqa kashaj. Chaymantaj runasqa rillajpuni kanku, pisimanta pisitaj africanosqa romanospa dioskunasninkuta rejsiykorqanku. Arí, romanosqa africanosman religionnejta ususninkuta maytapuni yachaykucherqanku. Chayrayku wañusqata pʼampanankupajqa uj pʼalta rumita sayachej kanku, chaypitaj romanospata jinallataj africanospata dioskunasninkuta chʼeqospa ruwaj kanku.

Jesús jamusqanmantawan 100 watasninman, kamachej Trajanoqa, Timgad llajtata sayachiytawan chay jallpʼaspi trigota, olivo sachʼasta, uvatawan tarpunankupaj kallpacharqa, ajinamanta aceite, vino ima kananpaj. Chay jallpʼaspi sumajta poqosqanraykutaj, pisi tiemponmanqa poqoykunata Romaman apaj kanku. Timgad llajtaqa mayta jatunyaykorqa, runastaj chay llajtaj perqa wasasnintinpi wasista ruwaykorqanku.

Timgadpi tiyakojkuna, jallpʼasmanta dueños ima, qhapajyasharqanku, poqochejkunataj wajchasllapuni kasharqanku. Kay (201-300) watas chaypitaj poqochejkunaqa, wakillan qhapajyashasqankurayku, impuestostapis wicharichisqankurayku oqharikorqanku. Chay runasmanta wakenqa catolicosña kaspapis, donatista religionmanñataj pasaporqanku. Paykunaqa cristianos kasqankuta nispapis, Católica Iglesia mana allin imasta ruwasqanta rikuspa, contranpi oqharikoj kanku. ( “Donatistas, ¿cheqa cristianoschu karqanku?”, nisqa recuadrota leey.)

 Unayta paykunapura, religionespura maqanakusqankurayku, waj llajtaspis jallpʼasninkuta japʼikapusqankurayku, Timgadqa niña Romaj atiyninpichu karqa. Kay (501-600) watas chaypitaj Arabia suyumanta ayllusqa, Timgadta phiriykorqanku. Chaypitaj tʼiyu pʼampaykorqa, 1.000 watas kurajtataj ajina kakorqa.

Yachayniyoj runasqa Timgadpa plazanpi, latín qallupi uj qhelqasqata tarispa asirikorqanku. Chaypi nisharqa: “Animalesta japʼiy, mayllakuy, pujllay, asirikuy ima, chaymá kausayqa”, nispa. Franciamanta yachayniyoj runa nin: “Chay qhelqasqaqa runas mana ñaupariyta munasqankuta rikuchin, jinapis wakenqa jinata kausakuy sumaj kasqanta ninku”, nispa.

Romanosqa ajina kausayman yachasqa karqanku. Kay (1-100) watas chaynejpi Apóstol Pablo kausakorqa. Payqa runas “mikhuna ari, ujyanataj, imaraykuchus qʼaya wañupullasunchej” niyta yachasqankuta nerqa. Romanosqa religionniyoj kaspapis, imatapis ruwallaj kanku, mana allinta yuyaycharikuspalla. Chayrayku Pabloqa cristianosta chay runasmanta karunchakunankuta nerqa. Nillarqataj: “Sajra runaswan pureyqa kʼacha ususta chinkachin”, nispa (1 Corintios 15:32, 33).

Timgad llajtamanta runas 1.500 watas jinaña wañupojtinkupis, kay tiempomanta runasqa paykuna jinallataj yuyanku, ninkutaj: “Kausashaspaqa mikhunataj, ujyanataj, imaraykuchus wañuspaqa ni imata apasunchu”, nispa. Bibliataj niwanchej: “Kay pachaj imasninwan kusisqa kajkuna manapis kusisqachu kankuman jina kachunku imaraykuchus kay pachaqa askamalla tukukaponqa”, nispa (1 Corintios 7:30, 31).

Timgadqa chʼinpacha kashan. Chaytaj rikuchiwanchej kusisqa kanapajqa, mana chay llajtamanta runas jinachu yuyana kasqanta. Astawanpis 1 Juan 2:17 nisqanta yuyarina, chaypi nin: “Kay pachaqa tukukapushan, jinallataj chay sajra munaynimpis; Diospa munayninta ruwajrí, wiñaypaj kawsanqa”, nispa.