Bakú llajtapi (Azerbaiyán) nacekorqani, iskay hermanaslla kayku, noqaqa sullkʼa kaj kani. Tatayqa musulmán karqa, mamaytaj judía. Jinapis kusisqa kausakorqanku. Tatay ramadán nisqa killapi ayunajtin mamayqa mana churanakojchu, mamay Pascuata ruwajtintaj tataypis nillataj churanakojchu. Corán, Torá nisqa libros, Biblia ima kapuwarqayku.

Noqaqa musulmana kasqayta yuyarqani. Dios kasqantapuni yachaspapis, wakin imasta mana entienderqanichu. Tapukojtaj kani: “¿Imaraykú Dios ruwawarqanchej? ¿Imajtin tukuy kausayninchejpi ñakʼarinchej chantá infiernopipis ñakʼarinallataj tiyan?”, nispa. Runasqa, Diospa munaynin kasqanta ninku, chayrayku tapukoj kani: “¿Diospa makinpi muñecos jinachu kanchej? ¿Dios kusikunchu runasta ñakʼarejta rikuspa?”.

Chantapis 12 watayoj kashaspa sapa día musulmanespa costumbrenkuman jina phishqa kutita mañakoj kani (namaz). Chay tiempopi tatayqa judío escuelaman churawarqayku. Chay escuelapeqa hebreo parlayta, religionta ima yachakorqayku. Chantapis sapa pʼunchay judiospa costumbrenkuman jina mañakoj kayku. Chayrayku wasiypeqa musulmanespa costumbrenman jina mañakoj kani, escuelapitaj judiospa costumbrenman jina.

Maytapuni tapuykunasniyman kutichinawankuta munarqani. Sapa kutitaj escuelapi yachachejkunata tapoj kani: “¿Imaraykutaj Dios ruwawarqanchej? ¿Imatá Dios yuyan tatay musulmán kasqanmanta? Tatayqa kʼacha runa, jinapis ¿imaraykutaj mana allinpajchu qhawanku? ¿Imaraykutaj Dios payta ruwarqa?”, nispa. Kutichiwajtinkupis, manapuni sutʼichu karqa.

Kay 2002 watapi manaña Diospi creerqanichu. Chay watapi Alemaniaman riporqayku, semanallataraj kashajtiykutaj, tatay  umanmanta onqoykorqa, internaykukorqataj. Ashkha watasta familiaypaj Diosmanta mañapoj kani. Dioslla salvayta atiwasqanchejmanta mana iskayrayarqanichu, chayrayku sapa pʼunchay tatayta yanapananpaj mañakorqani. Dios atiyniyoj kasqanrayku, mañakusqayman jina ruwananpi atienekorqani. Uyarinawantapuni yacharqani, jinapis tatayqa wañuporqa.

Dios runasmanta mana interesakusqanta jina qhawarqani, llakisqataj kasharqani. Chayrayku yuyarqani: “Manachus mañakuyta yachani chayri Dioschus mana kan”. Imatachus ruwanayta mana yachaspa, niña Diosmanta mañakorqanichu. Nitaj waj religionesmanpis riyta munarqanichu, jinamanta yuyarqani Dios mana kasqanta.

Sojta killasninman Jehovaj testigosnin wasiyman chayamorqanku. Cristiana religionesmantaqa mana allintachu yuyaj kayku, chayrayku hermanaywan kʼachallamanta pantasqa kashasqankuta rikuchiyta munarqayku. Nerqaykutaj: “¿Imaraykutaj cristianos yupaychanku santosta, cruzta, Jesusta, Mariatawan, Chunka Kamachiykuna mana kamachishajtin?”. Paykunaqa Bibliawan kutichiwarqayku, cheqa cristianosqa santosta mana yupaychanankuchu kasqanta, Diosllamantataj mañakunanku kasqanta. Chaytaj tʼukushajta saqewarqa.

Nillarqaykutaj: “¿Trinidadmantarí imatá yuyankichej? Jesús, Dios chay, ¿imaraykú Jallpʼaman jamorqa, wañucherqankutaj?” Bibliallawantaj sutʼinchawarqayku Jesusqa mana Dioschu kasqanta, nitaj Dios kikinchu kasqanta. Chayrayku Trinidadpi mana creesqankuta niwarqayku. Tʼukushaj qhepakorqani mana chay jina cristianosta rejsisqaymanta.

Jinapis tapukullarqanipuni: “¿Imaraykutaj runa wañun, chantá imaraykutaj Dios ñakʼarinanchejta saqen?”, nispa. Chaymantataj El conocimiento que lleva a vida eterna; * nisqa librota qowarqanku. Chaypitaj tapuykunasniyman kutichisharqa. Chayrayku paykunawan Bibliamanta yachakuyta qallarerqani.

Sapa kuti yachakusqaypi, tapukusqayqa Bibliaman jina kutichisqa karqa. Diospa sutin Jehová kasqanta yachakorqani, munakuyniyoj kasqantataj (Salmo 83:18; 1 Juan 4:8). Paytaj ruwawarqanchej kausananchejta munasqanrayku. Sajra kausay kananta saqespapis chejnikusqanta, tumpamantawantaj chinkachinanta entienderqani. Yachakullarqanitaj Adanwan Evawan juchallikusqankurayku mana allinchu kausayninchej kasqanta (Romanos 5:12). Chayrayku wañuy kasqanta. Jinapis mosoj pachapeqa, tukuy ñakʼariy chinkanqa, wañusqaspis kausarimonqanku (Hechos 24:15).

Biblia cheqata yachachisqan tapuykunasniyman kutichiwarqa. Watejmanta Diospi creerqani. Pisimanta pisitaj Jehovaj testigosninta allinta rejserqani. Jallpʼantinpi uj familia jina kasqankutataj repararqani. Ujchasqa kasqanku, munanakusqanku ima tʼukuchiwarqa (Juan 13:34, 35). Yachakusqayqa Diosta sirvinaypaj yanapawarqa, Jehovaj testigontaj kayta munarqani. Bautizakorqanitaj 2005 watapi 8 enero killapi.

Bibliamanta cheqa kajta yachakusqayrayku, kausayta niña ñaupajta jinachu qhawani, niñataj llakikunichu. Tatayta Dios kausarichinanta yachaspa sonqochakuni, kusikunitaj (Juan 5:28, 29).

Sojta wataña Jonathanwan casarasqa kani. Paypis Diosta yupaychan. Iskayniykutaj yachakuyku Diospa Palabranqa cheqa, entiendeyta atinapaj jinallataj kasqanta, nitaj imawan kikinchakusqanta. Chayrayku imatachus yachakusqaykumanta runasman willariyta mayta munayku. Kunanqa yachani Jehovaj testigosnin cheqa cristianospuni kasqankuta.