KAY pasaj wataspi ashkha religionesmanta jovenesta 800 kurajta tapukorqa, mañakusqankuta Jesús uyarisqanpi creesqankutachus manachus. Paykunamanta khuskan kurajtaj nerqanku Jesús uyarisqanta creesqankuta, jinapis ujqa mana Jesuschu uyarisqanta nerqa, manaqa “Dios”.

¿Qanrí imatá yuyanki? ¿Pimantataj mañakunanchej tiyan? ¿Diosmantachu chayri Jesusmantachu? * Chayta yachanapajqa, imatachus Jesús discipulosninman yachachisqanta qhawarina.

Jesusqa mana Diosmanta mañakunata yachachillarqachu, manaqa paypis mañakorqa.

YACHACHISQAN: Uj kutipi ujnin discipulon Jesusman nerqa: “Señor, yachachiwayku Dios Tatamanta mañakuyta”. Jesustaj nerqa: “Diosmanta mañakuspaqa, niychej: Janaj pachapi kashaj Tatayku” (Lucas 11:1, 2). Aswan qhepamantaj Orqopi yachachishaspa Diosmanta mañakunanchejta kamacherqa. Nerqa: “Tataykimanta mañakuy”. Nillarqataj: “Tataykichejqa yachanña imaykichejchus pisisqanta, manaraj paymanta mañakushajtiykichej” (Mateo 6:6, 8). Chantapis Jesús wañupunan pʼunchay ñaupaj chʼisinpi discipulosninman nerqa: “Tukuy imata sutiypi mañakojtiykichejqa, Dios Tata qosonqachej” (Juan 16:23). Rikunchej jina, Jesusqa Tatan Jehová Diosmanta mañakunanchejta yachacherqa, pichus Tatallanchejtaj (Juan 20:17).

RUWASQAN: Jesusqa Diosmanta jinata mañakorqa: “Tatáy, janaj pachajta kay pachajtawan Señornin, jatunchayki” (Lucas 10:21). Waj kutipitaj Jesusqa “janaj pachata qhawarispa, nerqa: Tatáy, graciasta qoyki uyariwasqaykimanta” (Juan 11:41). Wañupushaspañataj nerqa: “Tatáy, makisniykiman espirituyta churani” (Lucas 23:46). Arí, Jesusqa Jehová Diosmanta mañakuna kasqanta yachacherqa pichus “janaj pachajta, kay pachajtawan Señornin” (Mateo 11:25; 26:41, 42; 1 Juan 2:6). Chaytataj ñaupa tiempomanta cristianospis ruwarqanku.

Jesús janaj pachaman ripusqanmata semanasnillanman discipulosnintaqa autoridades ñakʼarichisharqankuña (Hechos 4:18). Paykunataj yanapata mañakorqanku. ¿Pimantá? “Tukuyninku uj sonqolla Diosman qhaparikorqanku” “ajllasqa kamachi[n] Jesuspa sutimpi” kallpata mañakunankupaj (Hechos 4:24, 29, 30). Arí, paykunaqa Jesús kamachisqanman jina Diosmanta mañakorqanku.

Aswan qhepamantaj apóstol Pablo qhelqarqa: “Señorninchej Jesucristoj Tatan Diosmanta mañakushaspa, graciasta qoykupuni qankunamanta”, nispa (Colosenses 1:3, 4). Chaytaj rikuchin Pablo, wajkuna ima Diosmanta mañakusqankuta. Pablo hermanosninman qhelqallarqataj: “Señorninchej Jesucristoj sutimpi tukuy imamanta Dios Tataman graciasta qoychejpuni” (Efesios 5:20). Pabloqa chay qhelqasqanwan  rikuchin, “Dios Tataman[ta]” mañakunankupaj kallpachasqanta, Jesuspa sutinpipunitaj (Colosenses 3:17).

Ñaupa tiempomanta cristianos jina Diosmanta mañakuspaqa Jesuspa kamachisqanman jina ruwananchej tiyan; ajinamanta munakusqanchejta rikuchinchej (Juan 14:15). Bibliata qhelqaj uj runa nerqa: “Tata Diosta munakuni, mañarikusqayta uyariwasqanrayku. Payqa mañakusqayta uyariwampuni. Chayraykutaj tukuy kawsayniypi payllatapuni wajyakusaj” (Salmo 116:1, 2). Noqanchejpis kikillantataj nisun Jehová Diosllamanta mañakusun chayqa. *