¿IMATÁ uj qosa ruwanman warmin kusisqa kananpaj? Ashkhas ninkuman qosa qolqeta familianpaj mana pisichinan kasqanta. Chaytataj ruwanankupuni kasqanta yuyakun. Jina kajtinpis, ¿imaraykutaj ashkha warmis qolqeyoj kaspapis mana kusisqachu kanku? Rosa pichus Españamanta, qosanmanta jinata nin: “Runaj ñaupaqenpeqa kʼacha karqa, wasipitaj millay runa karqa”. Chantá Nigeria suyumanta Joy sutiyoj warmi nillantaj: “Qosay ruwayta munasqanta mana munajteyqa, pay niwaj: ‘Nisqayta ruwanayki tiyan imaraykuchus qosayki kani’”.

¿Imaynatá qosa ruwananta juntʼanman? ¿Imatá ruwanman wasin “kʼacha kawsayta” tarinapaj jina kasqanta warmin qhawananpaj? (Rut 1:9, 10.)

Diosqa qharita, warmitapis uj rejllata qhawan, chaywanpis Biblia nisqanman jinaqa familia ukhupi ruwanasninkoqa mana kikinchu. Romanos 7:2 nin warmeqa ‘qosanpa kamachiyninpi’ kananta. Imaynatachus uj empresapi uj runa ñaupajta apan, ajinallatataj Diosqa familiata ñaupajman apananpaj qosata churarqa. Chayrayku qosaqa warminpa uman (1 Corintios 11:3).

¿Imaynatá qosa, Dios kamachiyta qosqanman jina ruwanman? Efesios 5:25 nin: “Warmiykichejta munakuychej, imaynatachus Cristoqa Iglesiata munakorqa, ajinata”. Jesucristoqa mana casarakorqachu, jinapis paypa kausaynenqa sumaj qosa kanaykipaj yanapasonqa. ¿Imaynamantá?

Jesusqa kallpachakorqa runasta llakiymanta samarichinanpaj. Jesusqa llakisqa kajkunaman jinata nerqa: “Noqaman jamuychej [...] noqataj samarichisqaykichej” (Mateo 11:28, 29). Jesusqa runasta sanoyacherqa, Diosman qayllaykunankupajtaj yanaparqa. ¡Chayraykuchá paywan kayta munarqanku!

Imaynatá Jesús jina ruwawaj. Imaynallamantapis warmiykita yanapariy. Ashkha warmis Rosa jina rikukunku, pay nerqa: “Qosayqa sirvientanta jina qhawawaj”. Uj qosataj  Kweku sutiyoj jinata nin: “Warmiytaqa tapurinipuni yanapata necesitasqantachus manachus. Mayta munakusqayrayku wasipi yanapani mana pay niwajtinpis”.

Jesusqa kʼacha karqa, wajkunaj allinnintataj maskʼarqa. Uj warmeqa 12 watastaña sinchʼi onqosqa kasharqa. Jesús milagrosta ruwashasqanta uyarispataj sonqonpi yuyarqa: “Sichus pʼachallantapis llankhaykuyman chayqa, sanoyapuyman”, nispa. ¡Jinataj karqa! Jesusman qayllaykuspa pʼachanta llankhaykorqa chay ratotaj sanoyaporqa. Wakin runas chay ruwasqanta mana allinpajchu qhawajtinkupis, Jesusqa yacharqa sinchʼi llakisqa kashasqanta. * Chayrayku ajinata nerqa: “Wawáy, [...] onqoyniykimanta sanoyasqaña kanki”, nispa. Chayta ruwasqanwan Jesusqa rikucherqa wajkunaj allinninta maskʼasqanta (Marcos 5:25-34).

 Imaynatá Jesús jina ruwawaj. Warmiyki mana allinchu kashan chayqa, astawanraj kʼacha kasqaykita rikuchiy, pacienciakuytaj. Chantapis imaraykuchus jina kashasqanpi tʼukuriy. Ricardo nin: “Warmiy llakisqa jina kashajtenqa, mana astawan llakichinaypaj kallpachakuni”.

Jesusqa yachachisqasninwan parlarej. Jesusqa amigosninwan parlarejpuni. Chayrayku paykunaman nerqa: “Tataypa tukuy ima niwasqanta rejsichiykichej”, nispa (Juan 15:15). Jesusqa tʼukurinanpaj, Diosmanta mañakunanpaj ima sapallan kayta munaspapis, ashkha kutispi yachachisqasninwan imatachus yuyasqanmanta parlarej. Sutʼincharinapaj, wañuchinanku chʼisipis may llakisqa kashasqanta nerqa (Mateo 26:38). Yachachisqasnin mana nisqanman jinachu ruwajtinkupis paykunawan parlarillajpuni (Mateo 26:40, 41).

Imaynatá Jesús jina ruwawaj. Warmiykiwan parlariy. Yuyasqaykita, imaynachus kashasqaykitapis willariy. Wakin qosasqa wajkunaj ñaupaqellanpi parlanku, wasipitajrí chʼinlla kanku, ashkha warmistaj chaymanta quejakunku. Anaqa qosanwan parlarisqanmanta jinata nin: “Munakuwasqanta reparani, ujchasqataj kayku”.

Ama chʼinllaqa qhepakuychu. Uj warmi yuyarikuspa nin: “Qosayqa phiñakuspa, diasta mana parlapawajchu. Chaytaj juchayoj kasqayta, pisipaj qhawawasqantataj yuyachiwarqa”. Edwintajrí Jesús jina ruwananpaj kallpachakun. Pay nin: “Phiñasqa kashaspaqa mana chay ratochu imatapis nini. Suyariniraj allinllaña kanaykama”.

Joy sutiyoj warmi, pimantachus parlarerqanchejña, reparan qosan Jehovaj testigosninwan Bibliamanta yachakusqanmantapacha manaña ñaupajpi jinachu kasqanta. Joy nin: “Qosayqa, Jesús jina aswan kʼacha kananpaj mayta kallpachakushan”. Bibliaqa may chhika qhariwarmikunata yanapashan. Qanpis yanapachikuy. Jehovaj testigosninta Bibliamanta yachachisunankuta niy; nitaj chaymanta pagankichu.