Omar: Sutʼillata nisqayki, noqaqa mana iglesiaman rinichu. ¿Imamantá parlarisunmanrí?

Carlos: Walejta chayta niwanki. Suteyqa Carlos, ¿qanpatarí?

Omar: Omar.

Carlos: Walej don Omar, kunanmantapacha rejsinakusunchej ari.

Omar: Ya.

Carlos: Don Omar ujta tapurisqayki. ¿Aswan ñaupajta iglesiaman rejchu kanki?

Omar: Arí, wawa kashaspa rej kani. Universidadman risqaymantapachataj manaña.

Carlos: Hmmm. Chantá, universidadpi, ¿imatá estudiarqanki?

Omar: Historiatawan, Ciencias socialestawan. Historiamanta estudiashaspaqa, yachakorqani imatachus runas unaymantapacha kay tiemponchejkama ruwasqankumanta.

Carlos: Chayqa noqamanpis gustawan. Ichá yachankiña, Bibliaqa unay tiempo runasmanta parlallantaj. ¿Maykʼajllapis Bibliamanta astawan yachayta munaspa, ukhuncharerqankichu?

Omar: Mana, má yuyarqanichu Biblia unay tiempo runasmanta parlasqanta.

Carlos: Chaymanta uj chhikanta sutʼincharisunayta, ¿munawajchu?

Omar: Ya, jinapis má Bibliayojchu kashani.

Carlos: Ama llakikuychu chaymanta. Noqajta kapuwan. Ñaupajtaqa 1 Crónicas 29 capitulomanta, 26 versiculota, 27 versiculotawan leerina. Nin: “Isaipa churin Davidqa Israelpi ajinata kamachisqa. Israelpa reynin kasqa tawa chunka watasta, chaykunamantataj Hebrón llajtapi qanchis watasta kamachisqa, Jerusalenpitaj kinsa chunka kinsayoj watasta”.

Omar: Chaypi, Davidmanta parlashasqa, ¿i?

Carlos: Arí. Uj tiempoqa, Bibliaman churanakoj runas Davidpa kausaynenqa uj cuentolla kasqanta nerqanku.

Omar: Wá, ¿imaraykú?

Carlos: Imaraykuchus Biblialla Davidmanta parlaj. Chaywanpis kay 1993 watapi, runas unayniyoj rumita tarerqanku. Chaypitaj “Davidpa wasin” nisharqa.

Omar: Hmmm tʼukurpachiwankipuni.

Carlos: Mana chayllachu. Astawanpis wakin runasqa nipuni creejchu kanku Poncio Pilato kausasqanta. Chaywanpis payqa Jesuspa tiemponpi, Judea llajtata kamacherqa. Paymanta Bibliaqa Lucas 3 capitulonpi, 1 versiculonpi parlan. Kay versiculoqa chay tiempomanta kamachej runasmanta sutisninkuta willan, Pilatoj sutinpis chaypi rikhurillantaj.

 Omar: Arí, kaypi nishan: “Poncio Pilatoqa Judeapi kamachej karqa, Herodestaj Galileapi”.

Carlos: Arí, yachayniyojkunaqa unaytapuni mana creerqankuchu Poncio Pilato kausasqanta. Chaywanpis 50 watas jinallaraj Europa ladopi, runas uj rumita tarerqanku. Chay rumipitaj Poncio Pilatoj sutin kasharqa.

Omar: Chaytaqa nipuni yacharqanichu.

Carlos: Walejtachá qanwan parlarej chimpaykamorqani.

Omar: Noqaqa yachani, Biblia uj sumaj libro kasqanta. Jinapis má creenichu kausayninchejpi yanapanawanchejta. Ñaupa tiempo runasllamanta parlashanqa, ¿i?

Carlos: Ashkha runas kikillantataj creenku, chaywanpis noqaqa Biblia yanapanawanchejtapuni creeni. Imajtinchus runasqa, unaymantapacha kikillantapuni necesitashanchej, nisunman mikhunata, pʼachata, wasita ima. Mana chayllachu, runasqa amigosniyojpuni kayta munanchej. Munallanchejtaj familiasninchej kusisqallataj kanankuta, ¿jinachu nichu?

Omar: Ajinapuni kanpis.

Carlos: Bibliaqa unayniyoj libro kaspapis, allinta kausakunapaj yanapayta atiwanchej.

Omar: ¿Yanapawasunmanpunichu?

Carlos: Arí, allinta entiendenanchejpajqa Bibliaj yachachiykunasninmanta parlarina. Bibliaj yachachiykunasnenqa, ñaupa tiempo runasta mayta yanaparqa. Noqanchejtapis yanapallawasunmantaj.

Omar: ¿Imaynamanta á?

Carlos: Bibliaqa qolqeta waqaychayta yachanapaj, familianchejwan chayri runa masisninchejwan allinta apanakunapaj sumajtapuni yanapawanchej. Tatasmantawan qosasmantawan parlarina. Uj sumaj tata kayqa chayri uj sumaj qosa kayqa mana atikullanchu, ¿i?

Omar: Arí, má atikullanchu. Warmiywan noqawanqa wataña casarakusqayku kashan, nitaj atiykuchu uj yuyayllawan imatapis ruwayta.

Carlos: Bibliapeqa juntʼayta atinapaj jinalla sumaj yuyaychaykuna tiyan, chaykunataj yanapariwanchejpuni. Leerisunman Efesios 5 capitulota 28 versiculota, ¿leeriwajchu?

Omar: Ya, nin: “Ajinata qosaspis sapa ujpis warminkuta munakuchunku cuerponkuta jina. Warminta munakojqa pay kikinta munakun”.

Carlos: Gracias. Kay yuyaychayman jina qosas ruwankuman chayqa, ¿nichu aswan allinta warminkuwan apanakunkuman?

Omar: Jinatajchá kanman. Chaywanpis chayqa má atikullanchu.

Carlos: Arí, imajtinchus tukuypis pantaj runas kanchej. Chantapis leenchej chay capitulollapitaj ama wampus kananchejta nishawanchej. Manachayqa allin yuyayniyoj runas kananchejta. * Qhariwarmi kausaypeqa sapa ujninku allin yuyaywan imatapis ruwananku tiyan, manataj sapa uj munasqanman jinallachu. Bibliaqa warmiytawan noqatawan, yanapawayku allin yuyaywan imatapis ruwanaykupaj.

Omar: Allin rijchʼawan.

Carlos: Jehovaj Testigosninpataqa Internetpi, jw.org nisqapi qhariwarmispaj, familaspajwan ashkha yanapas tiyan. Uj ratitulla chay yanapasta qhawarichisqayki, ¿munawajchu?

Omar: Qhawarichiway á.

Carlos: Kay chay www.pr418.com/qu nisqa. Kaypitaj chay yanapas kashan.

Omar: Chay fotosqa kʼachitupuni.

Carlos: Arí, paykunaqa Jehovaj testigosnillantaj kanku, waj lado suyuspitaj Diosmanta yachachishanku. Kunanqa kay patitanpi “PUBLICACIONES” nishan chayman yaykuna. Chaypitaj mosoj revistas, waj publicacionespiwan tiyan. Chaykunapitaj sumaj yachachiykuna tiyan, familiaspajpis yanapas kallantaj. ¡Diosmanta jamoj sumaj willaykuna! folletota qhawarisunman, kay folletoj ujnin yachaqananpeqa nishan “¿Imaynatá familias kusisqas kausakunkuman?”

 Omar: Hmmm, chay tapuypa kutichiyninta yachayta munayman.

Carlos: Kay yachaqanapeqa ashkha yuyaychaykuna tiyan. Chaykunataj familiaykiwan kusisqa kausakunaykipaj yanaparisunkiman. Kay 2 kaj tapuyninta qhawariy. Chay parrafonta, kaysitumantapacha leeriwajchu.

Omar: Ya, nin: “Casarasqasqa, munanakunanku, jatunpajtaj qhawakunanku tiyan. Juchasapas kasqankuraykutaj, kusisqa kausakunankupaj, perdonanakuyta yachananku tiyan”. Hmmm kayqa allinpuni rijchʼawan.

Carlos: Gracias leerisqaykimanta. Chantá kay laditonpi Efesios 5:33 versiculota leenanchejta nishan. Bibliapi maskʼana, ¿leeriwajchu?

Omar: Ya, leerisaj: “Chaywampis qankunamanta sapa uj munakuchun warminta pay kikinta jina. Warmipis qosanta jatumpaj qhawachun tukuy imapi.”

Carlos: Reparankichu kaypeqa niyta munashan, imatachá wajkuna ruwapunawanchejta munanchej, chayllatataj noqanchejpis ruwapunanchejta.

Omar: Má entiendeshaykichu.

Carlos: ¿Nichu qosas warmisninku respetanankuta munanku? Chantapis tukuy warmisqa qosasninku munakunankuta munanku, ¿i?

Omar: Arí, chayqa jinapuni.

Carlos: Qosaschus tukuy imata ruwaspa warmisninkuta munakusqankuta rikuchinkuman chayqa, warmisninkoqa respetankuman.

Omar: Hmmm ari, ¿i?

Carlos: Kay leerqanchej chay versiculoqa 2.000 watas jinaña qhelqakorqa. Sutʼinchashantaj imatachus qhariwarmi kusisqa kausakunankupaj ruwanankumanta. Qhariwarmi kay versículo yuyaychasqanman jina ruwankuman chayqa, kusisqa kausakunkuman.

Omar: Hmmm. Nipuni yuyarqanichu Bibliapi sumaj yuyaychaykuna kasqanta.

Carlos: Arí, Bibliaqa sumajtapuni yuyaychariwanchej. Kay yachaqanaj kinsa kaj tapuynenqa nin: “Casarasqa kausaypi chʼampay kajtin, ¿tʼaqanakunankuchu tiyan?” Kay tapuymanta imatachus yuyasqaykita yachayta munayman, ¿kutimunayta munawajchu? *

Omar: Ya, kutimullanki á. Warmiyman nisaj kay yachaqanata khuska leerinaykuta.