Julia: Imaynalla doña Lucía. Jesuspa Wañuyninta Yuyarinapaj tantakuyman jamusqaykimanta, mayta kusikuni. * ¿Imayná rijchʼasorqa?

Lucía: May kʼachitupuni karqa. Wakin imasllata má entiendeyta aterqanichu. Yachani Navidadpeqa Jesús nacekusqanta, Semana Santapitaj kausarimusqanta, chaytataj yuyarinapuni kasqanta. Wañuyninta yuyarinapuni kasqantaqa ni yacharqanichu.

Julia: Arí, Navidadtawan Semana Santatawanqa ashkha runas mayta suyanku. Jehovaj testigosnintajrí Jesuspa wañuyninta sapa wata yuyariykupuni. Tiempituyki kajtenqa chaymanta uj chhikanta sutʼinchariykiman.

Lucía: Ya, parlarinapis á.

Julia: Jesusqa wañuyninta yuyarinanchejta kamacherqa, chayrayku Jehovaj testigosnenqa sapa wata chayta yuyariyku. Jesusqa wañuchinankupaj apananku kasharqa chay chʼisipi yachachisqasninwan khuska mikhorqa. Chayta, ¿yuyarikunkichu?

Lucía: Arí.

Julia: Chaytaqa Señorpa Cenan nikun. Jesusqa yachachisqasninwan mikhushaspa kayta kamacherqa. Kay Lucas 22:19 versiculota, ¿leeriwajchu?

Lucía: Ya, kaypi nin: “Chaymantaqa, tʼantatañataj oqharispa, Dios Tatanman graciasta qorqa, partispataj paykunaman jaywarqa. Pay nerqa: Kayqa cuerpoymin, qankunarayku qosqa. Kayta ruwaychej noqamanta yuyarikuspa, nispa”.

Julia: Sumajtapuni leerinki. Kay versiculoj tukukuyninta qhawariy, Jesusqa “[k]ayta ruwaychej noqamanta yuyarikuspa” nisqa, ¿icharí? Payqa yachachisqasninman kamachisharqa paykunarayku kausayninta qoshasqanta yuyarinankuta. Kay Mateo 20:28 versiculopipis, chayman rijchʼasqata nishallantaj: “Runaj Churimpis mana sirvichikojchu jamorqa. Astawanqa payqa jamorqa runasta sirvej, kawsaynintataj qoj, ashkha runas salvasqa kanankupaj”. Chayrayku Jehovaj testigosnenqa Jesuspa wañuyninta yuyariykupuni, payqa salvanawanchejrayku kauysayninta qorqa. Salvakuyta munanchej chaytaj, kasukuyta yachananchej tiyan.

Lucía: Jesús wañupusqanwan salvawasqanchejta uyarej kani. Nitaj allintachu entiendeni imaynachus chay kasqanta.

 Julia: Ama llakikuychu doña Lucía, Jesús salvawasqanchejmanta parlayqa, mana ujllapi entiendeyta atinapaj jinachu. Munajtiykeqa astawan sutʼinchariykiman. Chaymanta yachakoyqa may kʼachitupuni.

Lucía: Ya, sutʼinchariway.

Julia: Walej. Qaninpallaraj chaymanta leesharqani. Entiendenaykipaj jinalla sutʼincharisqayki.

Lucía: Ya.

Julia: Allinta entiendenapajqa Adanmantawan Evamantawan parlarina. Paykunaqa Edén huertapi kashaspa Diospa contranpi juchallerqanku. Chantá, ¿imapí tukorqanku? Chayta yachanapajqa, kay Romanos 6:23 versiculota, ¿leeriwajchu?

Lucía: Arí, kaypi nin: “Juchaj pagonqa wañuymin; Diospa regalonrí wiñay kausay Cristo Jesús Señorninchejpi”.

Julia: Mayta agradeceyki doña Lucía. Kay versiculomanta parlarina, kaysitupi “Juchaj pagonqa wañuymin” nishan, ¿icharí? Kay kamachiytaqa qallariymantapacha Dios rikhuricherqa. Sutʼita entiendenapaj Adanmantawan Evamantawan parlarinallapuni. Diosqa paykunata mana juchayojta ruwarqa. Wawasninku tiyapunman karqa chaypis, mana juchayojllataj kankuman karqa. Ni mayqen runataj jucharayku wañunmanchu karqa, wiñaypaj kausankuman karqa. Yachanki jinataj, paykunaqa pantaykorqanku, ¿yuyarikunkichu?

Lucía: Arí, paykunaqa sachʼaj poqoyninta mikhuykorqanku, ¿i?

Julia: Arí doña Lucía. Adanwan Evawanqa Diosta mana kasusqankurayku juchasapasman tukuporqanku. Chaytaj wawasninta sinchʼi llakiykunapi rikhuricherqa.

Lucía: ¿Wawasninta? Chantá, ¿noqanchejchu juchallerqanchej imatajri?

Julia: Mana doña Lucía. Sutʼincharisqayki. ¿Uj adoberata rejsinkichu?

Lucía: Arí, rejsini.

Julia: Uj wistʼu adoberapi adobeta ruwankuman chayqa, ¿imaynataj chay adobes kanqanku? Wistʼullataj, ¿icharí?

Lucía: Arí, chayqa ajinapuni.

Julia: Adanwan Evawanpis Diosta mana kasusqankurayku, chay wistʼu adoberaman jina tukuporqanku. Paykunaqa niraj wawasniyoj kashaspa juchallerqanku. Chaymantapachataj wawasninpis juchasapasllataj nacekorqanku. Chantapis Bibliaqa “jucha” palabrata oqharin mana sajra ruwaykunamanta parlanallanpajchu, manaqa ñaupa tatasninchej juchallisqankurayku, juchasapasllataj kasqanchejta reparachinawanchejpaj oqharin. Adanwan Evawan juchallikorqanku chaypis, paykuna juchallisqankurayku noqanchejpis juchasapasllataj kanchej. Romanos 6:23 nin jinataj: “Juchaj pagonqa wañuymin”.

Lucía: Má allinchoqa. ¿Adanwan Evawan juchallisqankuraykuchu noqanchejpis wañunallanchejtaj tiyan?

Julia: Arí, chayqa má allinpunichu. Astawan sutʼincharisqayki, Adanwan Evawanqa Diosta mana kasusqankurayku wañupunankupuni karqa. Diostajrí wawasninkumanta mayta khuyakuspa, juchamantawan wañuymantawan kacharichinanpaj Churin Jesusta kachamorqa. Leerirqanchej jina kay Romanos 6:23 versiculopeqa “Juchaj pagonqa wañuymin” nishan, ¿icharí? Chantá nishallantaj: “Diospa regalonrí wiñay kausay Cristo Jesús Señorninchejpi” nispa. Chayrayku nisunman, Jesús  wañupusqanrayku juchamantawan wañuymantawan kacharichisqa kayta atisqanchejta. *

Julia: Tumpitatawan kay versiculomanta sutʼinchariyta munayki.

Lucía: Ya.

Julia: Kaysitupi: “Diospa regalonrí wiñay kausay Cristo Jesús Señorninchejpi” nishan, ¿icharí? Jesús noqanchejrayku wañorqa chayqa, ¿nichu allin kanman karqa ninan: “Jesuspa regalonrí”, nispa? *

Lucía: Imaynachus, ¿i?

Julia: Adanmantawan Evamantawan parlarinallapuni. Paykunaqa mana kasusqankurayku, Diospa contranpi juchallikorqanku. Chaytaj maytachá Diospa sonqonta nanacherqa. Chay chʼampayta allinchananpajtajrí, Jehová Diosqa Churinta kay Jallpʼaman kachamorqa, mana juchayoj cuerponta qospa runasta juchamanta kacharichinanpaj. * Chaytaj noqanchejpaj Diosmanta jamoj, uj sumaj regalo jina. Chantapis chay regaloqa, Dios maytapuni munakuwasqanchejta rikuchin. Sutʼincharisqayki, wawanta wañuchishajtinku, ¿imayna llakisqataj Dios kashanman karqa? ¿Maykʼajllapis tʼukurerqankichu?

Lucía: Mana, kunanpuni chaytaqa uyarishani.

Julia: ¿Wawitasniyojchu kanki? Pujllanasninku kaypi kashasqa.

Lucía: Arí, uj qhari wawawan, uj warmi wawawan tiyapuwan.

Julia: Doña Lucía qan mama jina, ichapis entiendewaj. Jehová Diosqa janajpachamantapacha Wawanta wañuchishajtinku qhawamusharqa. Wawantaqa maqarqanku, asipayarqanku, uj kurkumantaj clavaykorqanku. Wawanta mayta ñakʼarispa wañupojta rikuspa, ¿imayna llakisqataj kashanman karqa?

Lucía: Imatachus llakikorqapis ari.

Julia: Imaynatapunichus llakikusqanta mana sutʼitachu yachanchej chaypis. Bibliaqa sutʼinchawanchej imaraykuchus Wawanta ñakʼarejta saqesqanta. Kay Juan 3:16 versiculopi chayta sutʼinchashan. ¿Leeriwajchu?

Lucía: Ya, kay jinata nin: “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa”.

Julia: Gracias doña Lucía. Kay versiculoj qallariyninpi: “Diosqa chay jinatapuni kay pachapi kaj chhikata munakusqanrayku” nishan, ¿icharí? Diosqa mayta munakuwasqanchejrayku Wawanta noqanchejrayku wañunanpaj kachamorqa. Chayrayku Jehovaj testigosnenqa, sapa wata Jesuspa wañuyninta yuyariykupuni. ¿Sutʼillachu kashan doña Lucía?

Lucía: Arí, sutʼipuni. Maytapuni agradeceyki sutʼinchariwasqaykimanta.