Paul pichus casado, iskay wawasniyojtaj jinata nin: “Suyuykupi tukuy ima wichariykojtin, mikhuna pisiyarqa, may valesqataj karqa. Mikhunata rantinapajqa unayta filakoj kayku, ashkha kutispitaj rantinapajña kashajtiyku ni ima kajñachu. Runasqa yarqhaymanta tulluyapuspa kikin callepi wijchʼurakoj kanku. Tukuy ima ujllata wichariykorqa, may chhika qolqetaj valerqa, qolqe manaña valenankama. Pierderqani bancopi qolqeyta, chantá asegurakunaypaj, jubilakunaypajtaj pagashasqayta”.

Paulqa familianta uywanallanpajpuni sumajta yuyaychakunan karqa (Proverbios 3:21). Pay nin: “Electricista karqani. Jinapis tukuy imamanta llankʼarqani, pisillata pagawajtinkupis. Wakenqa mikhunata pagawaj kanku chayri waj imasta. Tawa jabonesta pagawajtinkoqa iskaywan qhepakoj kani, iskaytataj venderpaj kani. Uj kutipi 40 chillwista uywarqani. Jatuchajña kajtinkutaj venderparqani 300 chillwistataj ranterqani. Chaymantataj 50 wallpasta iskay saco sara jakʼuwan cambiarqani, sapa sacoqa 110 librasniyoj karqa. Chaytaj unayta aguantawarqayku, waj familiasmanpis qorerqayku.”

Paulqa yachallarqataj Diospipuni atienekuna kasqanta. Kasukojtinchejqa, Dios yanapawanchejpuni. Chantapis necesitasqanchejmanta mana llakikuna kasqanmanta, Jesús jinata nerqa: “Tataykichejqa yachanña chay imasmanta pisichikusqaykichejta”, nispa (Lucas 12:29-31).

Jinapis Diospa enemigon Satanasqa tukuy runasta yuyachin, kapuyniyoj kananchej aswan allin kasqanta. Runasqa tukuy imayoj kayta munaspa, mana necesitaspapis tukuy atisqankuta ruwanku chayta tarinankupaj. Ashkhastaj manu rikhurinku,  jinamanta “pichus manukojqa manojpa wata runan” kasqanta yachanku (Proverbios 22:7).

Wakenqa mana tʼukurispa imatapis ruwanku. Paul nin: “Ashkha rejsisqasniy, familiankuta, amigosninkuta ima saqespa karu llajtasman riporqanku ‘sumajta kausayta munasqankurayku’. Wakenqa mana documentoyoj kasqankurayku mana llankʼayta tarillarqankuchu. Wakin kuteqa policiamanta pakakunanku karqa chayri callepi puñunanku karqa. Mana Diospa yanapayninta maskʼarqankuchu. Jinapis noqaykoqa chay llakiyniykuta Diospa yanapayninwan atiparqayku”.

Paul nillanpuni: “Jesús nerqa: ‘Ama phutikuychejchu ari, qʼaya pʼunchaymanta, imaraykuchus qʼaya pʼunchayqa pay kikinmanta llakiyniyoj. Sapa pʼunchaypa llakiynenqa chay pʼunchayllapaj kachun’, nispa. Chayrayku sapa pʼunchay Diosmanta tʼantaykuta qonawaykuta mañakoj kani. Jesús nisqanman jinataj Diosqa nisqanta juntʼarqapuni. Chaywanpis mana munasqaykutapunichu tarej kayku. Uj kuti tiendapi filakusharqani nitaj yacharqanichu imatachus vendeshasqankuta. Rantinayña kajtintaj yogurlla kasqa. Yogurqa mana gustawanchu. Jinapis chaylla karqa, chayta mikhuspataj puñukaporqayku. Maytapuni Diosman agradecekuni chay llakiy tiempopi, mikhuna mana faltawasqaykumanta. *

”Kunanqa manaña qolqemanta pisiykuchu. Chay jina llakiypi tarikuspa yachakorqayku Jehovallapi * atienekuna kasqanta. Munayninman jina ruwajtinchejqa, pay yanapawasunpuni. Chantapis Salmo 34:8 nisqa cheqapuni kasqanta repararqayku. Chaypi nin: ‘Qhawaychej, yachaychejtaj Tata Diosqa kʼacha kasqanta. Kusikuyniyojmin paypi atienekoj runaqa’. Chayrayku watejmanta ajinapi rikukunaykumanta mana anchata llakikuykuchu.

”Runaqa kausananpaj mikhunallata necesitan, mana llankʼaytachu, nitaj qolqetachu. Chayrayku chay pʼunchay chayamunallantaña mayta munanchej. Maypachachus Jallpʼapeqa ‘ashkha trigo ka[nqa]’. Chaykamataj kapuwasqanchej mikhunawan, pʼachawantaj sonqo juntʼasqa kana. Bibliaqa nin: ‘Kawsayniykichejpi amapuni qolqemanta wañusqachu kaychej. Manachayqa imachus kunan kapususqaykichejllawan sonqo juntʼasqa kaychej, imaraykuchus Dios nerqa: “Mana wijchʼurparisqaykichu, nitaj saqerparisqaykichu”’. * Chaytaj mayta kallpachawanchej.”

Dios yanapanawanchejpajqa paypi atienekuna Paul jina familian jinataj (Génesis 6:9). Kunan chayri aswan qhepaman qolqenchej pisiwajtinchej, Paulpa kausayninmanta mayta yachakusunman.

Jinapis, ¿imatá ruwasunman familiarayku llakiy kajtin?