Wakenqa yuyankuman, wañuymanta kausarimuypi creey qhasilla kasqanta. Apóstol Pabloqa mana jinatachu yuyarqa, imaraykuchus pay nerqa: “Kay kunan kawsayllapichus Cristopi suyakushanchej chayqa, tukuy runasmanta aswan khuyay wajchas jina qhawasqas kanchej. Kunanqa yachanchej Cristo kawsarimpusqanta; wañusqakunamanta ñawpajta kawsarimpun uj ñawpaj poqoy jina” (1 Corintios 15:19, 20). Pabloqa wañusqas kausarimunankutapuni yacharqa, Jesús kausarimusqanrayku (Hechos 17:31). * Chayrayku Pabloqa nerqa Jesusmanta parlaspa, “ñawpajta kawsarimpun” wiñaypaj kausananpaj. Jesús ñaupajta kausarimusqanqa rikuchin wajkunapis kausarimunankuta.

Chantapis wañusqasqa kausarimonqankupuni, imaraykuchus Jehovaqa “mana jaykʼaj llullakoj” Dios (Tito 1:2). Payqa mana llullakunchu. Chayrayku, Diosqa mana qhasillata ninmanchu wañusqasta kausarichinanta, chayta ruwananpajtaj atiyniyoj kasqanta, nisqanta mana juntʼananpajqa.

Jehovaqa, munakuyniyoj kasqanrayku wañusqasta kausarichinanta nin. Jobqa, Diosta taporqa: “Sichus uj runa wañun chayqa, ujtawan kausanmanchu? [...]. Qan wajyawanki, noqataj uyarisqayki; munakuywan qhawawanki imaraykuchus ruwawajniy kanki” (Job 14:14, 15, QB). Jobqa yacharqa Dios kausarichiyta munasqanta. ¿Dios munashallanpunichu wañusqasta kausarichiyta? Biblia nin: “Noqa Tata Diosqa kasqay jinallapuni kani” (Malaquías 3:6). Arí, Diosqa wañusqasta, kausarichiyta munashallanpuni, kusisqas kausakunankupaj. Chaytaqa tukuy tatas munankuman wawanku wañupojtin. Diostaj mana munallanchu  astawanqa atiyniyoj chayta ruwananpaj (Salmo 135:6).

Jehovaqa, Wawanman atiyta qon wañusqasta kausarichinanpaj, chaytaj familiankumanta pillapis wañupojkunapaj may kusiy kanqa. Chaytaj Jesuspaj may sumaj. Imaraykuchus niraj amigon Lazarota kausarichishaspa, “waqarikorqa” hermanasninta amigosnintawan llakisqata rikuspa (Juan 11:35). Waj kutipitaj uj viudaj kʼata wawan wañupusqanta rikuspa, khuyaspa viudata nerqa: “Ama waqaychu”. Chay ratotaj wawanta kausaricherqa (Lucas 7:13). Chaytaj rikuchiwanchej pi wañupojtinpis Jesusqa sonqonta nanachikusqanta. Chayrayku payqa wañusqasta kausarichejtin, runas kusikusqankuta rikuspa maytachá kusikonqa.

¿Pinillaykipis wañuporqachu? Ichapis yuyanki tukuy ima wañuypi tukukusqanta. Jinapis mana jinachu. Diosqa wañusqasta kausarichenqa, chaytataj Wawan ruwanqa. Diostaj chaypi kanaykita munan familiaresniykiwan tinkukunaykipaj. Imastachus aswan qhepaman paykunawan khuska ruwanaykipi tʼukuriy, chaypeqa wiñaypaj tiyakunkichej.

Lionel, pimantachus parlarerqanchejña, pay nin: “Wañusqas kausarimunankumanta willawajtinku mana creeyta aterqanichu, llullakushawasqankutataj yuyarqani. Cheqapuni kasqantaqa Bibliapi yacharqani. ¡Mayta munashani abueloywan tinkukuyta!”.

¿Astawan yachakuyta munawajchu? Jehovaj testigosnin, Bibliawan imaraykuchus wañusqas kausarimunankuta yachachisonqanku. *