Poloniaj ujnin llajtitanpi nacekorqani, Alemaniawan fronterapi. Lugarniypeqa kusisqa kausakorqani. Tatasneyqa kʼachas karqanku, noqatataj niwaj kanku kʼacha kanayta, escuelapi sumajta yachakunayta, universidadman ima rinayta.

Universidadman yaykunaypaj waj llajtaman riporqani. Chaymantapachataj chʼampaykunasniyoj karqani. Mana tatasniywan tiyasqayraykutaj, mana allin amigoswan masichakorqani. Pelotata jaytʼay mayta gustawaj, amigosniyraykutaj astawan chayman qokoj kani. Varsovia llajtamanta equipo mayta gustawaj. Chayrayku chay equipo mayllapipis pujllajtin rejpuni kani. Chayman rispataj amigosniywan machaj kayku, drogakoj kayku, wakin kutitaj maqanakoj ima kayku chay waj equipomanta kajkunawan. Ajinata kausaspaqa yuyaj kani llakiyniymanta qonqapunayta. Policía japʼiwanman karqa chayqa, estudiashasqaypi mana yanapawanmanchu karqa.

Amigosniywanqa tutasninpi cantinasman, fiestasman ima rej kayku. Chayman rispataj maqanakullajpuni kayku. Policiawan japʼichikuspaqa, allinchanaypaj tukuy imata ruwaj kani. Wakin kuteqa llukʼiykoj ima kani. Allinta kausakushasqayta yuyaspapis, mana allintachu ruwashasqayta yacharqani. Chayrayku sapa domingo iglesiaman rej kani sonqoy mana juchachanawanpaj.

Kay 2004 watapi, iskay Jehovaj testigosnin wasiypi Diosmanta willariwarqanku. Paykunawantaj sapa kuti Bibliamanta parlarej kani. Uj cheqa cristiano imaynatachus kausakunan kasqanta yachakojteyqa, sonqoy astawan juchachawarqa. Chayrayku manaña machanaychu, nitaj drogakunaychu karqa. Diosta mana kasukoj runaswanpis manaña masichakunaychu karqa. Kʼacha runataj kanay karqa. Manaña sajra imasta ruwanay kasqanta yachaspapis, ruwashallarqanipuni.

Chaywanpis sajra ruwayta saqeporqani. Imajtinchus uj chʼisi pusaj runaswan maqanakorqani. Paykunataj callepi wijchʼurpawarqanku, chaypipis maqallawarqankupuni, umaypitaj jaytʼawarqanku. Wañupunayta yuyarqani. Chayrayku Diosmanta jinata  mañakorqani: “Jehová pesachikuni Palabraykita mana kasukusqaymanta. Mana wañusajchu chayqa Bibliata Testigosniykiwan estudiasaj. Niñataj ñaupajta jinachu kausasaj”, nispa. Manchayta maqaykuwajtinkupis mana wañorqanichu. Nisqaytataj juntʼarqani.

Kay 2006 watapi Inglaterra suyuman riporqani. Imajtinchus qolqeta tantarikuyta munarqani chaywantaj Poloniaman kutispa waj titulotawan orqhonaypaj. Bibliamanta yachakushajtiy uj versículo mayta tʼukurichiwarqa. Apóstol Pabloqa jinata nerqa: “Cheqamanta tukuy imata qhasi manakajpaj qhawani Señorniy Jesucristota rejsinaqa may sumaj kasqanrayku. Chayrayku chay tukuy ñawpa imasta saqepuni, qʼopata jina qhawaspa, Cristojta kanaypaj”, nispa (Filipenses 3:8). Pabloqa, noqa jinallataj leyesta estudiasqa, sajra runataj kasqa (Hechos 8:3). Jinapis repararqa aswan sumaj kasqanta Diosta sirviy, Jesús jinataj ruway. Pabloj kausayninpi tʼukurispaqa, kayta repararqani: ashkha qolqeyoj kaspa, sajra runataj kaspaqa llakiyllapipuni kanayta. Chayrayku noqapis Pablo jina sajra kausayninta saqeyta munarqani. Inglaterrapitaj qhepakorqani, universidadta tukuchajpis niña rerqanichu.

Jehovata astawan rejsispaqa, astawan payman qayllaykuyta munarqani. Jehovaqa payman kutirikojkunata perdonan, chayta yachaspataj mayta kusikorqani (Hechos 2:38). Kay 1 Juan 4:16 “Diosqa munakuymin” nisqanpi tʼukurispa, entiendeni imaraykuchus Dios sajra ruwayta chejnisqanta.

Jehovaj testigosninpa ruwasqankupis tʼukuchillawarqataj. Imaraykuchus paykunaqa Bibliaj nisqanman jina kausakushanku. Noqapis Jehovaj testigon kayta munarqani. Chayrayku sajra kausayniyta saqespa 2008 watapi bautizakorqani Jehovaj testigon jina.

Manaña sajra runachu kani, ni machanichu, nitaj drogakunichu. Ni pelotata jaytʼaymantapis wañuniñachu. Imajtinchus Bibliaj nisqanman jina kausakuni. Wajkunamantaj Bibliamanta willarispa mayta kusikuni. Pelotata jaytʼay gustawanraj, jinapis manaña ñaupajta jinachu.

Warmeyqa Esther sutikun. Iskayniykutaj Inglaterrapi polaco qalluta parlaj runasman Bibliamanta yachachiyku, chayqa mayta kusichiwayku. Kunanmá kusisqaqa kani, imajtinchus ni imamanta sonqoy juchachawanchu, kausayniytaj mana qhasipajchu.