PANAYIOTA sutiyoj warmi, mar Mediterráneo nisqaj ujnin churunpi tiyakorqa. Jovencitamantapacha politicapi chhapukorqa. Aswan qhepamantaj tiyakorqa chay lugarninpi uj partidopaj secretariamanta llankʼarqa. Chay partidopaj qolqeta tantananpajtaj wasimanta wasi purej. Tiempo pasasqanman jinataj sonqo pʼakisqa kasharqa. Imaraykuchus chay partidomanta kajkuna compañeros kasqankuta nejtinkupis astawanqa puraj uyas karqanku, paykunallapaj imatapis munaj kanku, envidianakojtaj kanku.

Danielqa Irlanda suyupi tiyakorqa, familiantaj iglesiaman mana faltayta rej. Jinapis Danielqa yuyarikun curas machasqankuta, qolqerayku pujllasqankuta, tantasqanku qolqemanta suwasqankuta ima. Yuyarikullantaj paytaqa ajinata nisqankuta: “Juchallikunki chayqa infiernoman rinki”, nispa.

Jeffery sutiyoj runa, barcosniyoj empresaspaj vendespa llankʼarqa. Chay empresaspa oficinasnintaj Reino Unido suyupi, Estados Unidospitaj kasharqa. Jefferyqa yuyarikullanpuni, paypa caserosnin, chantá kikin llankʼayta ruwajkuna, autoridadeswan negociosta ruwaspa chʼaukiyasqankuta. Chantapis chay runasqa puraj uyas kasqankurayku tukuy imata nej kanku vendenankupaj.

Chay jina ruwaykunaqa tukuynejpi rikukun. Runasqa puraj uyas kasqankuta rikuchinku politicapi, religionpi, negociospi ima. Griego parlaypeqa puraj uya nikoj teatropi llankʼajkunata mascarata churakusqankurayku. Aswan qhepamantaj chʼaukiyaj runasta chayri paykunallapaj imatapis munajkunata puraj uya nikoj.

Runasqa wajkuna puraj uya kasqankurayku phiñasqa, rabiasqataj purinku. Chayraykutaj ninkuman: “¿Maykʼajkamataj puraj uya runas kanqankuri?”, nispa. Bibliaqa nin puraj uya runas chinkanankuta.

Bibliaqa nin uj angel puraj uya kayta qallarisqanta. Qallariypeqa Kuraj Supay katarinejta Evata chʼaukiyarqa, yanapayta munaspa jina (Génesis 3:1-5). Chaymantapachataj runaspis tukuy imata ruwanku kʼachaman tukuspa wajkunata chʼaukiyanankupaj, paykunallapi yuyaspataj.

Ñaupa tiempopi israelitasqa lantista yupaychayta qallarerqanku, chayraykutaj Diosqa ashkha kutispi nerqa, imaspichus rikukunankuta.  Diosqa profetan Isaiasnejta nerqa: “Kay runasqa simillankuwan jatunchawanku, simillankuwan yupaychawanku, sonqonkutajrí noqamanta karupi kashan” (Isaías 29:13). Israelitasqa mana kasukorqankuchu nitaj pesachikorqankuchu. Chayrayku Diosqa saqerqa waj llajtas Jerusalenta templonta ima thuñinankuta. Ñaupajtaqa babilonios 607 watapi Jesús niraj jamushajtin chinkacherqanku, romanostaj 70 watapi. Chaytaj rikuchin Diosqa puraj uya runasta chinkachinanta.

Chantapis Dioswan Jesuswanqa cheqan kajta ruwajkunata munakunku. Uj kuti Jesusqa, Natanaelta rikuspa nerqa: “Kaymá cheqamanta israelitaqa, paypitaj ni ima llullakuypis kanchu”, nispa (Juan 1:47). Natanaelqa Bartolomé sutikullarqataj, paytaj Jesuspa 12 apostolesninmanta ujnin karqa (Lucas 6:13-16).

Jesucristoqa yachachisqasninman, Dios imatachus munasqanmanta yachacherqa. Paykunaqa chʼuwa sonqos kananku karqa. Chantapis Jesús chay tiempomanta religionta kamachejkunata juchachasqanmanta yachakunanku karqa. Kunanqa imaynachus chay runas kasqankuta qhawarisun.

“Cheqan kajta” ruwaj kanku qhawachikunallankupaj. Jesús nerqa: “Ama runaspa ñawpaqellampichu cheqan kajta ruwaychej, paykunawan rikuchikunallaykichejpajqa [...] puraj uya runas”, nispa. Chantapis yachachillarqataj wajkunata yanapaspaqa mana tukuymanchu willaranankuta. Chantá mana tukuypa rikunantachu Diosmanta mañakunanku karqa. Ajinata ruwaspalla Diosta tukuy sonqo yupaychasqankuta rikuchinkuman karqa, Diospa ñaupaqenpitaj allinpaj qhawasqa kankuman karqa (Mateo 6:1-6).

Runasta qhawaraj kanku. Jesusqa chay jina runasta nerqa: “Puraj uya. Qampa ñawiykimantaraj kurkuta ñawpajta orqhokuy. Chaymantataj sutʼita rikuspa, wawqeykej ñawinmanta qʼopata orqhonki”, nispa (Mateo 7:5). Wajkunata qhawarajkunaqa astawan pantaspapis mana kasqankuman jinachu ruwanku. Chaywanpis Bibliaqa nin: “Tukuy runas juchallikusqankurayku, paykunaqa Diospa jatun kaynimpa kʼanchayninta mana taripayta atinkuchu”, nispa (Romanos 3:23).

Sajrata yuyaj kanku. Uj kuti fariseos ukhumanta kajkuna, herodianospiwan Jesusta taporqanku impuestosta pagaymanta. Niraj tapushaspataj nerqanku: “Yachachej Señor, yachayku qan cheqan sonqo kasqaykita, Diospa ñannintataj cheqanta yachachisqaykita”, nispa. Chantá pantachiyta munaspa taporqanku: “Allinchu kanman impuestota Cesarman pagana, manachu?”, nispa. Jesustaj nerqa: “Puraj uyas. Imaraykutaj pantachiwayta munankichej?”, nispa. Jesusqa maychus kajllata nisharqa, imajtinchus paykunaqa “pantajtin, Jesusta chʼataykunankupaj” taporqanku (Mateo 22:15-22).

Cristianosqa Pentecostés 33 watapi cheqa kajta maychus kajtataj ruwarqanku. Chantapis mana puraj uya kanankupaj mayta kallpachakorqanku. Apóstol Pedroqa cristianosta kallpacharqa hermanosninkuta cheqamanta chʼuwa sonqowan munakunankupaj (1 Pedro 1:22). Apóstol Pablopis cristianosta nerqa: “Kay kamachisqaqa churasqa kashan cheqamanta munakuy kanampaj chʼuwa sonqomanta, mana juchachaj sonqo yuyaymanta, tukuy sonqo creeymantataj”, nispa (1 Timoteo 1:5).

Bibliapeqa Jesuspa, apostolesninpa yachachisqantaj kashan. Ñaupa tiempopi jinallataj kay tiempopipis runasta yanapan. Chayrayku apóstol Pablo nerqa: “Diospa Palabranqa kawsayniyoj, atiyniyojtaj; puraj filoyoj espadamanta aswan filo. Chay Palabraqa runaj sonqon ukhukamapuni chayan. Jinallataj yuyasqanta, sonqompi imatachus munasqantapis sutʼita rikuchin  allinchus, manachus kasqanta”, nispa (Hebreos 4:12). Bibliamanta yachakuspa chayman jinataj kausajkunaqa, manaña puraj uyaschu kanku, nitaj pitapis chʼaukiyankuchu. Qallariypi parlarerqanchej chay runasmanta parlarinallataj.

Panayiotaqa Jehovaj testigosninpa tantakuyninkuman risqanmantapacha, kausayninta tijracherqa. Chay tantakuypitaj repararqa ni pi puraj uyachu kasqanta. Pay nin: “Paykunaqa runa masinkuta tukuy sonqo munakunku. Politicapi kashaspaqa mana chayta rikorqanichu”, nispa.

Panayiotaqa Bibliamanta yachakorqa, ñaupaj kausayninta saqeporqa chantá bautizakorqa. Chaymanta kunankamataj 30 watasña pasan. Pay nin: “Diospa Reinonmanta willaspa kusiyta tarerqani, chaynejllata cheqan kausay kanqa”, nispa.

Danielqa qotuchakuypi ñauparerqa wakin imasmantataj cargoyoj karqa. Tiempo pasasqanman jinataj juchallikorqa, concienciantaj juchacharqa. Daniel nin: “Iglesiapi mana allin ruwaykunata rikusqaymanta yuyarikullarqanipuni. Chayrayku qotuchakuypi ima cargoyojchus kasqayta saqepunay karqa. Hermanoswan mana puraj uya kayta munarqanichu.”

Aswan qhepamantaj Danielqa qotuchakuypi ruwanasninta ruwananpaj jinaña kasqanta reparakorqa. Imaraykuchus manaña sonqon juchacharqachu kusisqataj ruwanasninta juntʼarqa. Diosta tukuy sonqo sirvejkunaqa ajinata ruwanku. Chayrayku paykunaraj kausayninkuta qhawarikunku wajkunata qhawaranankumantaqa.

Jefferyqa unayta negociospi llankʼarqa, pay nin: “Bibliamanta yachakusqayman jina astawan repararqani, vendenayrayku mana chʼaukiyanayta nitaj llullakunayta. Kunanqa Bibliaj nisqanman jina kausakuni. Bibliamanta ashkha versiculosta yuyarikuni, Proverbios 11:1 nisqanta jina. Chaypi nin: ‘Tata Diosqa millachikun’ chʼaukiyaj runata”. Jefferyqa mana Jesusta impuestosta paganamanta tapoj runas jinachu karqa. Imaraykuchus ni pita chʼaukiyajñachu, waj religionmanta kajtinkupis.

Jehovaj testigosnenqa Jallpʼantinpi Bibliapi yachakusqankuman jina kausakunankupaj kallpachakunku. Chantapis mayta kallpachakunku ‘mosoj runa kaywan pʼachawan jina pʼachallikunankupaj, mayqenchus Diosman jina ruwasqa’ kashan (Efesios 4:24). Jehovaj testigosnin yanapasunkuman pikunachus kasqankuta, imaspitajchus creesqankuta yachanaykipaj. Chantapis aswan qhepaman mosoj kausay kananmanta yachachisunkuman. Chaypeqa mana pipis puraj uya kanqachu, cheqan kausayllataj kanqa (2 Pedro 3:13).