Puerto Limón nisqa lugarpi kausakorqani, chayqa Costa Rica suyoj inti llojsimuynin ladopi kashan. Familiaypi 8 wawas karqayku, noqataj 7 kaj karqani. Tatayqa 8 watasniyoj kashajtiy wañuporqa. Chayrayku mamallayña uywawarqayku.

Béisbol nisqapi pujllay mayta gustawaj. * Wawamantapacha deportesqa gustawajpuni. Jovencituña kashaspataj uj juchʼuy equipoman yaykorqani. Chay equipopi kashaspa 20 watasniyoj jina karqani. Nicaraguamanta uj jatun equipopi pujllanaypajtaj wajyariwarqanku. Chay tiempopi mamayta onqosqa kasqanrayku qhawasharqani. Chayraykutaj Nicaraguaman mana rerqanichu. Chay equipoman mana yaykunaytataj nerqani. Tiemponmantaj wajyariwarqanku equipo nacional de béisbol de Costa Rica nisqaman yaykunaypajñataj. Chay equipopeqa juchʼuy equipomanta ajllasqa kajkuna karqanku. Chay equipomantaj yaykorqani. Chay equipopi 1949 watamanta, 1952 watakama karqani. Ashkha kutistataj pujllarqani Cuba, México, Nicaragua suyuspi. Chay equipopitaj qhepamanta sumajta pujllaj kani. Chunka qanchisniyoj partidospitaj ni ujta pantarqanichu. Mayta gustawaj runas sutiyta qhaparisqankuta uyariy.

Jinallapi khuchichakuy juchapi urmarqani. Chicayoj kaspapis, waj warmiswan purej kani. Machana ujyanasta mayta tomaj kani. Uj día sinchʼita machaykorqani, qʼayantin rijchʼarispataj mana yacharqanichu imaynatachus wasiyman chayasqayta. Chantapis juegos de dominó nisqapi apuestaj kani, billetes de lotería nisqatataj rantej kani.

Chay tiempopi mamayqa Jehovaj testigonman tukorqa. Munarqataj creenciasninmanta yachakunayta, pujllayllapi yuyasqayraykutaj mana munarqanichu. Pujllanaypaj wakichikushajtiy ni yarqhaypis kajchu. Pujllayllapi yuyasharqani. Beisbolqa mayta gustawaj.

Chantá 29 watayoj kashaspa pujllashajtiy sinchʼita nanarpachikorqani. Sanoyapuspapis manaña jatun equipopi pujllarqanichu.  Jinapis beisbolman satʼisqallapuni kasharqani, uj juchʼuy equipotataj wasiy chaypi entrenaj kani.

Kay 1957 watapi Jehovaj testigosninpa jatun tantakuyninkuman rerqani. Chaytaj karqa beisbolta pujllaj kani chay estadionpi. Chay jatun tantakuypi kashaspataj rikorqani Jehovaj testigosnin, mana beisbolpi pujllajkunata qhawajkuna runas jinachu kasqankuta. Chay jatun tantakuypi rikusqayqa yanapawarqa Jehovaj testigosninwan Bibliamanta yachakunaypaj, tantakuykunasninkuman rinaypajwan.

Bibliamanta yachakushasqayqa mayta tʼukuchiwarqa. Jesús nerqa qhepa pʼunchaykunapi yachachisqasnin mundontinpi Diospa Gobiernonmanta willanankuta (Mateo 24:14). Yachakullarqanitaj cheqa cristianosqa mana qolqeta mañaspalla Diosmanta willasqankuta. Jesús nerqa: “Qankunaqa mana pagaspalla japʼerqankichej, qospaqa amallataj pagachikuychejchu”, nispa (Mateo 10:8).

Bibliamanta yachakusqayman jina Jehovaj testigosninpa ruwasqankuta Bibliaj nisqanwan kikincharqani. Diospa Gobiernonmanta Jallpʼantinpi willanankupaj kallpakusqankoqa mayta tʼukuchiwarqa. Repararqanitaj paykuna khuyakuyniyoj kasqankuta Jesús yachachisqasninman nisqanman jina. Chayrayku Marcos 10:21 versiculopi Jesús “qhepayta jamuy” nisqanta leespa, Jehovaj testigon kayta munarqani.

Wakin imastataj mana ajllayta atillarqanichu. Ashkha watasta, sapa semana apuestasta ruwaj kani suerteta qowaj numeroywan. Bibliapitaj yachakorqani “Suerteta qoj diosta” yupaychajkunata, Jehová Dios mana allinpajchu qhawasqanta, nillataj qolqeta munapayajkunatapis (Isaías 65:11, NM; Colosenses 3:5). Chayrayku manaña pujllarqanichu. Billetes de lotería nisqata rantiyta saqepusqaymanta ñaupaj domingon suerteta qowaj numeroy ganarqa. Runasqa asipayawarqanku chay semana mana pujllasqaymanta. Pujllanayta niwajtinkupis, niña pujllarqanichu. Nitaj jaykʼajpis apostarqaniñachu.

Mosoj runa kaywan pʼachallikusqayman jina kausakusqayqa watejmanta pruebaman churakorqa Jehovaj testigon jina bautizakusqay diapi (Efesios 4:24). Chʼisiyaykuyta alojamientoyman kutipushajtiy cuartoy punkupi ñaupa chicay suyashawasqa. Niwarqataj: “Jamuy munanarikuspa uj rato karikusun”, nispa. Noqataj “mana” nerqani. Nerqanitaj Biblia nisqanman jina kausakushasqayta (1 Corintios 6:18). “¡¿Ima?!”, niwarqa. Mana casarakuspalla qhariwarmi jina puñuykuyta Biblia juchachasqanta pisipaj qhawarqa. Watejmanta paywan llojsinaytataj niwarqa. Cuartoyman yaykupuspa punkuta llaverpakamorqani. May kusiywan nini 1958 watapi bautizakusqaymantapacha Bibliaj nisqanman jinallapuni kausakusqayta.

Bibliaj nisqanman jina kausakusqayrayku ima bendicionestachus japʼisqaymanta tukuyninta parlariyman chayqa, nichá tukuymanchu. Kunanqa sumaj amigosniyoj kani, may kusisqa, niñataj qhasipajchu kausakuni.

Diospa leyesninman jina kausakuyta ñaupajman churajtiypis, beisbolta pujllay gustawanraj. Pujllashaspa may rejsisqa karqani, ashkha qolqetataj japʼerqani. Chay imastaj uj tiempollapaj. Dioswan, congregacionmanta hermanoswan allinpi kasqaytaj wiñaypaj kanqa. Biblia nin: “Kay mundoqa tukukapushan, munayninpis tukukapushallantaj, Diospa munayninta ruwajrí wiñaypaj kausanqa”, nispa (1 Juan 2:17). Kunanqa Jehová Diosta sirviy, llajtanpi kaytaj mayta gustawan. Chaytaj ni imawan kikinchakunchu.