Uj hermano nin: “19 watastapuni suyarqani”. ¿Imatá suyarqa? Bengalí parlayninpi Mosoj jallpʼapi kausajkunapaj Diospa Palabran (Mateo-Apocalipsis) nisqa Biblia llojsimunanta. Ashkha runaspis kikillantataj ninku parlayninkupi Diospa Palabran Biblia llojsimojtin. Jinapis tapukorqankichu may jinatachus hermanos llankʼasqankuta Bibliasta ruwaspa.

 Ñaupajtaqa Diospa Llajtanta Kamachejkunamanta Qhelqajkunapaj Comisión nisqanman jina, traducinankupaj uj grupo hermanosta churakun. Chanta, ¿mashkha tiempopí Bibliata traducinku? Warwickpi (Nueva Yorkpi), Servicios de Traducción nisqapi yanapakoj hermano Nicholas Ahladis nin: “Ashkha imasmanta kashan: mashkha traductoreschus yanapakuyta Mosoj jallpʼapi kausajkunapaj Diospa Palabran (Mateo-Apocalipsis) atisqankumanta, parlayninkuman traduciyta atillasqankumantachus manachus, chantapis Biblia parlan chay tiempospi imaynachus kausay kasqanta entiendekuyta atikullasqanmantachus manachus. Jinallataj parlayninku waj llajtaspi mana kikintachu parlakusqanmanta kashallantaj. Wakin gruposqa Mateomanta Apocalipsiskama traduciyta tukunku uj watapi, iskay watapi chayri kinsa watapi. Tukuynin Bibliatataj traduciyta tukunku tawa wataspi chayri astawan unaypi. Señas parlaykunamantaj astawan unaypi traducikun”.

 Bibliata traducinapajqa mana uj grupo traductoresllachu necesitakun, manachayqa traducikusqanta revisanankupaj waj hermanos, hermanaspis necesitakullantaj imaymana culturayoj, waj suyusmantapis. Chaytataj yanapakuyta munasqankurayku ruwanku, manataj pagoraykuchu. Chay hermanospa nisqankuwantaj Bibliaqa mana yapasqachu, chʼuwita, entiendenapajtaj facillla. Sudafricamanta uj hermanoqa Bibliata traducejkunata yachachin. Pay nin: “Bibliata traducejkunaqa reparanku Jehovapaj, Palabranta leejkunapajpis may jatun ruwayta ruwashasqankuta”, nispa.

 Traduciyta tukukusqantawan Bibliasta imprimina, wakichinataj. Imprentaspi Bibliasta ruwakunanpaj kay chunka imas necesitakun: papel, tinta, tapasninpaj material, cola, tapasninpaj waj imas, qolqe metalmanta papel, cintas, hojasta japʼichinapaj tela, cartón, libroj hojasnin sumaj ujchasqa kananpaj material ima. 2019 watapi, 20 millones dolaresmanta astawan chay materialespi gastakorqa. Chay watallataj hermanosqa 300.000 kuraj horasta trabajarqanku Bibliasta imprimispa, apachispa ima.

 Chay imasta ruwayqa qolqepaj, tiempopajwan. ¿Imajtín chayta ruwanchej? Departamento Internacional de Impresionpi yanapakoj hermano Joel Blue nin: “Bibliaqa ima publicacionta ruwasqanchejmantapis aswan importante”, nispa. Pay nillantaj: “Biblia sumaj ruwasqa kananta munayku Jehovata, willasqanchejtapis jatunchananpaj jina”, nispa.

 Chantapis Diospa Palabran Bibliataqa braillepi, carcelman apanapajpis ruwakullantaj. Braillepeqa chunka parlaykunapiña tiyan. Tukuynin Bibliataqa 8 horaspi ruwakun. Braillepi Bibliaj tukuynin librosninta pampaman ladonpurata churajtinchejqa 2,3 metros kanman. Wakin carcelespeqa papel tapasniyoj librosllata apaykuchinku. Chaypaj jinataj Bibliasta ruwakun.

 Diospa Palabran Bibliaqa runaspa kausayninta cambian. Tombemanta kiluba parlaypi congregacionmanta parlarina. Chayqa República Democrática del Congopi kashan. Chay llajtitaqa chay suyoj capitalninmanta 1.700 kuraj kilometrospi kashan. Tukuynin congregacionpajqa kiluba parlaypi uj Biblialla karqa, entiendenapajtaj difícil karqa. Reunionpaj wakichikunankupaj hermanosqa chay sapan Bibliallata mañanakoj kanku. Jinapis agosto de 2018 watamantapacha chay congregacionmanta hermanosqa Diospa Palabran Bibliata sapa ujninku japʼerqanku. Chay Bibliataj kiluba parlaypi Genesismanta Apocalipsiskama chʼuwita kashan.

 Alemanpeqa Diospa Palabran Biblia allinchasqa llojsimorqa. Chay Bibliamantataj uj hermana nin: “Kunanqa manaña ninichu ‘watejmanta Bibliata leenay tiyan’ nispa. Kʼachitu kasqanrayku, ‘¿maykʼajtaj watejmanta leerisajri?’ nispa nini”. Uj preso runa nerqa: “Diospa Palabran Bibliata jaywawasqankumantapacha cambianaypaj yanapashawan. Diospa Palabranta nipuni ajina chʼuwitata leerqanichu. Jehovaj testigosninta astawan rejsiyta munani. Yachaytataj munani noqapis testigo kanaypaj imatachus ruwanay kasqanta”.

 Piskunachus Diospa Palabran Bibliata leejkunaqa mayta agradecekunku qolqesitunchejta churakusqanchejmanta, chaywan Bibliasta ruwakusqanrayku. Ashkha imaynasmanta qolqesitunchejwan yanapakuyta atinchej, donate.pr418.com nisqanman jina. Gracias hermanosníy qolqesituta churakusqaykichejmanta.