Latinoamericapeqa may chhika millones runas tiyakunku, ashkhastaj campospi tiyakunku, waj parlayniyoj kanku, waj costumbresniyojtaj. Ashkha hermanosninchejtaj chay comunidadespi tiyakunku. Jehovaj testigosnenqa campospi tiyakojkunaman Bibliamanta yachachinapaj, Latinoamericamanta 130 kuraj parlaykunaman publicacionesta traducinchej, jaywanchejtaj. a Ashkha hermanosqa culturankuta respetajtinkupis, problemaspi rikukunku Jehovata sirvisqankurayku, Biblia juchachasqan costumbresta mana ruwasqankurayku ima. ¿Imaynatá churasqanchej qolqewan paykunata yanaparqanchej?

 Jaliscopi (Mexicopi), ujnin huichol comunidadpi hermanosqa respetowan nerqanku, Biblia juchachasqan costumbresta mana ruwanankuta. b Chaytaj comunidadmanta wakinta mayta phiñacherqa. Chayrayku 4 de diciembre de 2017 watapi, uj grupo phiñasqa runas testigosta, paykunawan kasharqanku chay runastawan, maqanankupaj correykorqanku. Chay phiña runasqa cumunidadninkumanta paykunata wijchʼorqanku, wasisninkuta, waj imasninkutapis qʼalata pampacharqanku, kutejtinkutaj wañuchinankuta nerqanku.

 Chay qaylla comunidadesmanta testigosqa tukuy ima necesitasqankuta hermanosman qorqanku. Jinapis, ¿imaynatá yanapasunman karqa wasinkuman kutipunankupaj? Ujnin hermanonchej Agustín sutiyoj nin: “Mana qolqeyku karqachu abogadota contratakunaykupaj, nitaj yacharqaykuchu imaynatachus chay imaspi purina kasqantapis”, nispa.

 Hermanosninchejpa derechosninku mana respetakushasqanrayku, Centroamericamanta sucursalqa chay rato yanaparqa. Ñaupajtaqa chay lugarmanta autoridadestaraj nerqanku chay jinata hermanosta ruwasqankuta allinta qhawaykurinankuta. Chantá Diospa Llajtanta Kamachejkunamanta Coordinadores Kajkunamanta Comisionqa nimorqa sucursal centralninchejmanta Departamento de Asuntos Legaleswan khuska trabajananta, huicholes hermanosninchejpajtaj demandata ruwananta. Tiempowan chay demandaqa Suprema Corte de Justicia de la Nación nisqaman chayarqa, chaytaj Mexicontinmanta aswan atiyniyoj juzgado.

 Ashkha nacionesmanta uj grupo abogadosqa imatachus ninankuta wakichikorqanku. Nerqankutaj imaynatachus runas comunidadespa culturankuta respetananku kasqanta, kikillantataj comunidadesqa chaypi tiyakojkunaj derechosninkuta respetananku kasqanta, valechinankutaj kasqanta. Runaspa derechosninkoqa maypi tiyakojtinkupis kikillan kanan tiyan.

 8 de julio de 2020 watapi Suprema Corte de Justiciamanta kajkunaqa, tukuyninku favorninchejpi karqanku, kamacherqankutaj chay comunidadmanta qharqosqa kajkunata kutipojta saqenallankuta. Agustinqa, pimantachus parlarerqanchejña, tukuy kutipojkunaj sutinpi nin: “May kusisqas kashayku, maytataj agradecekuyku hermanos yanapanawaykupaj tukuy imata ruwasqankumanta. Manachus yanapawaykuman karqa chayqa imaynachus kashaykumanpis karqa”, nispa.

 Ecuadorpi San Juan de Ilumán comunidadpipis, hermanosninchejta kikillantataj ruwarqanku. Chay comunidadqa Otavalo mayupi kashan, chaypitaj ashkha comunidades kallantaj. 2014 watapi hermanosqa papelesta orqhoytawan Tantakuna Wasita ruwayta qallarerqanku, uj sacerdotetaj pachaj runasta pusariykukuspa, Tantakuna Wasita hermanos ruwashasqankuta munajta mana munajta sayacherqanku. Chantapis chay comunidadpi tiyakojkunaqa prohiberqanku Jehovaj testigosnin tantakuykunata ruwanankuta.

 Ecuador sucursalmanta, centralninchejmantawan departamentos de Asuntos Legalesqa khuska trabajarqanku chay congregacionpa derechosninkuta valechinankupaj. Demandata tribunalesman chayacherqanku, ajinapitaj comunidadqa manaña hermanosta imatapis nerqachu, tantakojta saqellarqankuña, Tantakuna Wasitapis tukuchajta saqellarqankuña. Jinapis aswan qhepaman hermanospa derechosninkuta valechinallankupajpuni abogadosninchejqa aswan atiyniyoj juzgadosman waj demandata chayacherqanku, yachakunanpaj sichus comunidades indígenas runaspa wakin derechosninkuta mana valechiyta atisqankuta.

 16 de julio de 2020 watapi suyuntinmanta aswan atiyniyoj tribunal, Corte Constitucional del Ecuador nisqa chay demandata qhawaykorqa. Chay congregacionpa sutinpi parlaj hermanosqa Ecuadormanta tawa abogados karqanku. Paykunawan khuskataj waj tawa abogado hermanos kallarqankutaj. Paykunaqa waj suyuspi ajina demandasmanta sumajta yachanku. Coronavirus onqoyrayku ni mayman llojsiyta atikusqanrayku, chay tantakuymanqa waj suyusmanta videollamadanejta conectakorqanku. Chay kutipuni uj tribunalqa saqellarqa Jehovaj testigosninpa sutinpi parlaj abogados videollamadanejta conectakunankuta. c Abogadosninchejqa waj suyusmanta abogadospa nisqankuwan reparacherqanku runasqa mana derechosninkuta pierdeyta atisqankuta uj comunidadpi tiyakusqankuraykullaqa.

 Otavalomanta hermanosninchejqa imatachus Corte Constitucional ninanta suyashanku, maytataj agradecekunku hermanos yanapakusqankumanta. Ilumán Quichua congregacionmanta César sutiyoj anciano nin: “Jehovalla llajtannejta kay jinata yanapawayku pisilla kajtiykupis”, nispa.

 Hermanosninchejpa sutinpi parlarqanku chay abogadosqa, hermanosninchejta yuyaycharqanku chay abogadospis Jehovaj testigosnin karqanku. Paykunaqa mana qolqeta japʼispalla tukuy sonqo yanapakorqanku. Chay demandasta juzgadoman chayachiy, chaykunapaj wakichikuy, tribunalpi parlaypis tiempopaj, qolqepajpis karqa. Abogadosninchejpis hermanospis Mexicomanta demandapaj 380 kuraj horasta trabajarqanku, chantá 240 horasta documentosta traducispa karqanku. Ecuadorpi demandapajtaj mundontinmanta casi 40 abogadospuni may chhika horasta trabajarqanku. ¿Ima qolqewantaj chay imas ruwakun hermanosninchejta yanapanapaj? Chayqa ruwakun qolqesituta churakusqaykichejwan, donate.pr418.com nisqanman jina imaymanasmanta churakusqaykichejwan. Gracias hermanosníy qolqesituta churakusqaykichejmanta.