2022 watapeqa guerrasmanta, qolqe pisiyasqanmanta, desastres kasqanmanta ima noticias karqa. Chay tukuy imas pasashasqan ima niytachus munasqantaqa Biblialla sutʼinchan.

2022 watapi imaschus pasasqan, ¿ima niytá munan?

 Bibliaqa parlan ‘qhepa pʼunchaykunamanta’. Kay 2022 watapi imaschus pasasqantaj aswan sutʼita rikuchiwanchej ‘qhepa pʼunchaykunapi’ kausakushasqanchejta (2 Timoteo 3:1). Kay qhepa pʼunchaykunaqa 1914 watapi qallarerqa. Bibliaqa nerqaña kay tiempopi imaschus pasashan chay imas pasanantapuni. Imaynatachus chay juntʼakushasqanta qhawarina.

 “Guerras” (Mateo 24:6).

•   “2022 watapi mancharinapaj jina guerra Europapi ujtawan qallarerqa”. a

 “Yarqhaykuna” (Mateo 24:7).

•   “2022 watapi ni jaykʼaj jina yarqhay karqa”. b

 “Wañuchej onqoykuna” (Lucas 21:11).

•   “Polio nisqa onqoy watejmanta rikhurimushan, viruela del mono nisqa onqoy astawan yapakushan, COVID-19 nisqa onqoypis ashkha runasta onqochishallanpuni. Chaytaj rikuchiwanchej contagioso onqoykunaqa may sinchʼipuni kasqanta, runastaj ima onqoytapis chay rato japʼiyta atisqanchejta”. c

 ‘Mancharina imas’ (Lucas 21:11).

•   “Kay 2022 watamanta qʼoñi tiempotaqa mana qonqasunchu. Imaraykuchus manchay calor karqa, yaku pisiyarqa, incendios, inundaciones ima karqa. Chay imas kasqanraykutaj mundo enteropi ashkha runas wañorqanku, may chhika runastaj wasinkumanta ayqekorqanku”. d

 ‘Chʼajwas’ [chayri ‘runas oqharikushasqanku’] (Lucas 21:9).

•   “Runasqa qolqe pisiyasqanrayku chanta tukuy imajta precion yapakusqanrayku, sapa kuti aswan phiñasqas kashanku. Chayraykutaj 2022 watapeqa gobiernoj contranpi astawan chʼajwas karqa”. e

Qhepan watarí, ¿imastaj kanqa?

 Ni pipis yachanchu imaschus 2023 watapi kananta. Chaywanpis pisimantawan Diospa Gobiernon allin kausayta kay jallpʼaman apamonqa. Chay Gobiernoqa cielopi kashan (Daniel 2:44). Diospa Gobiernonqa imaschus llakichiwanchej chay imasta chinkachenqa, Diospa munaynintataj kay jallpʼapi ruwanqa (Mateo 6:9, 10).

 Jesucristo imastachus yuyaychawasqanchejta kasukuna, ‘rijchʼarisqasllapunitaj kana’. Ajinamanta rikusunchej kay tiempopi imaschus pasashasqanqa Bibliaj profeciasninta juntʼashasqanta (Marcos 13:37). Bibliaj nisqanqa kunan yanapawasunman. Chantapis noqanchejman, familianchejmanpis uj suyakuyta qowanchej. Chaymanta astawan yachakuyta munanki chayqa, noqaykuwan parlariy.