Mundontinmanta wakin lugarespi sinchʼita parasqanrayku, ashkha runas ñakʼarishanku. Kay willaykunapi tʼukuriy:

•   “China suyuj aswan jatun llajtanpi may jinatapuni paramorqa. Chay jina paraqa 140 watastaña mana rikukojchu [...]. Kay pasaj sabadopi miercolespiwan sapa metro cuadradopi casi 745 litrostapuni paramorqa” (AP News, 2 de agosto de 2023).

•   “Kay juevesta Japonpa uranejninpi uj sinchʼi muyoj wayra marpi oqharikorqa. Chayraykutaj iskay diastaña chay lugarpi sinchʼita parashan, wayrashantaj. Kunankamaqa iskay runasña chaypi wañunku. [...] Chay loco wayraqa Taiwan nacionpa chaupinpi lomaskama chayanqa. Chayraykutaj sapa metro cuadradopi 600 litrosta jina paranqa” (Deutsche Welle, 3 de agosto de 2023).

•   “Atlántico canadiense nisqa lugarpi sinchʼitapuni paramorqa. Chay jina paraqa 50 watasta jinaña mana rikukojchu. Chay jinatapuni parasqanrayku, pasaj sábado domingopiwan Nueva Escocia nisqa lugarta yaku pʼamparparqa” (BBC News, 24 de julio de 2023).

 ¿Imatá Biblia nin chay sinchʼi parasmanta?

 Bibliaqa nin ‘qhepa pʼunchaykunapi’ kausashasqanchejta (2 Timoteo 3:1). Jesusqa nerqa kay tiempopi “mancharina imasta” rikunanchejta (Lucas 21:11). Tiempo manaña kikinchu kasqanrayku, anchata ruphamun, sinchʼita paramun, ancha chiriñataj chayri manchayta wayramun. Chaykunatataj mana yuyasqallamanta rikunchej, aswan sinchʼita, sapa kutitaj.

 Biblia nisqanman jina, kay tiempopi rikusqanchej llakiykunaqa sumaj kausaj qayllamushasqanta rikuchiwanchej. ¿Imaraykutaj chayta ninchej? Imaraykuchus Jesús nerqa: “Chay imasta juntʼakojta rikuspaqa, yachaychej Diospa Gobiernon qayllitapiña kasqanta”, nispa (Lucas 21:31; Mateo 24:3).

 Kay tiempopi tukuy ima rikusqanchejqa, rikuchiwanchej Diospa Gobiernon pisimantawan tukuy imata allinchananta, nisunman tiemponpi parachimonqa, maychus kajtataj ruphamonqa, chirimonqataj (Job 36:27, 28; Salmo 107:29).

 Diospa Gobiernon imaynatachus kay jallpʼata allinchananta astawan yachanaykipajqa, “¿Quién salvará el planeta?” nisqa yachaqanata leeriy.