•    Kay 7 de septiembre de 2022 fechapi The Guardian nisqa periódico nerqa: “Chinapeqa kay wata astawan calorta ruwashan, jallpʼapis may chʼaki kashan”, nispa.

•    Kay 26 de agosto de 2022 fechapi Noticias ONU nisqapi nerqa: “Africapeqa kay watawan phishqa watasña chʼaki watas kashan”, nispa.

•    Kay 23 de agosto de 2022 fechapi BBC News nisqa periódico nerqa: “Europaqa khuskanmanta astawan chʼakipacha kashan, ni jaykʼaj ajina rikukorqarajchu”, nispa.

 Ashkha yachayniyoj runas ninku chʼaki watas kanallantapuni, astawantaj sinchʼiyananta. Jinapis, ¿imataj astawan qhepaman kanqa? ¿Imatá Biblia nin chaymanta?

 Bibliaqa kay tiemponchejmanta nerqa:

•   “Kaynejpi jaqaynejpitaj yarqhaykuna” kanqa (Lucas 21:11).

 Chʼaki watas kajtin yarqhaypis kallantaj. Bibliaj profeciasnintajrí yarqhay kananmanta parlan. Chantapis parlallantaj yarqhayrayku runas sufrinankumanta, runas wañunankumanta ima (Apocalipsis 6:6, 8).

 Bibliaqa imaraykuchus chay kasqanta nin:

•   “Runaqa mana nillaytapis atinchu imatachus kausayninpi ruwananta” (Jeremías 10:23).

 Kay versiculopi nin jina, runastaqa mana allinchu rin paykunallamanta ‘imatapis kausayninkupi’ ajllajtinku, chayri paykunapuralla kamachinakojtinku. Runas mana allinta ajllasqankurayku yaku pisiyashan, chʼaki wataspis kashan.

•    Ashkha cientificosqa ninku, runas tukuy imata ruwasqankurayku jallpʼa astawan qʼoñi kasqanta, chayraykutaj mundontinpi yaku astawan chʼakipushasqanta.

•    Runasqa qhapajyayllata maskʼanku, nitaj piensankuchu imachus aswan qhepaman kananpi. Paykunaqa montespi ashkha sachʼasta kʼutunku, jallpʼata chʼichichanku, jallpʼamanta tukuy atisqanku imastataj orqhonku. Chayraykutaj ashkha yaku juturis chinkapushan.

 Jinapis Bibliaqa sumaj imas kananmanta parlan.

 Bibliaqa niwanchej Diosninchej chʼaki watasta tukuchinanta. ¿Imaynatá chayta ruwanqa?

1.  1. Diosqa kay ‘jallpʼata pierdechejkunata tukucheqa’ (Apocalipsis 11:18). Diosqa sajra runasta, qhapajyayta munaspa kay jallpʼata pierdechejkunatapis chinkachenqa. Imajtinchus paykuna mana allinta ruwasqankurayku yaku pisiyashan (2 Timoteo 3:1, 2).

2.  2. “Chʼaki jallpʼaqa caña huecasniyoj qochaman tukonqa” (Isaías 35:1, 6, 7). Diosqa chʼaki jallpʼasta uj kʼachitu lugarman tukuchenqa, kay jallpʼa enterotataj uj paraisoman tukuchenqa. Paraisopeqa ashkha yaku kanqa.

3.  3. “Qanmin jallpʼata sumajta cuidanki. Sumaj jallpʼaman tukuchinki, sumajta poqochinki” (Salmo 65:9). Dios kay jallpʼata bendecisqanrayku tukuypaj sumaj mikhuna kanqa, chʼuwa yakitupis.