Domingo 20 de noviembre de 2022 fechapi Conferencia de las Naciones Unidas sobre el Cambio Climático, COP27 nisqa tantakuy tukukorqa. Gobiernospis yachayniyoj runaspis chay tantakuypi nerqanku, qolqewan yanapanankuta tiempo cambiasqanrayku llakiypi rikukoj llajtasta. Jinapis ashkha runas ninku chayta ruwajtinkupis tiempoqa cambianallantapuni.

•    António Guterres secretario general de las Naciones Unidas, 19 de noviembre de 2022 fechapi nerqa: “Tiempo cambiasqanrayku llakiypi rikukoj llajtasta yanapanapaj qolqeta tantakunanmanta may kusisqa kashani. Jinapis yachanchej mana chayllatachu ruwana kasqanta [...] jallpʼanchejqa manapuni allinchu kashan”, nispa.

•    Mary Robinson expresidenta de Irlanda, ex Alta Comisionada de Derechos Humanos de la ONU, 20 de noviembre de 2022 fechapi nerqa: “Jallpʼanchejpi tiempoqa cambiallanqapuni”, nispa.

 Astawanqa jóvenes llakisqa kashanku aswan qhepaman imachus jallpʼanchejwan kananmanta. Jinapis gobiernos ujchaykukuspa, ¿imatapis ruwayta atinkumanchu tiempo mana cambiananpaj? ¿Imatá Biblia nin chaymanta?

 Biblia nisqanman jina, gobiernos tiempo mana cambiananpaj tukuy imata ruwanankupaj kallpachakojtinkupis, tiempotaqa mana cambiayta atenqankuchu. ¿Imaraykú chayta ninchej? Biblia nin:

•   “Wistʼutaqa mana cheqanchayta atisunmanchu” (Eclesiastés 1:15).

   ¿Ima niytá munan? Gobiernosqa mana atinkuchu tukuy ima yuyasqankuta ruwayta. Imaraykuchus runasqa mana purajmanta kamachinakunankupajchu ruwasqa kashanku (Jeremías 10:23). Tukuy gobiernos ujchaykukojtinkupis manapuni kay mundomanta problemasta allinchayta atinkumanchu, chayta ruwanankupaj mayta kallpachakojtinkupis.

•   “Runasqa paykunallata munakonqanku, qolqeta munakonqanku, [...] mana uj yuyayllaman chayayta munanqankuchu” (2 Timoteo 3:2, 3).

   ¿Ima niytá munan? Biblia nerqaña kay tiempopi ashkha runas paykunallapaj imatapis munanankuta, nitaj wajkunaj allinninkurayku khuska llankʼanankuta.

 Kay jallpʼapi sumaj kausay kananqa mana gobiernos imatachus ruwasaj nisqankumantachu kashan. Astawanpis Diosqa Jesucristota ajllanña kay jallpʼata presidente jina kamachinanpaj. Bibliataj paymanta nin:

•   “Gobiernoqa makinpi kanqa. Payqa kay sutisniyoj kanqa: Sumajta Yuyaychaj, Atiyniyoj Dios, Wiñaypaj Tata, Allin Kausayta Apamoj Kuraj Kamachej” (Isaías 9:6).

 Jesusqa Diospa Gobiernonmanta Rey, chay Gobiernoqa cielomantapacha kamachimonqa (Mateo 6:10). Jesusqa atiyniyoj, yachayniyojtaj. Chayrayku payqa munan kay jallpʼanchejta, runastapis cuidayta (Salmo 72:12, 16). Payqa kamachimushaspa kay ‘jallpʼata pierdechejkunata tukuchenqa’, jallpʼanchejtataj uj kʼachitu lugarman tukuchenqa (Apocalipsis 11:18; Isaías 35:1, 7).

 Tiempo manaña cambiananpaj Dios imatachus ruwananmanta astawan yachakunaykipaj “¿Qué dice la Biblia sobre el cambio climático y nuestro futuro?” nisqa yachaqanata leeriy.