Mundontinpi nacionesqa politicarayku may tʼaqanasqas kashanku. 2022 watapi centro de investigación Pew Research Center, runasta tapusqanman jina kayta nin: “19 nacionespi runasta tapusqaykuman jina 100 runasmanta 65 runaspuni ninku nacionninkupi ashkha chʼajwas kasqanta runas mana kikin partidomantachu kasqankurayku”, nispa.

 Tiyakunki chaypi, ¿runas politicarayku aswan tʼaqanasqaschu kashanku? ¿Imaraykú chay pasashan? ¿Maykʼajllapis chay allinchakonqachu? Biblia imatachus nisqanta qhawarina.

 Bibliaqa nerqaña kay tiempopi, nisunman kay ‘qhepa pʼunchaykunapi’ ashkha runas mana kikinta yuyasqankurayku mana ujchasqa kausakuyta atinankuta.

•   “Qhepa pʼunchaykunapeqa kausay may llakiy kanqa, maytataj sajrayanqa. Runasqa paykunallata munakonqanku, [...] mana uj yuyayllaman chayayta munanqankuchu” (2 Timoteo 3:1-3).

 Gobiernosqa allinta gobernanankupaj ashkha runas yanapajtinkupis, manapuni allinta gobernayta atinkuchu. Wakin runasqa waj jinata yuyasqankurayku mana uj yuyayllaman chayankuchu, chayrayku mana khuska trabajayta atinkuchu problemasta allinchanankupaj. Chaywan sutʼita reparanchej Bibliaj unayña nisqan juntʼakushasqantapuni.

•   “Runaqa tukuy tiempo runa masinta chakisnin uraman churan, chaytaj runallata ñakʼarichin” (Eclesiastés 8:9).

 Bibliaqa willawanchej chay tukuy imasta uj gobierno allinchananta, runaspaj tukuy llakiyninta chinkachinantapis.

 Bibliaqa uj sumaj kamachejmanta parlan, pay jinataj ni pi kanchu. Chay kamachejlla atiyniyoj tukuy problemasta allinchananpaj. Chay kamachejqa Jesucristo. Payqa atiyniyoj, munashantaj allin kausayta apamuyta tukuy runas ujchasqa kausakunankupaj.

•   “Pay kamachishajtenqa cheqan runas tʼikarenqanku. Allin kausaytaj wiñaypaj kanqa” (Salmo 72:7).

•   “Tukuy naciones payta sirvenqanku” (Salmo 72:11).

 Jesuslla uj sumaj kamachejqa. Imaraykuchus payqa runasta munakun, yanapaytataj munan, astawanpis qhasillamanta ñakʼarichisqa kajkunata mayta yanapayta munashan.

•   “Pay pobresta salvanqa yanapata mañakuspa qhaparikojtinku. Salvallanqataj wajchasta, mana piniyojkunatapis. Payqa mana imayoj runasta, wajchastapis khuyanqa. Paymin pobresta salvanqa. Paykunataqa ñakʼarichej runasmanta, sajra runasmantawan salvanqa” (Salmo 72:12-14).

 Diospa Gobiernonpeqa Jesús cielomantapacha kamachimonqa. Chay Gobiernomanta astawan yachakuy, chay Gobierno imaynatachus qanta yanapasunanmantapis. Yachakullaytaj imaynatachus chay Gobiernota apoyanaykimantapis.

•   ¿Imastataj Diospa Gobiernon ruwanqa? nisqa videota qhawariy.

•   “Diospa Reinon: uj cheqan gobierno” nisqa yachaqanata leeriy.