Kunallanraj ashkha autoridades, científicos, tecnologiamanta yachajkuna ima kay inteligencia artificial nisqamanta parlarqanku. Chayqa sumajta yanapawasunman ninku. Jinapis nillankutaj mana allinta apaykachajtinchejqa mana allin imasman chayachinawanchejta. Chay inteligencia artificialqa uj programa. Chayqa runa jina yuyananpaj ruwasqa kashan. Chaytaj tarikun computadoraspi, celularespi waj aparatospi ima.

•   Estados Unidosmanta vicepresidenta Kamala Harris jinata nerqa: “Tecnología ñauparisqanrayku kay inteligencia artificial nisqaqa manchay yuyayniyoj. Chayqa runasta mayta yanapanman […]. Jinapis mana confianapaj jinachu. Imajtinchus wakin runasqa chaynejta runaspa derechosninta mana valechispa datosninta, waj imasnintawan suwakapunkuman, chantapis chʼajwasta rikhurichinkuman, eleccionespipis wakin imasta qʼewinkuman”, nispa (4 de mayo de 2023).

•   Uj grupo doctores nerqanku: “Kay inteligencia artificial nisqa wakin onqoykunata jampinapaj yanapakojtinpis, ashkha imaynasmanta wañuy pataman churawasunman”, nispa. (Paykunaqa doctor Frederik Federspielpa kamachiyninpi trabajanku. Chay parlasqankutaj llojsimorqa 9 de mayo de 2023, BMJ Global Health nisqa revistapi). a

•   Uj periodicopi nerqa: “Kay inteligencia artificial nisqaqa noticiasta, waj willaykunatawan qʼewinman. Ashkhastaj mana trabajoyoj qhepakunkuman. Astawan llakikunapaj jinataj mundontinmanta runaspa kausayninta wañuy pataman churanman”, nispa (The New York Times, 1 de mayo de 2023).

 Tiempo pasasqanman jina yachasunchej kay inteligencia artificial maykamachus yanapayta atiwasqanchejta, imapichus mana allinchu kasqantapis. ¿Imatá Biblia chaymanta nin?

 Bibliaqa nin runasqa mana tukuy imatapunichu controlayta atisqankuta. Tecnologiatapis wajkunaqa mana allin imaspaj apaykachankuman.

1.  1. Runas allin kajtapuni ruwayta munajtinkupis, wakin imasta ruwasqankoqa wajkunapaj mana allinchu kanman.

   •   “Runaj yuyayninman jina ñannenqa cheqan kashan. Chay ñantaj wañuyman chayan” (Proverbios 14:12).

2.  2. Uj runa imatapis inventanman. Jinapis mana controlayta atinmanchu imaynatachus chayta wajkuna apaykachasqankuta.

   •   “Chay tukuy imastaqa saqepunay kanqa qhepayta jamoj runapaj. ¿Chanta pitaj yachan chay runa yachayniyojchus wampuchus kananta? Imayna kajtinpis payqa japʼikaponqa chay tukuy imasta, mayqenkunatachus sinchʼi trabajowan, sumaj yachaywantaj ruwarqani kay jallpʼapi chayta” (Eclesiastés 2:18, 19).

 Chayta yachayqa reparachiwanchej Ruwawajninchej Diosta necesitasqanchejta.

 Ruwawajninchej Diosqa niwanchej ni imapis, ni runaspa ruwasqankupis, nisunman ni tecnologiapis kay jallpʼata, ni runastapis tukuchinanta.

•   “Jallpʼatajrí wiñaypaj kallanqapuni” (Eclesiastés 1:4).

•   “Cheqan runasqa kay jallpʼata herenciata jina japʼenqanku, kay jallpʼapitaj wiñaypaj kausakonqanku” (Salmo 37:29).

 Ruwawajninchej Diosqa Palabrannejta niwanchej imatachus ruwanata sumaj kausayta japʼinapaj. Chaymanta astawan yachakunaykipajqa kay yachaqanasta leeriy: “¿Imataj yanapawasunman sumajta kausakunapaj?”, “La esperanza real de un mañana mejor”.