Rusiamanta soldadosqa 24 de febrero de 2022 pʼunchaypi Ucraniaman yaykuykorqanku. Chayraykutaj millones runas Ucraniamanta ayqekorqanku. a

 Ucraniapi Járkov llajtamanta Nataliia nin: “Bombas tʼojyasqanku uyarikorqa. Manchay mancharinapuni karqa, imaynatachus niymanpis imachus pasasqanta. Trenespi ashkha runas ripushasqankuta yachaytawan, noqaykupis riporqayku. Tukuy imaykuta saqerqayku, trenmanqa juchʼuy mochilitallawan sapa uj yaykunayku karqa. Chay mochilitapeqa documentosniykuta, medicamentosta, yakuta, uj chhika mikhunitallatawan apanayku karqa. Bombasta kachaykamojtinkutaj tukuy imaykuta saqespa tren estacionman rerqayku”, nispa.

 Ucraniapi Járkov llajtamanta Nadija nin: “Manapuni creerqaykuchu uj guerra qallarinantaqa. Karupi tʼojyachisqankuta uyarerqani, ventanaspis manchayta kharkaterqa. Chayrayku wasiymanta riporqani, necesitasqay imasta oqharikuspalla. Wasiymantaqa 8 de la mañanata llojserqani, chantá Lviv llajtaman trenta japʼerqani, chaymantataj Poloniaman flotata japʼerqani”, nispa.

Kay yachaqanapi kayta yachakusun:

•  ¿Imaraykutaj may chhika runas llajtankumanta ayqekunku?

•  Ayqekoj runas, ¿maypitaj sonqochayta tarinkuman?

•  Llajtankumanta ayqekoj runasta, ¿Biblia yanapanmanchu?

 ¿Imaraykutaj may chhika runas llajtankumanta ayqekunku?

 Ucraniamantaqa may chhika runas ripushanku, chay suyuman Rusiamanta soldados yaykuykusqankurayku. Jinapis Bibliaqa sutʼinchan, may chhika runas llajtankumanta ayqekunankupaj waj imas kasqanta.

•   Gobiernosqa runasman imatachus necesitasqankuta mana qoyta atinkuchu. Paykunaqa autoridad kasqankumanta valekuspa ashkha kutispi runasta ñakʼarichinku (Eclesiastés 4:1; 8:9).

•   Diablo Satanasqa ‘kay mundota kamachishan’. Paytaj runasta munayninta ruwachin, chayrayku Biblia nin ‘mundontin Diabloj makinpi kasqanta’ (Juan 14:30; 1 Juan 5:19).

•   Runaspajqa unaymantapacha ashkha problemas karqapuni. Jinapis kunanqa Biblia nisqanman jina astawan problemas tiyan. Biblia nin: “Qhepa pʼunchaykunapeqa kausay may llakiy kanqa, maytataj sajrayanqa”, nispa (2 Timoteo 3:1). Chay qhepa pʼunchaykunapi kausakusqanchejta rikuchin, guerras, desastres naturales, yarqhay, onqoykuna ima. Chaykunaqa kay tiempopi rikukushan. Chayraykutaj ashkha runasqa llajtankumanta ayqekunku (Lucas 21:10, 11).

 Ayqekoj runas, ¿maypitaj sonqochayta tarinkuman?

 Bibliaqa niwanchej Jehová b Diosninchejqa wasinkuta saqespa llajtankumanta ayqekoj runasta munakusqanta, paykunamantataj khuyakusqanta (Deuteronomio 10:18). Payqa niwanchej ayqekoj runaspa llakiyninkuta chinkachinanta. Chaytataj ruwanqa cielopi kashan chay Gobiernonnejta. Arí, Diospa Gobiernonqa runaspa gobiernonkoj cuentanmanta kamachimonqa (Daniel 2:44; Mateo 6:10). Jehovaqa Gobiernonnejta Satanasta chinkachenqa (Romanos 16:20). Diospa Gobiernon kamachimojtenqa manaña fronteras kanqañachu, niñataj tʼaqanasqaschu kasun. Mundontinmanta runasqa uj familia jina ujchasqa kausakusun. Niña pipis wasinta saqespa ayqekonqachu, imaraykuchus Biblia nin: “Sapa ujpis chukurikonqa uva sachʼan urapi, higo sachʼan urapi, nitaj pipis paykunata manchachenqachu. Angelesta kamachej Jehová Diosmin chaytaqa nin”, nispa (Miqueas 4:4).

 Kay tiempopi ashkha runas llajtankumanta ayqekusqankutaqa Diospa Gobiernollan tukuchenqa. Imaraykuchus Jehovaqa imaschus runasta llajtankumanta ayqechin, chay imasta chinkachenqa. Imastachus chinkachinanta yachakuna.

•   Guerras. “Diosqa jallpʼantinpi guerrasta tukuchin” (Salmo 46:9) Imaynatachus Dios guerrasta chinkachinanta yachakunaykipaj, “¿Maykʼajllapis kay jallpʼapi allin kausay kanqachu?” nisqa yachaqanata leeriy.

•   Ñakʼariy, sajra runas ima. “Paykunataqa ñakʼarichej runasmanta, sajra runasmantawan [Jehová] salvanqa” (Salmo 72:14). Runas wakin imasta ruwayman allin yachasqa kajtinkupis, cambiayta atisqankuta yachakunaykipaj, “Amaña chejninakunachu” nisqa yachaqanasta leeriy.

•   Wajcha kausay. “[Jehovaqa] pobresta salvanqa yanapata mañakuspa qhaparikojtinku” (Salmo 72:12). Imaynatachus Diosninchej wajcha kausayta chinkachinanta yachanaykipaj, “¿Es realista esperar un sistema económico justo?” nisqa yachaqanata leeriy.

•   Yarqhay. “Jallpʼapeqa ashkha trigo poqonqa” (Salmo 72:16). Diosninchej imaynatachus yarqhayta chinkachinanta yachanaykipaj, “¿Un mundo sin hambre?” nisqa yachaqanata leeriy.

 Llajtankumanta ayqekoj runasta, ¿Biblia yanapanmanchu?

 Arí. Bibliaqa llajtankumanta ayqekojkunata mana sonqochallanchu, manaqa sumaj yuyaychaykunatawan qon kay tiempopi llakiyninkuta atipanankupaj.

 Bibliaj yuyaychasqan: “Ama imamantapis llakikuychejchu. Astawanpis tukuy imapaj Diospa yanapayninta mañakuychej. Paymantaqa tukuy sonqo mañakuychej, rogakuspa, graciasta qospataj. Diostaj sonqo tiyaykuyta qosonqachej, mayqentachus runas mana entiendeyta atinkuchu chayta. Ajinamanta payqa sonqoykichejta, yuyayniykichejtawan [...] waqaychanqa” (Filipenses 4:6, 7).

 ¿Ima niytá munan? Ima llakiypi rikukuspapis Diosmanta mañakuy sonqoykita, yuyayniykita tiyaykuchinanta. Kaymanta astawan yachanaykipaj “Filipenses 4:6, 7 | ‘No se inquieten por nada’” nisqa yachaqanata leeriy.