Yachakusqanman jina, 2022 watapi militarespaj gastakusqan qolqeqa 2,24 billones dólares karqa. Ni jaykʼaj chay chhika qolqeta gastakojchu. Chaytaj karqa Rusia Ucrania nacionwan guerraman yaykusqanrayku. Kay Instituto Internacional de Estudios para la Paz de Estocolmo (SIPRI) 2023 watamanta abrilpi uj willayta orqhorqa. Chay willaytaj 2022 watamanta jinata nin:

•   Europapi guerrapaj gastakusqan qolqeqa “13% nisqawan 2022 watapi yapakorqa. Guerra Fría nisqa kasqanmantapacha, ni jaykʼaj chay chhikata yapakorqachu”.

•   “Rusiaqa 9,2% qolqetawan militarespaj gastarqa. Rusiaqa militarespaj qolqeta gastaspa, mundontinpi phishqa kaj puestopi kasharqa, kunantaj kinsa kaj puestopi kashan”.

•   Estados Unidosqa militarespaj qolqeta gastaspa ñaupaj kaj puestollapipuni kashan. “Paykunaqa mundontinmanta 39% nisqatapuni militarespaj gastanku”.

 Doctor Nan Tianqa, SIPRI nisqamanta willayta ruwaysikorqa. Paytaj nin: “Mundontinmanta naciones guerrapaj astawan qolqeta gastasqankoqa, rikuchiwanchej astawan mana allinman chayashasqanchejta”.

 Bibliaqa unayña nerqa, mundontinmanta astawan atiyniyoj naciones maqanakunankuta. Chantá nillarqataj imatachus ruwananchejta allin kausayta tarinanchejpaj.

•   Bibliaqa nin tukukuy tiempopi kausashasqanchejta (Daniel 8:19).

•   Daniel libroqa nerqa, kay tiempopi mundontinmanta atiyniyoj gobiernos chejninakunankuta. Astawan atiyniyoj kayta munaspataj “chʼajwapi” kanankuta. Chay nacionestaj maqanakunankupaj, ‘qoritawan qolqetawan’ gastananku karqa (Daniel 11:40, 42, 43).

 Kay profeciamanta astawan yachakuyta munaspaqa, Daniel capítulo 11 juntʼakusqan nisqa videota qhawariy.

•   Bibliaqa nin, Diosqa enteron gobiernosta chinkachinanta. Chantataj “uj gobiernota sayarichenqa, chay gobiernotaj ni jaykʼaj chinkachisqachu kanqa, nitaj waj nacionpa makinmanpis chayanqachu. Chay gobiernoqa, tukuy chay gobiernosta tʼunanqa, chinkachenqataj. Ajinamanta chay gobiernollaña wiñaypaj wiñaynintinpaj sayanqa” (Daniel 2:44).

•   Runasqa manapuni allin kausayta sayarichiyta atinkuchu. Jinapis Jehovaqa a tumpamantawan allin kausayta tukuy runaspaj apamonqa, chaytaj wiñaypaj kanqa. ¿Imaynatá chayta ruwanqa? Payqa cielopi kay Gobiernonnejta tukuy maqanakuykunata chinkachenqa, armastapis tʼunaranqa (Salmo 46:8, 9).

 Diospa Gobiernon imastawanchus ruwananta astawan yachakuyta munaspaqa, “Diospa Gobiernonqa allin kausayta apamonqa” nisqa yachaqanata leeriy.