Kay 2022 watamanta julio killapi, armaswan wañuchinakus mundontinpi astawan yapakun.

•    Kay 10 de julio de 2022 fechapi The Japan Times nisqa periódico nerqa: “Japonmanta aswan rejsisqa [ex primer ministro Shinzo Abe sutiyoj] politicota wañuchisqankoqa suyunchejmanta runasta tʼukuchin, jinallataj mundontinmanta runastapis. Ajinata tʼukuchin imajtinchus Japonpeqa mana ajina wañuchinakus kayta yachanchu, leyesman jinataj mana pillapis armasta apaykachayta atinchu”, nispa.

•    Kay 4 de julio de 2022 fechapi Reuters nisqa periódico nerqa: “Dinamarcamanta runasqa mancharisqa kashanku, Copenhaguepi uj runa uj jatun tiendapi kinsa runasta baleaspa wañuchisqanmanta”, nispa.

•    Kay 10 de julio de 2022 fechapi The Guardian nisqa periódico nerqa: “Sudáfrica: Soweto nisqa llajtamanta uj discotecapi, uj runa 15 runasta armawan wañuchin”, nispa.

•    Kay 5 de julio de 2022 fechapi CBS News nisqa periódico nerqa: “Estados Unidospi 4 de julio feriadopi 220 runas wañunku uj baleanakupi”, nispa.

 ¿Maykʼajllapis wañuchinakus chinkanqachu? ¿Imatá Biblia nin?

 Bibliaqa kay tiemponchejta ‘qhepa pʼunchaykuna’ nispa sutichan. Kay tiempopi runasqa “manchay phiñas”, sajrastaj kanku (2 Timoteo 3:1, 3). Wañuchinakus kasqanraykutaj runasqa mancharisqalla kausakunku (Lucas 21:11). Jinapis Biblia niwanchej wañuchinakus chinkananta. Isaías 32:18 nin: “Nacionneyqa ni imamanta manchachikuna lugarpi tiyakonqa, ni imamanta manchachikuna wasispi, phaj sonqo samarikuna lugarespi”, nispa. ¿Imaraykutaj ninchej wañuchinakus chinkananta?

 Diosqa sajra runastapis armastapis chinkachenqa.

•   “Sajra runastajrí kay jallpʼamanta chinkachisqa kanqanku” (Proverbios 2:22).

•   “Diosqa jallpʼantinpi guerrasta tukuchin. Diosqa flechana arcosta pʼakiran, tʼojsina lanzastapis tʼunata ruwan, soldadospa carretasninkutapis ninawan ruphaykuchin” (Salmo 46:9).

 Diosqa runasta allinpi kausakuyta yachachenqa, ajinamanta manaña wañuchinakus kanqachu.

•   “Tukuynin santo orqoypeqa, manaña pitapis imananqankuchu, nitaj pitapis ñakʼarichenqankuchu. Jallpʼaqa Jehová Diospa yachayninwan juntʼa kanqa, imaynatachus mar qochaman yaku juntʼaykun ajinata” (Isaías 11:9).

•    Diosqa kunanña mundontinmanta runasman yachachishan mana wañuchinakunankupaj, nitaj armasta apaykachanankupaj. Runasqa “espadasninkumanta arado rejasta ruwakonqanku, tʼojsina lanzasninkumantapis josesta ruwakonqanku” (Miqueas 4:3).

 Bibliaqa niwanchej aswan qhepaman mana manchachikuspa kausakunata. Chaymanta astawan yachanaykipaj “¿Es posible librarse del miedo?” nisqa yachaqanata leeriy.

 ¿Imaynatá wañuchinakus chinkachisqa kanqa? Chayta yachanaykipaj “¡Por fin paz en la Tierra!” nisqa yachaqanata leeriy.